Ձեր վստահելի աղբյուրը

Այս օրերին Հայաստանի Փաստաբանների պալատի փաստաբանները յուրօրինակ ֆլեշմոբ են անում` յուրաքանչյուրն իր ֆեյսբուքյան էջում, ինչպես նաև հայ իրավաբանների ֆեյսբուքյան խմբում գրելով հայտարարությունը ընդդեմ արդարադատության նախարարության օրենսդրական նախաձեռնության և դրա տակ նշում է իր փաստաբանի արտոնագրի համարը:

Հայտարարության տեքստում նշվում է հետևյալը. «Հարգելով փաստաբանի մասնագիտական արժանապատվությունը` ՈՉ ԵՄ ԱՍՈՒՄ` պետական մարմնի կողմից փաստաբանների հաշվառման գրանցամատյան ներդնելու և տարեկան 60.000 (վաթսուն հազար) ՀՀ դրամ պետական տուրք վճարելու պարտականություն նախատեսող` ՀՀ արդարադատության նախարարության կողմից շրջանառության մեջ դրված օրենքների նախագծերին: ՀԱՅՏԱՐԱՐՈՒՄ ԵՄ, որ չեմ հաշվառվելու պետական մարմնի կողմից վարվող գրանցամատյանում և չեմ վճարելու պետական տուրք: ՊԱՀԱՆՋՈՒՄ ԵՄ ՀՀ փաստաբանների պալատից պետական գրանցամատյանում փաստաբանների հաշվառման հետ կապված որևէ գործողություն չիրականացնել»: Այս հայտարարության տակ այնուհետև նշվում է տեքստը գրած փաստաբանի արտոնագրի համարը:

Երեկվանից և նաև այսօր առավոտյան իրենց ֆեյսբուքյան էջերում այս հայտարարությունը տեղադրել են ՓՊ խորհրդի անդամ Կարեն Մեժլումյանը, ՓՊ անդամներ Նարինե Ռշտունին, Գուրգեն Հարությունյանը և ուրիշներ:

Նշենք, որ արդարադատության նախարարության կողմից փաստաբանության և պետական տուրքի մասին օրենքներում փոփոխություններ ու լրացումներ են կատարվել, որոնց համաձայն սահմանվել է փաստաբանների պետական գրանցամատյանը վարելու նոր ընթացակարգ և այդ լիազորությունը վերապահվել է ՀՀ արդարադատության նախարարությանը և բացի այդ, գրանցամատյանում մեկ տարի ժամկետով հաշվառելու համար նախատեսվել է գանձել տարեկան պետական տուրք` 60.000 դրամ: Նախագիծը դեռ քննարկման փուլում է և Ազգային ժողով կհասնի քննարկումներից ու կառավարության կողմից վերջնականապես հաստատվելուց հետո: Փաստաբանների բողոքին ի պատասխան արդարադատության նախարար Հրայր Թովմասյանը հայտարարել էր, թե բնական է փաստաբանների բողոքը, քանի որ ումից էլ գումար վերցնեն, նա կդժգոհի: Բողոքի ձայն բարձրացրին տարբեր մարզերի` Լոռու, Կոտայքի, Արմավիրի մարզի փաստաբանները` ընդգծելով, որ իրենք օրենքով չարգելված բոլոր միջոցներով պայքարելու են, որպեսզի այդ «տոտալիտար»փոփոխությունը կյանքի չկոչվի:

Փաստաբանների պալատի նախագահ Արա Զոհրաբյանի որոշմամբ,փաստաբաններին վերաբերող վիճահարույց օրինագծերի վերաբերյալ քննարկումների, նախագծերի ընդունման դեմ պայքարի համար Պալատի ռազմավարությունը մշակելու նպատակով ստեղծվել էր աշխատանքային խումբ, որի մեջ են մտնում ՓՊ նախագահ Արա Զոհրաբյանը, ՓՊ անդամներ Կարեն Մեժլումյանը, Մելանյա Առուստամյանը, Արմեն Տեր-Տաճատյանը, Լեռնիկ Հովհաննիսյանը, Նիկոլայ Հակոբյանը և Իրինա Փիլոյանը: