Ձեր վստահելի աղբյուրը

Հատուկ քննչական ծառայությունում քաղաքացիական ակտիվիստ, Փաստաբանների պալատի փաստաբան Արգիշտի Կիվիրյանի նկատմամբ հարուցված քրեական գործի շրջանակներում գործով, այսպես կոչված, տուժած ոստիկանները նոր ցուցմունքներ են տվել: Նկատենք, որ ավելի վաղ հայտարարվել էր, թե գործով նախաքննությունն ավարտվել է:

«Պարզվում է` անցած անգամ որ տեղի էր ունեցել առերեսում ոստիկանների հետ, երեք ոստիկանների ցուցմունքներում կային էական հակասություններ, այսինքն` դասը իրենք վատ էին սովորել: Հիմա որպեսզի այդ հակասությունները փորձեն դզմզել, իրենք վերսկսել էին նախաքննությունը: Ակնհայտորեն գնում է նրան, որ քերական գործը սարքեն: Ամեն ինչից երևում է դա. երեք ոստիկան պատմում են, թե ինչ է տեղի ունեցել ավտոմեքենայում ու այդ ցուցմունքներում հակասություններ կան: Դրանից էլ պարզ երևում է, որ այդ ցուցմունքները լրիվ արհեստական են», -այսօր ՀՔԾ-ից դուրս գալուց հետո հայտարարեց Կիվիրյանը:

Ակտիվիստը վստահեցրեց, որ չեն դադարեցնելու պայքարը և այն կշարունակվի դատարանում, միջազգային ատյաններում, որ մեղավոր անձինք ենթարկվեն պատասխանատվության:

Ավելի վաղ Panorama.am-ը, վկայակոչելով ՀՔԾ լրատվական ծառայության հաղորդագրությունը, տեղեկացրել էր, որ Հատուկ քննչական ծառայությունում Արգիշտի Կիվիրյանին մեղադրանք է առաջադրվել ՀՀ ՔՕ 316-րդ հոդվածի 1-ին մասով և ՀՀ ՔՕ 333-րդ հոդվածի 2-րդ մասի 1-ին կետով` այն բանի համար, որ նա 2013 թվականի օգոստոսի 24-ին Կոմիտասի 5 հասցեում գտնվող նորակառույցի հարակից տարածքը` պողոտայի բանուկ մասը ազատելու, երթևեկությանը չխոչընդոտելու և բողոքի ակցիան փողոցի մայթերում շարունակելու վերաբերյալ հասարակական կարգն ապահովող ՀՀ ոստիկանության ծառայողների օրինական պահանջը չկատարելու համար ոստիկանության բաժին բերման ենթարկվելու ընթացքում, ոստիկանության ծառայողի նկատմամբ գործադրել է առողջության համար ոչ վտանգավոր բռնություն` կապված նրա կողմից ծառայողական պարտականությունները կատարելու հետ:

«Ինձ այսօր հայտնել են քրեական գործի ավարտի մասին և փոխանցել գործի պատճեները, և մենք ժամանակ ենք խնդրել դրանց ծանոթաանլու համար», -հավելեց Կիվիրյանը: