Միասնական քննչական մարմին` առանց ՊԵԿ քննչական ծառայության (տեսանյութ)
«Միասնական քննչական կոմիտեի մասին» օրենքի նախագիծը և դրան կից օրենսդրական փոփոխությունների փաթեթն արդեն պատրաստ է, դեկտեմբերի կեսին կներկայացվի կառավարության հաստատմանը: Դրանից հետո այն Ազգային ժողովում կդրվի շրջանառության մեջ:
Այսօր օրենքի նախագիծը վերջնական քննարկման էր ներկայացվել իրավապահ մարմինների ներկայացուցիչների ու ոլորտի շահագրգիռ անձանց և քննարկումներից ու կողմերի դիտարկումները լսելուց հետո միասնական քննչական մարմին ստեղծելու համար ստեղծված հանձնաժողովի նախագահ Աղվան Հովսեփյանը պատասխանեց լրագրողների հարցերին:
Կոմիտեի ստաեղծման համար մշակվել է երկու լիովին նոր օրենք` քննչական կոմիտեի ու քննչական դեպարտամենտի մասին, ինչպես նաև փոփոխություններ են կատարվել հարակից մի շարք օրենքներում:
Հովսեփյանը տեղեկացրեց, որ արդեն Ազգային ժողովում օրենքն ընդունվելուց և ուժի մեջ մտնելուց հետո անցումային դրույթներով նախատեսված է, որ տասն օրերի ընթացքում Հանրապետության նախագահը կնշանակի կոմիտեի նախագահ և հինգ օրերի ընթացքում կոմիտեի նախագահի առաջարկությամբ նշանակվելու են տեղակալներ: «Դրանից հետո կհաստատվի կառուցվածքը և արդեն իսկ ոստիկանության և պաշտպանության նախարարության քննչական ծառայությունների հենքի վրա կձևավորվի միասնական քննչական կոմիտեն», -հավելեց Աղվան Հովսեփյանը:
Մեր հարցին, թե ինչո՞ւ այնուամենայնիվ, Պետական եկամուտների կոմիտեի քննչական ծառայությունը չի ընդգրկվելու միասնական քննչական կոմիտեի կազմում, Հովսեփյանը պատասխանեց. «Սա գործընթաց է, որ պետք է իրականանա ժամանակի մեջ, այսինքն` փուլ առ փուլ պետք է ձևավորվի միասնական քննչական մարմինը: Այսօր նպատակահարմարությունից ելնելով որոշվել է, որ մարմինը պետք է ձևավորվի երկու քննչական ծառայությունների հենքի վրա: Դա հետագայի խնդիր է: Արդեն դա ցույց կտա թե որքանով այս կառույցը արդյունավետ կաշխատի, կիրականացնի իր առջև դրված խնդիրը: Ըստ դրա, վաղը մյուս օրը ապագայում կլուծվեն նաև այլ հարցեր»:
Լրագրողներից մեկը հետաքրքրվեց, թե տրվե՞լ են կոմիտեին երաշխիքներ, որ աղմկահարույց գործերով քննությունների ժամանակ ազդեցությունների տակ չընկնի կոմիտեն, Հովսեփյանը պատասխանեց, որ առաջին հերթին անկախությունը պետք է ամրագրվի օրենսդրությամբ:
«Իսկ օրենսդրական երաշխիքներն այսօրվա նախագծով արդեն իսկ նախատեսված են: Համենայն դեպս նպատակն այն է, որ ձևավորվի մի կառույց, որ անկախ է լինելու թե քաղաքական, թե իշխանական մյուս ճյուղերի ազդեցություններից, ինչպես նաև բոլոր ենթադրյալ ազդեցություններից»,- հավելեց նախկին գլխավոր դատախազը:
Նույն հարցին պատասխանելիս Արդարադատության փոխնախարար Գրիգոր Մուրադյանը կրկնեց Հովսեփյանին, ասաց, որ կառույցի անկախության երաշխիքը կարող է լինել օրենսդրական և հավելեց. «Անկախության երաշխիքները, երբ կառույցը կստեղծվի ու կձևավորվի պրակտիկա, այդ ժամանակ պարզ կլինի այդ կառույցի անկախության մակարդակը»:
Ի դեպ, Աղվան Հովսեփյանը չպատասխանեց հարցին, թե արդյոք ՀՀ նախագահն արդեն իսկ առաջարկել է իրեն ղեկավարել առաջիկայում ստեղծվելիք միասնական քննչական կոմիտեն:
Նախորդող`
Հանրությանն է ներկայացվել «Միասնական քննչական կոմիտեի» մասին օրենքի նախագիծը
Լրահոս
Տեսանյութեր
Խայտառակություն Թումանյան փողոցում. Չախոյան
