Ձեր վստահելի աղբյուրը

Սահմանադրական դատարանին ներկայացրած Ձեր դիմումի մեջ ո՞ր փաստարկներն են ավելի շատ` Րաֆֆի Հովհաննիսյանին հաղթած թեկնածու համարելու մասին փաստարկնե՞րը, թե ընտրությունների արդյունքները անվավեր համարելու մասին փաստարկները: Այսօր Սահմանադրական դատարանում ընթացող նիստում նախագահի նախկին թեկնածու Րաֆֆի Հովհաննիսյանի ներկայացուցիչ Կարեն Մեժլումյանին հարցրեց ՍԴ անդամ, գործով զեկուցող նշանակված Կիմ Բալայանը:

Վերջինն ասաց, որ դատարանը ցանկանում է կողմնորոշվել` ի վերջո որ փաստարկներն են ավելի գերակշռում, քանի որ ՍԴ-ից Հովհաննիսյանը պահանջում է կամ անվավեր ճանաչել ընտրությունների արդյունքները, կամ հաղթած թեկնածու համարել Րաֆֆի Հովհաննիսյանին:

Կարեն Մեժլումյանն ի պատասխան ասաց, որ երկու փաստարկներն էլ հավասար ներկայացված են և այդ պատճառով էլ իրենք դիմումի մեջ նշել են երկու պահանջները միաժամանակ:

ՍԴ անդամ Արևիկ Պետրոսյանը հետաքրքրվեց, թե արդյոք Րաֆֆի Հովհաննիսյանը բավարարվա՞ծ է 1009 ընտրատեղամասերում ունեցած իր վստահված անձանց աշխատանքներով: Նշենք, որ ընտրատեղամասերի ընդհանուր թիվը եղել է 1988:

Մեժլումյանը պատասխանելով ասաց, որ եղել են ընտրատեղամասեր, որոնցում վատ են աշխատել վստահված անձինք, եղել են տեղամասերում, որտեղ նրանց նկատմամբ ճնշումներ են գործադրվել: «Այն տեղամասերում, որտեղ լավ են աշխատել Րաֆֆի Հովհաննիսյանը լավ արդյունքներ է ունեցել», -հավելեց Կարեն Մեժլումյանը:

Պատասխանը լրացրեց Հովհաննիսյանի մյուս ներկայացուցիչ Զարուհի Փոստանջյանը և ասաց, որ որևէ արդյունավետ մեխանիզմներ չեն գործել այդ օրերին ու եղած բողոքներին ընտրատեղամասային հանձնաժողովներում ընթացք չի տրվել:

Նշենք, որ ՍԴ-ում պատասխանող կողմը ներկայացված է ԿԸՀ-ն` ի դեմս ԿԸՀ նախագահ Տիգրան Մուկուչյանի: Որպես երրորդ կողմ խնդրել է գործով ներգարվվել թեկնածու Սերժ Սարգսյանին, և նրան այստեղ ներկայացնում են Հրայր Թովմասյանն ու Դավիթ Հարությունյանը:

Նախորդող նորությունը՝ ՍԴ-ն մերժեց Ա. Ղուկասյանի միջնորդությունը