Ձեր վստահելի աղբյուրը

Հայաստանի սպորտի և երիտասարդության հարցերի նախարար Յուրի Վարդանյանի որդին` կալանավորված Դավիթ Վարդանյանը հայտարարել է, որ ֆինանսական միջոցներ չունի փաստաբանի վճարովի ծառայությունից օգտվելու համար և այդ պատճառով էլ նրա պաշտպանությունը ստանձնել է Հանրային պաշտպանի գրասենյակի անդամ Ռաֆիկ Սաֆարյանը:

Վերջինը Panorama.am-ի թղթակցի հետ զրույցում հրաժարվեց գործի վերաբերյալ որևէ տեղեկությունը փոխանցել` պատճառաբանելով, թե գործը նախաքննության փուլում է և անօրինական է որևէ տեղեկություն հրապարակելը: Նա նույնիսկ չպատասխանեց հարցին` Դավիթ Վարդանյանը իրեն մեղավոր ճանաչում է, թե ոչ:

Ռաֆիկ Սաֆարյանը մոտ 70 տարեկան է, 40 տարի իրավական դաշտում է աշխատում, իսկ փաստաբանական գործունեությամբ զբաղվում է 19 տարի: Նա քրեական իրավունքի հարցերով է զբաղվում:

Հանրային պաշտպանի գրասենյակի ղեկավար Մասիս Ղազանչյանը մեզ հետ զրույցում ասաց, որ ինքն արձակուրդում է և իրեն փոխարինող տեղակալ Դավթյանն է Սաֆարյանին տվյալ գործով որպես պաշտպան ներգրավելու մասին որոշում կայացրել: «Մենք նշանակում անում ենք ըստ զբաղվածության գրաֆիկի. ով գործեր չունի և տվյալ օրը ազատ է», -մեր խնդրանքով հստակեցրեց Հանրային պաշտպանի գրասենյակի ղեկավարը:

Նա ասաց, որ նախաքննական մարմինը դիմում է ուղարկել հանրային պաշտպանի գրասենյակ, որով դիմել է Դավիթ Վարդանյանի պաշտպանությունը ստանձնելու համար հանրային պաշտպան ներգրավել, քանի որ մեղադրյալը հայտարարել է, որ բավարար ֆինանսական միջոցներ չունի Փաստաբանների պալատի վճարովի ծառայություններից օգտվելու համար:

«Եթե ես չլինեի արձակուրդում չէի նշանակի հանրային պաշտպան` նկատի ունենալով, որ հայրը մինիստր է և ֆինանսական բավարար միջոցներ ունեն պաշտպան հրավիրելու համար», -նկատեց Մասիս Ղազանչյանը:

Նրա խոսքով, վարույթ իրականացնող մարմինը պետք է պատճառաբանված որոշում կայացներ` պարզեր մեղադրյալի գույքային դրությունը և նոր միայն որոշում կայացներ Հանրային պաշտպանի գրասենյակից պաշտպան ներգրավելու մասին:

«Հանրային պաշտպան նշանակվում է միայն այն դեպքում երբ անհրաժեշտ է պաշտպան, սակայն մեղադրյալը բավարար միջոցներ չունի պաշտպանությանվրա գումար ծախսելու համար: Այս դեպքում պետք է պարզեին` հոր հետ է ապրում, թե ոչ: Եթե հոր հետ է ապրում, ապա պետք էր մերժել»,- ասաց Ղազանչյանը՝ նկատելով, որ այդ պատասխանատվությունը հայաստանյան օերնսդրությամբ (ՀՀ Քրեական դատավարության օրենսգիրք) դրված է վարույթ իրականացնող մարմնի վրա:

Ղազանչյանի ենթադրությամբ, նախաքննություն իրականացնող մարմինը հավանաբար դարձյալ օրենսդրությամբ պարտադրվող ժամկետների մեջ է փորձել տեղավորվել և նման որոշում է կայացրել: «Պարզապես պետք է բարոյական առումով նայել` եթե մինիստրի տղային անվճար իրավաբանական օգնություն ենք տրամադրում, ապա ում չենք տրամադրում. էդ նշանակում է, որ ամբողջ Հայաստանին պետք է տրամադրենք», -հավելեց Ղազանչյանը` չբացառելով, որ այնուամենայնիվ ինչ-որ փուլում մեղադրյալն ու իր հարազատները հրաժարվեն հանրային պաշտպանի ծառայություններից:

Ավելի վաղ ՀՀ սպորտի և երիտասարդության հարցերի նախարար Յուրի Վարդանյանը հայտարարել էր, որ որպես հայր ինքն իրեն շատ վատ է զգում իր որդու հետ կատարվածին և պնդել, որ ոչ մի կերպ չի միջամտելու իրավապահ մարմինների աշխատանքին:
«Դավիթը չափահաս երիտասարդ է, ինքնուրույն մարդ, և այն ինչ արել է, թող կատարած քայլի համար պատժվի օրենքի տառի համաձայն: Համենայն դեպս, ես՝ որպես հայր և պաշտոնատար անձ, չեմ պատրաստվում որևէ կերպ միջամտել դրան»,– հայտարարել էր նախարարը:

 Panorama.am-ը տեղեկացրել էր, որ հոկտեմբերի 15-ին Սյունիքի մարզի քննչական բաժնում Դավիթ Վարդանյանի նկատմամբ մեղադրանք էր առաջադրվել ՀՀ քրեական օրենսգրքի 268 հոդվածի 3-րդ մասի հատկանիշներով «առանձնապես խոշոր չափերով թմրամիջոցներ կամ հոգեմետ (հոգեներգործուն) նյութեր ապօրինի պատրաստելը, վերամշակելը, ձեռք բերելը, պահելը, փոխադրելը կամ առաքելը» և 215 հոդվածի 2-րդ մասի հատկանիշներով` «թմրամիջոցների մաքսանենգությունը»: Սպորտի և երիտասարդության հարցերի նախարարի որդու նկատմամբ որպես խափանման միջոց ընտրվել էր երկամսյա կալանքը: Հոկտեմբերի 16-ին հարուցված քրեական գործը ուղարկվել է քննչական գլխավոր վարչության հատուկ կարևորագույն գործերի քննության վարչության վարույթ:

Panorama.am-ին ոստիկանության լրատվական ծառայությունից հայտնեցին, որ Հայաստանի իրավապահների «թիրախում» Յուրի Վարդանյանի որդին երբևէ որևէ հանցանք գործելու համար չի հայտնվել: