Ձեր վստահելի աղբյուրը

Աբովյանցի գործարար Մկրտիչ (Մերուժան) Խաչատրյանի սպանության գործով անցնող առանցքային վկան, որը գործարարին պատկանող «ՄԱ-Պլազա» ժամանցային համալիրի Մարտին անունով մենեջերն է, հարցաքննվել է:

Աբովյանցի գործարար Մկրտիչ Խաչատրյանը մահացել էր սեպտեմբերի 27-ին «Սբ. Գրիգոր Լուսավորիչ» բժշկական կենտրոնում` գլխի շրջանում ստացած ծանր վնասվածքների հետևանքով: Նա, մինչև այդ սեպտեմբերի 13-ին, հենց իրեն պատկանող ժամանցային համալիրի առջև մի խումբ երիտասարդների կողմից դաժան ծեծի էր ենթարկվել: Խաչատրյանի մահվան կապակցությամբ հարուցվել էր քրեական գործ և այժմ 3 երիտասարդներ` զինծառայող Ալբերտ Քարհանյանը և աբովյանցի եղբայրներ Վահրամ ու Վարդան Գրիգորյանները կալանավորված են: Նրանց բոլորին մեղադրանք է առաջադրվել ՀՀ քր. օր-ի 112 հոդվածի 2-րդ մասի 6-րդ և 14-րդ կետերի հատկանիշներով` «մի խումբ անձանց կողմից անզգուշությամբ առաջացնելով տուժողի մահ»: Քրեական գործի նախաքննությունը վարում է ՊՆ քննչական ծառայությունը:

Panorama.am-ի թղթակցի հետ զրույցում մահացած գործարարի հարազատներն ասացին, որ Մարտինը այլևս չի աշխատում «ՄԱ-Պլազա» համալիրում: Չեն աշխատում մի քանի մարդիկ ևս, որ նախկինում աշխատել են համալիրում: «Մեզ ասացին, որ տեսագրություններն են վերականգնել: Այն, որ այդ մարդիկ կալանավորվել են, լավ է, բայց պետք է քննությունը արդար վարեն», -մեզ հետ զրույցում ասացին գործարարի հարազատները:

Նրանց պնդմամբ, բացի Մարտինից, էլի մի քանի վկաներ կան, որոնք միջամտել են ծեծկռտուքին ու փորձել բաժանել: «Տիգրանը և Գևորգը տեսել են, որ կռիվ է, մոտեցել են ու բաժանել կռվողներին, իրենք տեսել են` ինչ է կատարվում», -պատմում են հարազատները:

Panorama.am-ը հոկտեմբերի 11-ին անդրադարձել էր այս պատմությանը և նշել, որ գործով կալանավորված է միայն զինծառայող Ալբերտ Քարհանյանը, որին առաջադրվել էր մեղադրանք ՀՀ քր. օր-ի 112 հոդվածի 2-րդ մասի 6-րդ և 14-րդ կետերով: Այնուհետև, հոկտեմբերի 15-ին մեղադրանք առաջադրվեց նաև եղբայրներ Վարդան և Վահրամ Գրիգորյաններին ու նրանք նույնպես կալանավորվեցին: 

Հարակից հրապարակումներ. Աբովյանցի գործարարի սպանությունը կոծկո՞ւմ են. հարազատները արդարություն են փնտրում
Նոր զարգացումներ աբովյանցի գործարարի սպանության գործով. Կան ևս երկու ձերբակալվածներ

ՊՆ քննչական ծառայությունը նոր մանրամասներ է ներկայացնում աբովյանցի հայտնի գործարարի սպանության գործով