Ձեր վստահելի աղբյուրը

Ազգային ժողովի պատգամավոր, նախկին զինդատախազ Գագիկ Ջհանգիրյանը անհնար է համարում սահմանափակ տարածքում հարյուրավոր ոստիկանների ու հատուկ ծառայության աշխատակիցների աչքի առաջ կատարված սպանություններն ու մարմնական վնասվածքներ հասցնելու դեպքերը բացահայտել չկարողանալը:

«Հնարավոր չէ տասը մարդկանց սպանել ու հարյուրավոր մարդկանց հրազենային մարմնական վնասվածք պատճառել մի սահմանափակ տարածքի մեջ, հարյուրավոր ոստիկանների ու հատուկ ծառայողների աչքի առաջ ու որևէ դեպք չբացահայտել», -այսօր նման հայտարարություն արեց ԱԺ ՀԱԿ խմբակցության պատգամավոր Գագիկ Ջհանգիրյանը:

Նա ԱԺ պետաիրավական հարցերի մշտական հանձնաժողովի այսօրվա նիստում ներկայացրեց մարտյան դեպքերի վերաբերյալ ԱԺ ժամանակավոր հանձնաժողով ստեղծելու մասին ՀԱԿ խմբակցության որոշման նախագիծը:

Նախկին զինդատախազը տարօրինակ է համարում այն, որ թեև մարտի 1-2-ի դեպքերով մեղադրանք է առաջադրվել ու այնուհետև ազատազրկման են դատապարտվել համաժողովրդական շարժման տասնյակ ներկայացուցիչների, բայց նրանք չեն մեղադրվել ոչ սպանությունների, ոչ պայթուցիկ սարքերով մարմնական վնասվածքներ հասցնելու համար:

«2008-ի մարտի 1-2-ի ընթացքում կատարված հանցագործությունների բացարձակ մեծամասնությունը բացահայտված չէ, և հանցագործները մնացել են անպատիժ», -նկատեց Ջհանգիրյանը:

Ավելին, մարտի 1-2 դեպքերի բացահայտմանը նոր թափ հաղորդելու մասին Սերժ Սարգսյանի համապատասխան հանձնարարությունից հետո էլ ոչ մի առաջընթաց չի արձանագրվել:  «Ես պրակտիկայից մի բան ասեմ` եթե պետության ղեկավարները հանձնարարում են ինչ-որ հանցագործություններ անմիջապես բացահայտել, և մեր դատախազությունը և իրավապահները չեն կարողանում կատարել այդ հանձնարարությունները, ապա նանք առնվազն պետք է հեռացվեին զբաղեցրած պաշտոններից, կարգապահական կամ այլ պատասխանատվության պետք է ենթարկվեին: Սակայն մեզ մոտ հակառակն է ստացվում. տարբեր տոների կապակցությամբ այդ չբացահայտածները արժանանում են մեդալների ու պարգևատրումների», -հայտարարեց պատգամավորը:

Հատուկ քննչական ծառայության քննիչների խմբի գործունեությունը թույլ է տվել նրան ենթադրելու, որ «ՀՔԾ-ն ու գլխավոր դատախազությունը շահագրգռված չեն բացահայտել և պարտակում են թե կոնկրետ հանցագործությունները կատարողներին և թե մարտի 1-2-ի բուն կազմակերպողներին»: Նա առնվազն տարօրինակ է համարում այն, որ քննչական գործողություն իրականացրած խումբը անտեսել է Փաստահավաք խմբի երկու զեկույցները, առավել ուսումնասիրություն չի կատարել պարզելու` ինչու է բանակը մասնակցել Երևանում այդ օրերին կատարած գործողություններին:

«Տասը տարի զինդատախազ եմ եղել և պաշտոնապես հայտարարում եմ` երբ երկրի ներսում քաղաքական իրադարձություններ, ընտրություններ են տեղի ունենում, սահմանային շրջաններն են ամրապնդվում, այլ ոչ թե հակառակը սահմանամերձ շրջաններից զինվորականներ գործուղում քաղաք», -նշեց նախկին զինդատախազը:

ԱԺ ՀԱԿ խմբակցության առաջարկած մարտյան դեպքերի հետ կապված ԱԺ ժամանակավոր հանձնաժողով ստեղծելու մասին որոշման նախագծի վերաբերյալ ԱԺ պետաիրավական հարցերի մշտական հանձնաժողովը քննարկումը կշարունակվի և վերջնական որոշումը կհրապարակի երկուշաբթի, դեկտեմբերի 3-ի առավոտյան: Հանձնաժողովի նախագահ Դավիթ Հարությունյանը հայտարարեց, որ պատգամավոր Գագիկ Ջհանգիրյանի հրապարակած տեղեկությունների հետ կապված իր մոտ հարցեր են առաջացել, որոնք ուղղված են Հատուկ Քննչական ծառայությանը: «Եթե հարցեր լինեն, կդիմենք նաև կառավարությանը», -հավելեց նա:

Բացի այդ, պետաիրավական հարցերի մշտական հանձնաժողովի անդամ երկու պատգամավորներ` Էդմոն Մարուքյանն ու Տիգրան Ուրիխանյանը այսօր նիստից բացակայում էին և պետք էր նրանց ևս հնարավորություն տալ մասնակցել ու իրենց դիրքորոշումը հայտնել: Նշենք, որ այս երկու պատգամավորները կողմ են ՀԱԿ խմբակցության նախաձեռնությանը: Նախագծին կողմ է նաև հանձնաժողովում «Ժառանգություն»-ը ներկայացնող պատգամավոր Զարուհի Փոստանջյանը:

Հարակից լուրեր. Մարտյան դեպքերի վերաբերյալ ՀԱԿ նախաձեռնության քննարկումը կշարունակվի դեկտեմբերի 3-ին

Գագիկ Ջհանգիրյանը հստակեցրել է` ինչով է զբաղվելու մարտյան դեպքերի համար առաջարկվող հանձնաժողովը

Մարտյան զոհերի հարազատները Ազգային ժողովում են