Ձեր վստահելի աղբյուրը

Հայրիկյանի նկատմամբ մահափորձի գործով նախաքննության ընթացքում որոշ գործառույթներ, որոնք պետք է իրականացվեին, չեն իրականացվել: Այսօր Կենտրոն և Նորք Մարաշ վարչական շրջանների ընդհանուր իրավասության դատարանում «էպոսագետ» Վարդան Սեդրակյանի և մյուսների դատական կարճատև նիստից հետո հայտարարեց Պարույր Հայրիկյանի պաշտպան Լևոն Բաղդասարյանը:

Նա միևնույն ժամանակ չմատնանշեց, թե մասնավորապես ինչ չի իրականացվել նախաքննության ընթացքում: «Դրանց մասին կիմանաք դատաքննության ժամանակ: Իսկ ընդհանուր առմամբ օպերատիվ-քննչական գործառույթներից իմ կողմը գոհ է», -հավելեց Հայրիկյանի պաշտպանը:

Դատական նիստերին Հայրիկյանի մասնակցության մասին Բաղդասարյանը հստակ ոչինչ չասաց և նկատեց, որ եթե արտերկրում բուժումն արդյունավետ անցնի, ապա Հայրիկյանը կարող է մասնակցել նիստերին:

Այժմ, փաստաբանի խոսքով, Հայրիկյանի առողջական վիճակը բավարար է:

Ավելի վաղ Panorama.am-ը տեղեկացրել էր, որ Կենտրոն և Նորք Մարաշ վարչական շրջանների ընդհանուր իրավասության դատարանում «էպոսագետ» Վարդան Սեդրակյանի և նույն գործով Խաչատուր Պողոսյանի ու Սամվել Հարությունյանի այսօր մեկնարկած դատավարությունը կարճ տևեց. Խաչատուր Պողոսյանը պաշտպան չուներ: Նիստը նախագահող դատավոր Գագիկ Պողոսյանի որոշմամբ, դատական նիստը հետաձգվեց մինչև մայիսի 20-ը` հնարավորություն տալով Պողոսյանի պաշտպանության գործին ներգրավվել Հանրային պաշտպանի գրասենյակից որևէ փաստաբանի:

Նշենք, որ Վարդան Սեդրակյանին մեղադրանք է առաջադրվել այն բանի համար, որ նա, առաջադրվելով 2013 թվականի փետրվարի 18-ին կայանալիք ընտրություններում ՀՀ Նախագահի թեկնածու, քարոզարշավի րնթացքում, իր մտերիմներ Սամվել Հարությունյանին և Խաչատուր Պողոսյանին 2013 թվականի հունվարի սկզբներին պատվիրել է «Ազգային Ինքնորոշում Միավորում» կուսակցության առաջնորդ, ՀՀ Նախագահի մեկ այլ թեկնածուի, քաղաքական գործիչ Պարույր Արշավիրի Հայրիկյանի սպանությունը, նրա քաղաքական գործունեությունը դադարեցնելու նպատակով, որն իրականացնելու նպատակով զենք ձեռք բերելու համար հանցակիցներին է տվել 1000 ԱՄՆ դոլար, ինչը Խաչատուր Պողոսյանը և Սամվել Հարությունյանը հավասարապես կիսել են միմյանց միջև։ Սակայն ծրագրված հանցագործությունն իրականացնելու համար Խաչատուր Պողոսյանն օգտագործել է իր կողմից 1995-1996 թվականներին ապօրինի կերպով ձեռք բերված և պահված 1941թ. գործարանային արտադրության 7,62մմ տրամաչափի «HG 201» համարի «Նագան» տեսակի թմբուկավոր ատրճանակը։

«Էպոսագետի» նիստը դեռ չմեկնարկած հետաձգվեց. Սեդրակյանը բարձր տրամադրություն ուներ (լուսանկարներ)