Կալանքի տակ գտնվող երկու անչափահասների մայրը դատարան է հրավիրում ՄԱՊ-ի Ալիկին
Առանձնապես խոշոր չափի յուրացում կատարելու համար մեղադրվող անհատ ձեռնարկատեր Սիլվա Խաչատրյանը, որը երկու անչափահաս երեխաների մայր է և իր 86-ամյա մոր միակ խնամողը, հացադուլ է հայտարարել ու դժգոհում է իր նկատմամբ իրականացվող քրեական հետապնդումից:
Սիլվա Խաչատրյանին մեղադրանք է առաջադրվել այն բանի համար, որ նա 2005-ից հանդիսանալով ֆիզիկական անձ, բանավոր պայմանավորվածության համաձայն, մինչև 2009-ի մայիսի 6-ը իրականացրել է «ՄԱՊ» ՓԲ ընկերության կողմից արտադրված և իրեն վստահված տարբեր տեսակի գինիների, կոնյակների և պահածոների առաքում ԼՂՀ-ի տարածքում: Իսկ 2009-ի մայիսի 11-ից արդեն անհատ ձեռնարկատեր Սիլվա Խաչատրյանի և ՄԱՊ ընկերության միջև կնքվել է ապրանքների մատակարարման պայմանագիր և համապատասխան հաշիվ-ապրանքագրերով իրեն վստահված ապրանքները մինչև 2011-ի վերջ Ս. Խաչատրյանը կրկին վաճառել է ԼՂՀ-ի տարածքում: Այդ ժամանակահատվածում, ըստ մեղադրական եզրակացության, Սիլվա Խաչատրյանը ընկերության գույքը շարունակաբար հափշտակելու դիտավորությամբ վաճառքից ստացված ապրանքների` առանձնապես խոշոր չափի հասնող 32, 935.1 հազ. ՀՀ դրամ գումարը չի մուտքագրել դրամարկղ, այլ ՓԲԸ-ին ցույց է տվել, որպես չվաճառված ապրանք և նշված գումարը վատնելու եղանակով, հափշտակելով ծախսել է իր անձնական կարիքների համար: Այսինքն` Սիլվա Խաչատրյանը մեղադրվում է ՀՀ քր. օր-ի 179 հոդվածի 3-րդ մասի 1-ին կետով՝ «խոշոր չափի յուրացում» նախատեսված հանցանքի կատարման մեջ:
Սակայն Սիլվա Խաչատրյանի պաշտպան Գեղամ Հակոբյանը Panorama.am-ի թղթակցի հետ զրույցում նկատեց, որ անհատ ձեռնարկատեր Սիլվա Խաչատրյանի և «ՄԱՊ» ՓԲԸ-ի հարաբերությունները հիմնված են մատակարարման պայմանագրի վրա և դրանք կրում են զուտ քաղաքացիաիրավական բնույթ, Սիլվա Խաչատրյանը որևէ հարցում չի թերացել: «Առկա փաստերով որևէ կերպ չէր կարող քրեական գործ հարուցվել և մեղադրանք առաջադրվել: Սակայն նախաքննական մարմինը և դատախազությունը ակնհայտ «ծառայություններ» են մատուցել ու ծայրահեղ միջոցներ են ձեռնարկում` ՄԱՊ ընկերության սեփականատերերին դուր գալու համար»,- նկատեց պաշտպանը:
Արմավիրի մարզի ընդհանուր իրավասության դատարանի վարույթում մարտի 15-ին շարունակվել է ՄԱՊ ընկերության բողոքի հիման վրա Սիլվա Խաչատրյանի գործի քննությունը: Գեղամ Հակոբյանը մեզ հետ զրույցում ասաց, որ Սիլվա Խաչատրյանը դատական քննության ընթացքում միջնորդություն է ներկայացրել ԱԺ պատգամավոր Ալեքսանդր Պետրոսյանին, որը առավել հայտնի է ՄԱՊ-ի Ալիկ անունով, դատարան հրավիրելու և որպես վկա հարցաքննելու, քանի որ ըստ Խաչատրյանի, այս գործում «միակ ազնիվ մարդը պարոն Պետրոսյանն» է: «Իսկ ՄԱՊ ընկերության մնացած աշխատակիցները իր գլխին սարքում են, նաև թալանում ու խաբում են պարոն Պետրոսյանին, նրան կեղծ տվյալներ են ներկայացնում, որի վերաբերյալ ունի բազմաթիվ փաստեր: Բոլոր պայմանավորվածությունները եղել են Ա. Պետրոսյանի հետ ու միայն նա կարող է հաստատել իր անմեղությունը», փաստաբանի ներկայացմամբ, դատարանում հայտարարել է անչափահաս երեխաների կալանավորված մայրը:
Գեղամ Հակոբյանի խոսքով, տիկին Խաչատրյանը միաժամանակ դատարան է ներկայացրել դիմում, որով պաշտոնապես հայտարարել է հացադուլ, որում մասնավորապես նշել էր. «Ի նշան իմ նկատմամբ իրականացվող ակնհայտ ապօրինի քրեական հետապնդման և անհիմն կալանավորման, այսօրվանից հայտարարում եմ հացադուլ»: Միաժամանակ հայտնել է, որ երկու անչափահաս երեխաները և անկողնային հիվանդ մայրը մնացել են փողոցում, քանի որ բանկին ունեցած պարտքի պատճառով, իրենց տունը աճուրդով վաճառել են ու ընտանիքի անդամներին վտարել: Իր խնդրանքով ընտանքի անդամները տեղավորվել են ընկերուհու տանը, սական արդեն մի քանի օր է ինչ տղան անհայտ կորած է ու նրա մասին որևէ լուր չկա, իսկ 16 տարեկան աղջիկը մնացել է բախտի քմահաճույքին, որից հետո անիմաստ է իր ապրելը, մանավանդ, որ դատախազությունը չի ցանկանում աչքերը բացել ու տեսնել ճշմարտությունը:
Գեղամ Հակոբյանի խոսքով, մեղադրողը չի առարկել պատգամավորին դատարան հրավիրելու միջնորդության դեմ: «Բայց նախագահող դատավոր Արթուր Ադամյանը ակնհայտ խուճապի մատնվեց ու Ազգային ժողովի պատգամավորին դատարան հրավիրելու վերաբերյալ միջնորդությունը չքննարկեց ու որոշում կայացնելու համար դատական նիստը հետաձգեց», -փոխանցեց փաստաբանը:
Այս գործով դատական հաջորդ նիստը նշանակվել է մարտի 22-ին:
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
