«Ժողովուրդի» դեմ հայց. «Յուրաքանչյուր անձ իրավասու է վերականգնել իր խախտված իրավունքը»
«Ժողովուրդ» օրաթերթի դեմ ներկայացված հայցով Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի կողմից կիրառված հայցի ապահովման միջոց` գույքի վրա արգելանք դնելու որոշման կապակցությամբ, այսօր բողոքի ակցիա էին կազմակերպել մի շարք լրագրողներ, քաղաքական ու հասարակական գործիչներ: Ինչպես տեղեկացնում են ՀՀ դատական դեպարտամենտի Միջազգային համագործակցության և հասարակայնության հետ կապերի ծառայությունից, Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի նախագահ Ռուբեն Վարդազարյանի առաջարկությամբ այսօր կազմակերպվել է ընդունելություն, որին մասնակցել են «Ժողովուրդ» օրաթերթի գլխավոր խմբագիր Թագուհի Թովմասյանը և նույն օրաթերթի լրագրող Սոնա Գրիգորյանը:
Ըստ աղբյուրի` դատարանի նախագահը, ով ՀՀ դատական օրենսգրքի 25-րդ հոդվածի 1-ին մասի համաձայն ապահովում է դատարանի բնականոն գործունեությունը, ներկայացնում է դատարանն այլ մարմինների հետ հարաբերություններում և այլ գործառույթներ, լսելով ընդունելության մասնակիցների մտահոգությունները` տվել սպառիչ պարզաբանումներ: Ռուբեն Վարդազարյանը մասնավորապես նշել է, որ դատարանի կողմից գույքի վրա դրված արգելանքը չի կարող խոչընդոտել խմբագրության բնականոն գործունեությունը, քանի որ խմբագրությունն ազատ է օգտագործել, տիրապետել և տնօրինել իր դրամական միջոցները, ինչպես նաև օգտագործել և տիրապետել գույքը: Նա մանրամասն պարզաբանել է հայցի ապահովման դատավարական ինստիտուտի էությունը, հիմքերը, միջոցներն ու կիրառման կարգը և նշել, որ ճիշտ չէ Թագուհի Թովմասյանի այն կարծիքը, թե հայցի ապահովման հարցը քննվել է նախնական նիստի ընթացքում, որի մասին տեղեկացված չէր: Պարզաբանվել է, որ հայցի ապահովում կիրառելու մասին միջնորդությունները քննարկվում են առանց դատական նիստ հրավիրելու, ինչը բխում է հայցի ապահովման ինստիտուտի էությունից ու նպատակից: Իրենց գործով նախնական դատական նիստը հրավիրված է 2013թ. մարտի 22-ին, իսկ մինչ օրս այդ գործով դատարանը որևէ նիստ չի հրավիրել:
Թագուհի Թովմասյանը փաստել է, որ ներկայումս իր ղեկավարած խմբագրության գործունեությունը որևէ կերպ չի խոչընդոտվել, սակայն մտավախություն ունի, որ Արդարադատության նախարարության դատական ակտերի հարկադիր կատարման ծառայությունը կարող է յուրաքանչյուր պահի մտնել խմբագրություն և արգելանքի դրված գույքը առգրավվել:
«Դատարանի նախագահը մանրամասն ներկայացրել է այն իրավանորմերը, որոնցով յուրաքանչյուր անձ իրավասու է իր խախտված իրավունքը վերականգնելու պահանջով դիմել դատարան: Այն դեպքում, երբ հետագայում կկարծեն, որ պետական մարմնի գործողությամբ կամ անգործությամբ թույլ է տրվել իրենց իրավունքների խախտում, ապա կարող են դիմել դատարան` խախտված իրավունքները վերականգնելու պահանջով», - ասված է հաղորդագրության մեջ:
Նախորդող լուր` Մեկնարկեց երթ` ի պաշտպանություն «Ժողովուրդ» օրաթերթի
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
