Ձեր վստահելի աղբյուրը

«Ես մի քանի տարի առաջ իմ գործընկերների նեղ շրջանակում ասել եմ, որ չեմ ցանկանում դառնալ փաստաբանների պալատի նախագահ ու չեմ էլ ցանկանալու», -այսօր Փաստաբանների պալատի շուրջ 200 փաստաբանների կազմակերպած բողոքի ակցիայի ժամանակ` պատասխանելով Panorama.am-ի հարցին, հայտարարեց ՓՊ անդամ Հայկ Ալումյանը:

Այժմ Փաստաբանների պալատի նախագահը Ռուբեն Սահակյանն է, և առաջիկա հոկտեմբերին սպասվում են Պալատի նոր նախագահի ընտրություններ: Տարբեր աղբյուրներ պնդում էին, որ փաստաբանների ակցիան կազմակերպելով` Հայկ Ալումյանը հավակնություններ ունի ՓՊ նախագահի պաշտոնում առաջադրվելու համար:

«Ես սիրում եմ փաստաբանություն, այսինքն, եթե նկարիչը սիրում է նկարել, ինքը նկարում է, այլ ոչ թե ձգտում դառնալ Նկարիչների միության նախագահ, կամ եթե ֆուտբոլիստը սիրում է ֆուտբոլ խաղալ ինքը չի ձգտում դառնալ Ֆուտբոլի ֆեդերացիայի նախագահ, ինքն ուղղակի խաղում է ու գոլեր է խփում: Իմ մոտ այդպես է: Եվ եթե նույնիսկ իմ ընկերների մոտ ասածի համար փոշմանել եմ, ապա իմ տված խոսքն այնքան մեծ արժեք ունի, որ երբեք իմ ասածը չէի փոխի», -հայտարարեց Հայկ Ալումյանը:

Մեր մյուս հարցին, թե ինչու ի տարբերություն նախորդ տարվա փաստաբանների ակցիայի, այս անգամ Փաստաբանների պալատի նախագահ Ռուբեն Սահակյանը չի պաշտպանում 200 փաստաբաններին, Ալումյանն ասաց, որ նա էլ իրենց հետ համակարծիք է եղել և ուղղակի պայքարի ձևերի հարցում են տարաձայնությունները եղել: «Մեզ մոտ կարծիքների տարբերություն չկա կապված Վճռաբեկ դատարանի գործունեության գնահատականի հետ: Մենք բոլորս էլ նույն գնահատականներն ենք տալիս: Մեզ մոտ կա տարաձայնություն բացառապես մի հարցում` ինչպիսի եղանակով հասնել այս անօրինականությունների վերացմանը», -հավելեց փաստաբան Հայկ Ալումյանը:

Նրա ներկայացմամբ, փաստաբանների մի մասն առաջարկել է սպասել մինչև սեպտեմբեր, իսկ մյուս մասն էլ որոշել է դիմել այդ քայլին, որովհետև իրավիճակն անհույս է ու պետք էր ոտքի կանգնել:

«Մենք կարծեցինք, որ մեկ տարի արդեն անցել է ու պետք է ամփոփել, թե ինչ տեղի ունեցավ այս մեկ տարվա մեջ: Մեր մեջ թիրախի առումով տարբերություն չկա, ուղղակի մենք ուրիշ եղանակ ենք տեսնում այդ թիրախին հարվածելու համար, իսկ նրանք` ուրիշ», -հավելեց Հայկ Ալումյանը:

Այսօր առավոտից շուրջ 200 քաղաքացիական և քրեական գործերով զբաղվող փաստաբաններ չեն ներկայացել դատական նիստերի: Դատադուլը շարունակվելու է նաև վաղը` հունիսի 11-ին:

«Մենք մի ջերմաչափ ենք, որը արձանագրում է, որ հիվանդն ունի 42 աստիճան տաքություն, և մենք կարծում ենք, որ հիվանդի համար կարևոր է, թե ինչքան է իր ջերմաստիճանը, հիվանդին մենք ասում ենք, որ ունի այսքան ջերմաստիճան: Դրանից հետո թե հիվանդն ինչ քայլերի կդիմի, դա արդեն մնում է իր խղճին», -հավելեց Ալումյանը` հույս հայտնելով, որ հիվանդը իր ջերմաստիճանի վրա ուշադրություն կդարձնի և ջանքեր կգործադրի առողջանալու համար:

 Թեմային առնչվող. Հունիսի 10-ին նոր գործադուլ. Փաստաբանները դարձյալ ոտքի են կանգնում

Փաստաբանների թիրախը պետք է լինի Վերաքննիչ դատարանը. Դիտարկումներ երկօրյա դատադուլից առաջ