Ձեր վստահելի աղբյուրը

«ՄԱՊ» ընկերության գործով անցնող անհատ ձեռնարկատեր Սիլվա Խաչատրյանը, որը մեղադրվում էր առանձնապես խոշոր չափի յուրացում կատարելու համար, այսօր Արմավիրի մարզի առաջին ատյանի դատարանում արդարացվեց: Մեր ունեցած այս տեղեկությունը հաստատեց նաև Սիլվա Խաչատրյանի փաստաբան Գեղամ Հակոբյանը:

Նա փոխանցեց, որ իրենց երկար բողոքներից հետո դատախազությունը հրաժարվել է մեղադրանքից, իսկ Արմավիրի մարզի ընդհանուր իրավասության դատարանն էլ այսօրվա որոշմամբ կարճեց վարույթը:

Ավելի վաղ Panorama.am-ը անդրադարձել էր այս գործին և տեղեկացրել, որ Սիլվա Խաչատրյանին մեղադրանք էր առաջադրվել այն բանի համար, որ նա 2005-ից հանդիսանալով ֆիզիկական անձ, բանավոր պայմանավորվածության համաձայն, մինչև 2009-ի մայիսի 6-ը իրականացրել է «ՄԱՊ» ՓԲ ընկերության կողմից արտադրված և իրեն վստահված տարբեր տեսակի գինիների, կոնյակների և պահածոների առաքում ԼՂՀ տարածքում: Իսկ 2009-ի մայիսի 11-ից արդեն անհատ ձեռնարկատեր Սիլվա Խաչատրյանի և ՄԱՊ ընկերության միջև կնքվել է ապրանքների մատակարարման պայմանագիր և համապատասխան հաշիվ-ապրանքագրերով իրեն վստահված ապրանքները մինչև 2011-ի վերջ Ս. Խաչատրյանը կրկին վաճառել է ԼՂՀ-ի տարածքում: Այդ ժամանակահատվածում, ըստ մեղադրական եզրակացության, Սիլվա Խաչատրյանը ընկերության գույքը շարունակաբար հափշտակելու դիտավորությամբ վաճառքից ստացված ապրանքների` առանձնապես խոշոր չափի հասնող 32, 935.1 հազ. ՀՀ դրամ գումարը չի մուտքագրել դրամարկղ, այլ ՓԲԸ-ին ցույց է տվել, որպես չվաճառված ապրանք և նշված գումարը վատնելու եղանակով, հափշտակելով ծախսել է իր անձնական կարիքների համար: Այսինքն` Սիլվա Խաչատրյանը մեղադրվում էր ՀՀ քր. օր-ի 179 հոդվածի 3-րդ մասի 1-ին կետով՝ «խոշոր չափի յուրացում» նախատեսված հանցանքի կատարման մեջ:

Նկատենք, որ Սիլվա Խաչատրյանը 8 ամիս եղել է անազատության մեջ` կալանքի տակ:

Նախորդող հրապարակումներ.

Կալանքի տակ գտնվող երկու անչափահասների մայրը դատարան է հրավիրում ՄԱՊ-ի Ալիկին

«ՄԱՊ»-ի գործով Սիլվա Խաչատրյանն ազատ է արձակվել. Փաստաբանը դատարանի որոշումը համարում է օբյեկտիվ