Ձեր վստահելի աղբյուրը

Երևանի Պետական համալսարանի շրջանավարտներ, նախկին մանկավարժներ և դեռ ուսանող տարիներից մտերիմ ընկերներ Խաչիկ Հակոբյանի ու Արա Դիլանյանի կյանքը Գորիսի ոստիկանության, այնուհետև Սյունիքի մարզի դատախազության դատախազ Հայկ Պետրոսյանի թեթև ձեռքով վերածվել է դժոխքի. Արա Դիլանյանը ինքնավնասման հետևանքով այժմ հաշմանդամ է դարձել, իսկ Խաչիկ Հակոբյանը սթրեսային վիճակում է: Նրանք երկուսն էլ անազատության մեջ են և բնակարան ապօրինի մուտք գործելով կողոպուտ կատարելու համար Սյունիքի մարզի ընդհանուր իրավասության դատարանի դատավոր Դավիթ Գրիգորյանի վճռով վերջերս դատապարտվել 4 տարի ազատազրկման:

Դատարանը հաստատված է համարել Սյունիքի մարզի դատախազության մեղադրանքն այն մասին, որ 2012-ի հոկտեմբերի 2-ին Խաչիկն ու Արան ապօրինի մուտք են գործել Գեորգի Հայրապետյանի` Գորիսում գտնվող առանձնատուն Գեորգի Հայրապետյանի և նրա որդու` Սպարտակ Հայրապետյանի նկատմամբ առողջության համար ոչ վտանգավոր բռնություն գործադրելով` նրանց մարմնի տարբեր մասերին հարվածներ հասցնելով, Գեորգի Հայրապետյանի գրպանից բացահայտ հափշտակել են 45.700 ՀՀ դրամ, իսկ Սպարտակ Հայրապետյանից` 181.000 ՀՀ դրամ:

Տղաների փաստաբան Ինեսա Պետրոսյանի պնդմամբ, այս գործի ամբողջ նախաքննությունն ընթացել է բազմաթիվ խախտումներով, իսկ առերես հարցաքննությունները` գործում գրված, բայց իրականումգոյություն չունեցող ընթերակաների ներկայությամբ (Գեորգի Հայրապետյանը անգրագետ է եղել և նրա հարցաքննության ժամանակ պետք էընթերականեր լինեին-հեղ.): Օրինակ, նախաքննությամբ հաստատված նյութերի համաձայն, Գեորգի Հայրապետյանի (նա այժմ մահացել է-հեղ.) և Արա Դիլանյանի առերեսմանը, որպես ընթերակա ներկա է եղել Վլադիմիր Թելունց անունով մի մարդ:

Սակայն Panorama.am-ի թղթակցի հետ զրույցում փաստաբան Պետրոսյանը պատմեց, որ իրենց հարցումների արդյունքում պարզել են, որ այդ անունով ընթերակա գոյություն չունի, ինչը դատարանը ընդունել է: Գործի նյութերում նշված Գայանե Շալունց անունով մի կին էլ, որը նախաքննական մարմնի կողմից նշվել է որպես ընթերակա, դատարանում ցուցմունք տալուց հայտնել է, որ Գեորգի Հայրապետյանի առերես հարցաքննությանն ինքը չի մասնակցել, միայն հարցաքննությունն ավարտվելուց հետո քննիչի հրավերով ներկայացել է ու մեխանիկորեն ստորագրել է իրեն ներկայացրած արձանագրությունը:

Եվ Խաչիկ Հակոբյանը, և Արա Դիլանյանը սկզբից մինչև վերջ չեն ընդունել իրենց նկատմամբ առաջադրված մեղադրանքը, հայտարարել, որ իրենք կապ չունեն տուժողների ու կատարվածի հետ և ասել, որ դա իրենց նկատմամբ զրպարտություն է: Գործով տուժող Սպարտակ Հայրապետյանը, ի դեպ, մտավոր խնդիրներ ունի, և բժշկը նրա մոտ ախտորոշել է թեթև աստիճանի մտավոր հետամնացություն: Նա Գորիսում մուրացկանությամբ է զբաղվում և պարբերաբար բուժում է անցնում Նուբարաշենի հոգեբուժարանում: Այս գործի շրջանակներում նա բազմիցս փոխել է իր ցուցմունքները. մեկ ասել է, որ Արան ու Խաչիկը իրենից գումար են գողացել, մեկ ասել է, չեն գողացել: Ավելին, Ինեսա Պետրոսյանի հետ տեսագրված զրույցներում, ինչպես նաև դատարանում նշել է, որ ոստիկանության քննիչներն ու դատախազ Հայկ Պետրոսյանը իր նկատմամբ ճնշումներ են գործադրել, որպեսզի ինքը Արայի ու Խաչիկի դեմ ցուցմունք տա:

Դատախազ Հայկ Պետրոսյանի ճնշումները, սակայն, չեն սահմանափակվել միայն մտավոր հետամնաց և մուրացկանությամբ զբաղվող Սպարտակի նկատմամբ տարածվելով: Դրա թիրախում է հայտնվել նաև Արայի ու Խաչիկի փաստաբան Ինեսա Պետրոսյանը, սակայն ամեն ինչ հերթականությամբ:

Արդեն օգոստոսին Նուբարաշենի հոգեբուժարանում Սպարտակի հետ տիկին Պետրոսյանի հարցազրույցի տեսագրությունը, որտեղ Սպարտակն ասում է, որ ինքը չի գողացել և որ իրեն քննիչներն ու իր հայրը` Գեորգի Հայրապետյանն են ճնշել, որպեսզի Արայի ու Խաչիկի դեմ ցուցմունք տա, փոխում է դատական նիստի ընթացքը: Բացի այդ, Սպարտակը դարձյալ մի քանի ժամ դատարանում հարցաքննվում է և հայտարարում, որ ինքը նախկինում սուտ է ասել, իսկ Խաչիկն ու Արան իրենից գումար չեն գողացել:

Ինեսա Պետրոսյանը Panorama.am-ին է տրամադրել դատական այդ նիստի սղագրությունը.

Ինեսա Պետրոսյանի հարցը – 18 օր առաջ, որ գնացիր (ոստիկանություն), ո՞վ կար սենյակում
Դատավոր -դատարանին նայի Սպարտակ (ամբողջ դատական նիստին Սպարտակ Հայրապետյանը նայում էր մեղադրողին – Ի.Պ.)
Ի.Պ.- կարողա՞ դատախազն էնտեղ էր.
Ս.Հ. – հա
Ի.Պ. - ինչ էր ասում, դրա համար նայեցիր իրան.
Դատավոր - ումա նայել
Ի.Պ. - դատախազին
Դատավոր – դատարանին նայիր…
Դատավոր - մեղադրողը ոստիկանությունում էր, ինչ-որ բան ասելա քե՞զ
Ս.Հ. - ասելա՝ կասես փող են գողացել…
ամբաստանյալ Խաչիկ Հակոբյանի հարցը – Սպարտակ ջան, քանի հոգի մարդ կար սենյակում, որ քեզ նկարում էին
Դատավոր - նայում ես դատարանին և պատասխանում ես
Ս.Հ. - երկու հոգի
ամբաստանյալ Խաչիկ – ճանաչում ե՞ս
Ս.Հ. – չէ
Խաչիկի հարցը - նոր ասեցիր ճանաչում ես, հիմա ինչու ես ասում չէ, Գրիշիկը (Գորիսի քրեականի պետն է) էդտե՞ղ էր
Սպ. Հ. – հա
Խաչիկ - ի՞նչ էր ասում Գրիշիկը քեզ
Դատավոր – նայում ես դատարանին տուժող
Ս.Հ. - ասում էր կասես փող են գյողացել…
Ամբաստանյալ Խաչիկ - ո՞վ առաջարկեց, որ քեզ նկարեն
Ս.Հ. - իրանք, Գրիշան
Ի.Պ. - Գրիշիկն ասեց կասես Արան ու Խաչիկն են գողացել ու քեզ կնկարե՞ն
Ս. Հ. – հա
Դատախազի հայտարարությունը – հարգելի դատարան տուժողն ինձ իրականում հանդիպելա աստիճանների վրա , ասել եմ ինչի համար ես եկել, ասելա փողերը չեն տվել, ու ըտից անցել ենք, սենյակում եղելա երկու հոգի Գրիշիկը ևհաղորդում վերցնող Ղազարյանը, ես էնդեղ չեմ եղել:

«Այդ նիստից հետո դատախազը դատարանի շենքի մոտ հեռախոսը պարզելով հայտարարում է հետևյալը` Ինեսա, տես, քո դեմ էլ է Սպարտակը խոսել, բայց ես առանձին եմ ձայնագրել իմ հառախոսով, սա չեմ ներկայացնում: Քեզ լավություն եմ անում: Նրա կամայականություններն անվերջ էին: Նա փորձում էր այդպես վախեցնել, շանտաժի ենթարկել ինձ», -դատախազ Հայկ Պետրոսյանի խոսքերը փոխանցեց տիկին Պետրոսյանը և տեղեկացրեց, որ այդ գործով Գորիսի քննչական բաժնում նյութեր են նախապատրաստվել, սակայն ընթացք չեն ստացել, քանի որ քրեական գործ հարուցելու հիմքեր չեն եղել:

Դատախազի նման պահվածքի մասին տիկին Պետրոսյանը նամակ է գրել ՀՀ Գլխավոր դատախազ Գևորգ Կոստանյանին, նամակում հստակ շարադրել է նախաքննության և դատաքննության ընթացքում արձանագրված խախտումները և հանդիպում խնդրել:

Մինչ դատախազի վարքագծի իրավաչափության մասին լիազոր մարմինը գնահատականներ կտա, տղաների գործով փաստաբան Պետրոսյանի վերաքննիչ բողոքը` արդարացման պահանջով ընդունվել է Վերաքննիչ դատարանի վարույթ: Առաջին նիստը նշանակվել է նոյեմբերի 18-ին:

Գործով տուժող Սպարտակ Հայրապետյանի հետ տեսագրված հարցազրույցը Panorama.am-ին է տրամադրել փաստաբան Ինեսա Պետրոսյանը: