Լրագրողական կազմակերպությունները դատապարտում են լրագրողի դեմ կատարվածը և պահանջում պատժել մեղավորներին
Լրագրողական մի քանի կազմակերպություններ այսօր հայտարարություն են տարածել, որով դատապարտում են ապրիլի 23-ին լրագրող Հակոբ Կարապետյանի նկատմամբ տեղի ունեցած բռնությունը:
Հայտարարության մեջ նշվում է հետևյալը.
«2013 թվի ապրիլի 23-ին, ժամը 17:30-ի մոտ iLur.am կայքի լրագրող Հակոբ Կարապետյանը Երեւանի Նորքի 8-րդ զանգվածի բակերից մեկում լուսաբանելիս է եղել Տարոն Մարգարյանի քարոզարշավը, երբ մի քանի հոգի նրանից պահանջել են դադարեցնել նկարահանումները: Լրագրողը բացատրել է, որ իր մասնագիտական պարտականությունն է կատարում: Ըստ լրագրողի, Երեւանի ավագանու ՀՀԿ-ական անդամ, ավագանու թեկնածու Աշոտ Պապայանը մոտեցել է իրեն եւ հայհոյելով սկսել է հարվածել լրագրողին:
Նրան են միացել էլի մի քանի հոգի, սկսել են քաշքշել եւ նույնպես հարվածել: Միջադեպին ներկա եւ ականատես է եղել ոստիկանության մի մայոր, սակայն որեւէ մեկը չի կասեցրել լրագրողի նկատմամբ գործադրվող բռնությունը: Այդ մարդիկ լրագրողի ձեռքից խլել են ֆոտոխցիկը: Քիչ անց մեկը վերադարձրել է ֆոտոխցիկը, որի միջից մաքրված են եղել բոլոր նկարահանած նյութերը:
Մենք, ներքոստորագրյալ կազմակերպություններս, դատապարտելով լրագրողի նկատմամբ կատարված այս հարձակումը և բռնությունը, պահանջում ենք իշխանություններից պատժել մեղավորներին և ձեռնարկել համապատասխան միջոցներ` հետագայում նման վայրագությունները կանխելու նպատակով:
Չպատժելու որեւէ արդարացում անընդունելի է, քանի որ ակնհայտորեն այս հանցագործության բացահայտելը որեւէ դժվարություն իրենից չի ներկայացնում: Եթե այս հանցագործությունը անհետեւանք մնա, ոստիկանության ղեկավարության բազմաթիվ հայտարարությունները իրենց քաղաքական չեզոքության մասին դատարկ խոսքերի շռայլում կհամարենք»:
Հայտարարության տակ ստորագրել են հետևյալ կազմակերպությունները`
Լեւոն Բարսեղյան, Ժուռնալիստների «Ասպարեզ» ակումբ
Էդիկ Բաղդասարյան, «Հետաքննող լրագրողներ» ՀԿ
Բորիս Նավասարդյան, Երեւանի մամուլի ակումբ
Նունե Սարգսյան, «Ինտերնյուս» մամուլիս աջակցության ՀԿ
Աշոտ Մելիքյան, Խոսքի ազատության պաշտպանության կոմիտե
Սուրեն Դեհերյան, «Լրագրողներ hանուն ապագայի» ՀԿ
Թեմային առնչվող հրապարակումներ. Լրագրողի վրա կատարված հարձակման գործով ոստիկանության Նոր Նորքի բաժնի պետի տեղակալն ազատվել է աշխատանքից
«Կարող ա՞ վաղն ինձ զրպարտանքի մեջ մեղադրեն». Լրագրողը պատմել է կատարվածը
Ոստիկանությունը` լրագրողի նկատմամբ կատարված հարձակման մասին
Լրահոս
Տեսանյութեր
Ինչո՞ւ հանկարծ ՀՀ իշխանությունները որոշեցին խլել արցախցիների կենսաթոշակային խնայողությունները
