Ձեր վստահելի աղբյուրը

Շիրակի մարզի ընդհանուր իրավասության դատարանում երեկ շարունակվել է Գյումրիի նախկին քաղաքապետ Վարդան Ղուկասյանի դստեր փեսացուի՝ Կարեն Եսայանի սպանության գործով դատավարությունը, որը տևել է մի քանի ժամ:

Ամբաստանյալ, սպանության մեջ մեղադրվող Հարություն Սարգսյանի փաստաբան Լուսինե Սահակյանը լրագրողների հետ առանձին զրույցում անդրադարձել է ՀՀ դատախազության վերջին հայտարարությանը, համաձայն որի քրեական գործ է հարուցված Հ. Սարգսյանին՝ ոստիկանական կառույցներում ծեծի ենթարկելու և նրա մարմնական վնասվածքները թաքցնելու փաստերով, տեղեկացնում է «ԳԱԼԱ»-ն:

Այս քրեական գործը հետաքրքիր է նրանով, որ առնչվում է ՀՀ ոստիկանական համակարգում աշխատող և պատասխանատու պաշտոններ զբաղեցնող երկու անձանց՝ Շիրակի մարզի ոստիկանապետ Կարեն Բաբակեխյանի և Երևան քաղաքի ոստիկանապետ Աշոտ Կարապետյանի հետ:

«Հարություն Սարգսյանի նկատմամբ ինչպես Շիրակի մարզային վարչությունում, այնպես էլ Երևան տեղափոխելուց հետո ձերբակալվածների պահման վայրում ֆիզիկական բռնություն է գործադրվել, և Հարությունը բացատրություն է տվել այն մասին, որ բռնություն գործադրողների թվում եղել է նաև Կարեն Բաբակեխյանը: Ձերբակալվածների պահման վայրում այն անձը, ով բռնություն է գործադրել իր նկատմամբ ինչպես Գյումրիում, այնպես էլ Երևանում, ներկայացել է որպես քրեական հետախուզության վարչության պետ: Նա իհարկե, նկարագրել է տվյալ անձին, ասել է, որ կճանաչի ե՛ւ իրեն, ե՛ւ բռնություն գործադրած այն անձանց, ովքեր դիմակավորված չեն եղել: Հաղորդման հիման վրա նյութեր են նախապատրաստվել»,-հայտարարել է Լուսինե Սահակյանը:

Փաստաբանից լրագրողները հետաքրքրվել են նաև, թե քրեական գործի քննության ավարտից հետո օրենքով սահմանված կարգով ինչ է սպասվում այն ոստիկաններին, ովքեր Հարությունին ծեծի են ենթարկել, արդյո՞ք Վ. Գասպարյանի մատնանշած «մսագործ» ոստիկանները նախատեսվող պատիժը կկրեն, թե՞ ոչ: Լուսինե Սահակյանը պատասխանել է.

«Հարուցվել է քրեական գործ 309-րդ հոդվածի երկրորդ մասի հատկանիշներով՝ պաշտոնատար անձի կողմից իր լիազորությունները անցնելու կապակցությամբ և 315-րդ մասի առաջին կետի հատկանիշներով, քանի որ ձերբակալվածների պահման վայրում Հ. Սարգսյանի վնասվածքները չեն ֆիքսվել, չնայած իրենց պարտականությունն է եղել ֆիքսել: 309-րդ հոդվածի երկրորդ մասը հատկանիշներով՝ 2-6 տարի ազատազրկում է նախատեսված այն անձի համար, ում դատարանը մեղավոր կճանաչի նման հանցանք կատարելու մեջ: Այս գործը մյուսներից տարբերվում է նրանով, որ ակնհայտ է և բազմաթիվ ապացույցներով հիմնավորված է, որ Հարություն Սարգսյանը առանց վնասվածքների եկել է ոստիկանություն, իսկ հետո բազմաթիվ վնասվածքներ են հայտնվել, նաև արտառոց է նրանով, որ մինչև մեր՝ պաշտպանների մուտք գործելը ոչ ոք այդ վնասվածքները չէր ֆիքսել:
Վլադիմիր Գասպարյանը շատ վաղուց, կարծում եմ, որ պետք է տեղյակ լիներ, որ իր ոստիկանները բռնություն են գործադրել կոնկրետ Հարություն Սարգսյանի նկատմամբ, որոնց մասին մենք վաղուց բարձրաձայնել ենք և անհրաժեշտություն չկար հարուցել քրեական գործ, որպեսզի ոստիկանապետը իմանար, որ այդ բռնությունը իրականում տեղի ունեցել է:

Մենք անընդհատ բարձրաձայնել ենք դրա մասին, և նա ոչինչ չի ձեռնարկել, և ես հույսեր էլ չունեմ, որ նրա արտահայտած այդ կարծիքը իրական է, և նա իրականում նպատակ ունի, որպեսզի ոստիկանությունը մաքրի այն անձանցից, ովքեր բռնություն են գործադրում անձանց նկատմամբ: Կոնկրետ Աշոտ Կարապետյանի նկատմամբ, որը ևս, ըստ բացատրությունների, բռնություն է գործադրել իմ պաշտպանյալի նկատմամբ, մենք գիտենք, որ Եվրոպական դատարանը արդեն իսկ որոշում կայացրել է, որտեղ հստակ նշվել է, որ բռնություն գործադրողներից մեկը եղել է Աշոտ Կարապետյանը, բայց բոլորս էլ գիտենք, որ Աշոտ Կարապետյանը նշանակվեց Երևանի ոստիկանապետ, հիմա հավատա՞նք ոստիկանապետին, նա ասում է, որ բռնություն գործադրողը մսագործ է»,-ասել է Լուսինե Սահակյանը:

Նշենք, որ Հարություն Սարգսյանը Անիի տարածաշրջանի նախկին ոստիկանապետ Սամվել Սարգսյանի որդին է:

Կարդացեք նաև՝

Անիի նախկին ոստիկանապետի որդուն ոստիկանությունում ծեծելու փաստի կապակցությամբ քրգործ է հարուցվել