Ձեր վստահելի աղբյուրը

Այսօր Վերաքննիչ դատարանում Հայ Ազգային կոնգրեսի ակտիվիստների գործով քննության ժամանակ տղաների պաշտպան Մուշեղ Շուշանյանը, վկաների հարցաքննությունից առաջ, դատարանին միջնորդեց վերացնել Տիգրան Առաքելյանի խափանման միջոցը:

«Տիգրան Առաքելյանը 2011-ի օգոստոսի 9-ից գտնվում է անազատության մեջ: Հարգելի դատարան, ես համարում եմ, որ Տիգրան Առաքելյանին ներկայումս կալանքի տակ պահելու անհրաժեշտություն չկա: Այդպիսի անհրաժեշտություն նախկինում նույնպես չի եղել: Բայց հաշվի առնելով Վճռաբեկ դատարանի որոշումը, ես գտնում եմ, որ այս պահին առավել ևս նրան կալանքի տակ պահելու անհրաժեշտություն», -դիմելով դատարանին հայտարարեց Առաքելյանի ու մյուս ակտիվիստների նոր պաշտպան Մուշեղ Շուշանյանը` նկատելով, որ օգոստոսի 9-ին կլրանա իր պաշտպանյալի ազատազրկման օրացույցային 2 տարին:

Լրացնելով պաշտպանին, Առաքելյանը հիշեցրեց, որ իր հոր մահվան կապակցությամբ երեք օր թույլտվություն է ստացել ու գնացել է տուն և նկատեց. «Հարգելի դատարան, եթե ես ուզենայի, այդ երեք օրվա ընթացքում կթաքնվեի, բայց չեմ արել: Խնդրում եմ դա հաշվի առեք»:

Պաշտպանի միջնորդությանը առարկեց մեղադրող դատախազ Հակոբ Մարտիրոսյանը` հայտարարելով, որ խափանման միջոցը փոխելու հարցին դատավարության այս փուլում անդրադառնալու անհրաժեշտություն չկա:

Նիստը նախագահող դատավոր Եվա Դարբինյանը, սակայն, խորհրդակցական սենյակից վերադառնալուց հետո հայտարարեց, որ պաշտպանի միջնորդությունը ենթակա է մերժման:

Կարդացեք նաև`

Վերաքննիչ դատարանում ՀԱԿ ակտիվիստների գործի քննությունը մեկնարկեց Առաքելյանի ու դատավորի միջև անհամաձայնությամբ