Ձեր վստահելի աղբյուրը

Վայոց Ձորի մարզպետարանի գյուղատնտեսության և բնապահպանության վարչության նախկին պետ, այժմ կալանքի տակ գտնվող Բաբկեն Մկրտչյանի փաստաբանը հունիսի 24-ին բողոքարկել է իր պաշտպանյալի խափանման միջոցը կալանքն ընտրելու մասին որոշումը: Բաբկեն Մկրտչյանը, Հատուկ քննչական ծառայության պաշտոնական տեղեկության համաձայն, կալանավորվել է 2012 թվականին ՀՀ հողօգտագործողներին մատչելի գներով դիզելային վառելանյութ տրամադրելու գործընթացում պաշտոնեական կեղծիք կատարելու և պաշտոնեական դիրքը չարաշահելու մեղադրանքով: Նրա նկատմամբ առաջադրվել է մեղադրանք՝ ՀՀ քրեական օրենսգրքի 308-րդհոդվածի 2-րդ մասով, 314-րդ հոդվածի 1-ին մասով:

Մարպետարանի պաշտոնյան, սակայն, մասնակի է ընդունում իրեն առաջադրված մեղադրանքը և ասում է, որ կատարել է այդ ժամանակների Վայոց Ձորի մարզպետ Սերգեյ Բագրատյանի հանձնարարությունները: Բաբկեն Մկրտչյանի կինը՝ տիկին Գոհարը և մի քանի հարազատներ Panorama.am-ի թղթակցի հետ զրույցում պնդում էին, որ նա ինքնագործունեությամբ չէր կարող զբաղվել ու կատարել է նախկին մարզպետի հրամանները: 

Այժմ «Նուբարաշեն» քրեակատարողական հիմնարկում գտնվող Բաբկեն Մկրտչյանը, ով Հանրապետական կուսակցության անդամ է, 60 տարեկան է, սրտի հետ կապված խնդիրներ ունի: Վայոց Ձորի մարզպետարանում որպես գյուղատնտեսության և բնապահպանության վարչության պետ աշխատել է մի քանի մարզպետների ղեկավարությամբ, սակայն, ինչպես բարեկամներն են պնդում, նման բան չի եղել: «Ոչ մեկ չի կարող ապացուցել, որ չարաշահումներ կամ յուրացումներ է արել, որովհետև մենք համեստ կենցաղով ենք ապրել», -ասում է կինը: 

«Բարգավաճ Հայաստան» կուսակցության անդամ, Վայոց Ձորի նախկին մարզպետ Սերգեյ Բագրատյանը, նրա խոսքով, կանչվել է Հատուկ քննչական ծառայություն և Բաբկեն Մկրտչյանի հետ առերեսման ժամանակ համաձայնել է նրա տված ցուցմունքների հետ: «Նա 80 տոկոսով համաձայնել է, որ իմ ամուսինը կատարել է իր հանձնարարությունը: Բաբկենն ասել է, որ ինքն անփույթ է եղել մարզպետի հանձնարարությունները կատարելիս: Այդ մասով ինքն ընդունում է իր մեղքը: Ասում են, թե գլխից են բռնում, բայց այդպես չի: Եթե իրանք մտածում են, որ գյուղվարչության պետին, որպես զոհ, որը թիկունք չունի քաղաքական, կարող են տանեն շատ հանգիստ տանեն-փակեն, շատ սխալ է, անարդար է », -նկատեց կինը՝ ընդգծելով, որ եթե արդար քննություն չկատարվեց, իրենք բողոքելու են ընդհուպ մինչև նախագահին:

Մեզ հետ զրուցած Բաբկեն Մկրտչյանի հարազատնեը, ինչպես նաև տիկին Գոհարը, պնդում են, որ գյուղապետեր և մարզպետ շղթայի մեջ, վարչության պետն այն մարդը չէր, որ պետք է կալանավորվեր: «Իմ ամուսինը կատարել է այդ հանձնարարությունը՝ որպես պետական պաշտոնյա: Հայաստանում բոլոր պետական պաշտոնյաները կատարում են իրենց վերադասի հանձնարարությունը: էդ ո՞նց էղավ, որ ով ստացել ա ինքը դրսում ա, ով հանձնարարել ա, դրսում ա, իսկ էդ հանձնարարությունը փոխանցողը ներսում ա: Ամենաթույլ օղակն են գտել: Ես չեմ ուզում, որ ինչ-որ մեկը պատժվի, բայց չեմ ուզում, որ իմ ամուսինը զոհ լինի, ու չգիտես` ինչի համար», -տարակուսած է կալանավորված նախկին պաշտոնյայի կինը:

Նրանց խոսքով, պետությանը հասցված վնասը կազմել է շուրջ 17 մլն դրամ: «Բայց այդ թվերը ուռճացված են, և այդ վառելիքը ծախելու դեպքում է, այդքան գումար չի կանգնում, կեսը հազիվ կանգնի», -հավելեց մեր զրուցակիցը: 

Ավելի վաղ ոստիկանության Կազմակերպված հանցավորության դեմ պայքարի գլխավոր վարչության կոռուպցիայի և տնտեսական գործունեության դեմ ուղղված հանցագործությունների հակազդման վարչության պետի տեղակալ Գ. Դալիջանյանը տեղեկացրել էր, որ Վայոց Ձորի շուրջ 10 համայնքների ղեկավարներ կեղծ տեղեկություններ են ներկայացրել մարզպետարանի գյուղվարչություն, ներկայացրել են վառելիք ստացող շահառուների վերաբերյալ կեղծ հաշվետվություններ, ինչի արդյունքում բնակչության համար նախատեսված 174 հազարից ավել լիտր դիզվառելիքը չի բաշխվել:

«Սուբսիդավորման համար նախատեսված շուրջ 15 մլն 373 800 դրամ գումարը չարաշահվել է մարզպետարանի պաշտոնյաների կողմից», -ասել էր ոստիկանության պաշտոնյան:

Երկար ժամանակ, մինչ պաշտոնական աղբյուրները տեղեկացնում էին, որ Բագրատյանին վերաբերող քրեական գործ է հարուցվել, Վայոց Ձորի նախկին մարզպետը համառորեն հերքում էր և ասում, որ ինքն առնչություն չունի դրա հետ:

Առնչվող հրապարակումներ. Վայոց Ձորի նախկին մարզպետի օրոք յուրացվել է 15 մլն-ից ավել գումար. Նոր մանրամասներ (տեսանյութ)

Սերգեյ Բագրատյանը շարունակում է հերքել իրեն առնչվող քրեական գործի մասին լուրը

ԲՀԿ-ականը ստո՞ւմ է. Ըստ ՀՔԾ-ի, Սերգեյ Բագրատյանը հարցաքննվել է