Ձեր վստահելի աղբյուրը

«Շանթ Հարությունյանը հյուծված էր, և ես չգիտեմ` ինչ կլինի, եթե նա ևս մի քանի օր շարունակի հացադուլը: Նույն վատ վիճակում է նաև Վահե Մկրտչյանը, իսկ Լիպարիտ Պետրոսյանը քիչ թե շատ նորմալ վիճակում էր», -Panorama.am-ի թղթակցի հետ զրույցում ներկայացրեց Քրեակատարողական հիմնարկներում դիտորդական առաքելություն իրականացնող հասարակական խմբի ղեկավար Արթուր Սաքունցը, ով երեկ հանդիպել էր նոյեմբերի 5-ի դեպքերի կապակցությամբ կալանավորված Վահե Մկրտչյանի, Շանթ Հարությունյանի և Լիպարիտ Պետրոսյանի հետ:

Հիշեցնենք` վերջինները արդեն տասը օրից ավել է (Շանթ Հարությունյանը` 15 օր), ինչ գտնվում են հացադուլի մեջ և պահանջում են վերացնել հարազատների հետ տեսակցությունների արգելանքը: Շանթ Հարությունյանը գտնվում է Երևան-Կենտրոն քրեակատարաողական հիմնարկում, իսկ Վահե Մկրտրչյանն ու Լիպարիտ Պետրոսյանը` «Վարդաշեն» քրեակատարողական հիմնարկում:

Ավելին, ըստ Սաքունցի, Վահե Մկրտչյանի իրավունքները կոպտորեն խախտվում են, քանի որ վերջինը գտնվում է մի խցում այնպիսի մարդկանց հարևանությամբ, ոորնց հացադուլի մեջ չեն: «Սա համարվում է կոպիտ խախտում, հոգեբանական ճնշում մարդու վրա: Դա անձի արժանապատվությունը նվաստացնող վերաբերմունք է, և դրա պատասխանատվությունը կրում է անձամբ արդարադատության նախարարը և քրեակատարողական վարչության պետը», -նկատեց Արթուր Սաքունցը:

Կալանավորների հետ հանդիպած դիտորդական խմբի ղեկավարը մեզ հետ զրույցում անդրադարձավ նաև «Երևան-Կենտրոն» քրեակատարողական հիմնարկում գտնվող Շանթ Հարությունյանի փաստաբանի տեսակցությունը մերժելուն, որի մասին Panorama.am-ին ասել էր Շանթի կինը` Ռուզաննա Բադալյանը: Վերջինը մեզ փոխանցել էր, որ փաստաբան Ինեսա Պետրոսյանին թույլ չեն տվել հանդիպել Շանթ Հարությունյանի հետ, քանի որ ոչ աշխատանքային, տոնական օրեր են:

«Փաստաբանի հետ պաշտպանյալի հանդիպելու համար աշխատանքային և ոչ աշխատանքային օր հասկացություն չի կարող լինել, տվյալ դեպքում «Երևան-Կենտրոն» քրեակատարողական հիմնարկի առանձնահատկությունն այն է, որ այն գտնվում է Ազգային անվտանգության շենքում, և Ազգային անվտանգության ծառայության հսկիչ-անցագրային կետով պետք է անցնի փաստաբանը: Քանի որ նրանց մոտ աշխատանքային օր չի եղել, փաստաբանը չի կարողացել անցնել: Բայց դա պատճառ չէր կարող լինել, որպեսզի փաստաբանին թույլ չտան տեսակցել իր պաշտպանյալի հետ, քանի որ Կենտրոն քրեակատարողական հիմնարկի մուտքի ապահովումը պետք է լինի ոչ թե ԱԱԾ-ի խնդիրը, այլ արդարադատության նախարարության: Հենց արդարադատության նախարարությունը պետք է բարի լինի ԱԱԾ հսկիչ անցագրային կետում ունենալ իր աշխատակիցը, որը կապահովի տվյալ հիմնարկ իրավասու մարդկանց մուտքը: Այսինքն տվյալ հարցում արդարադատության նախարարությունը անգործություն է ցուցաբերում: Արդարադատության նախարարության անգործության հետևանքով Կենտրոն քրեակատարողական հիմնարկ մուտք գործելու գործընթացը կարգավորվում է ԱԱԾ հսկիչ-անցագրային ծառայության կողմից, այն դեպքում, երբ դա պետք է արվեր քրեակատարողական հիմնարկի անցագրային ծառայության կողմից: Շանթ Հարությունյանի իրավունքների խախտման պատասխանատուն տվյալ դեպքում հանդիսանում է արդարադատության նախարարությունը», -ընդգծեց Արթուր Սաքունցը:

Ըստ իրավապաշտպանի, անգործության է մատնված նաև նոյեմբերի 5-ին Մաշտոցի պողոտայում տեղի ունեցած իրադարձությունների կապակցությամբ հարուցված քրեական գործը վարող նախաքննական մարմինը: «Ես գտնում եմ, որ անհիմն է քաղբանտարկյալներին զրկել տեսակցության և հեռախոսազանգի իրավունքից, և նախաքննական մարմինը դրա համար որևիցե հիմնավորում չի կարող ներկայացնել: Նաև արձանագրում ենք, որ նախաքննություն որպես այդպիսին, չի ընթանում, բացի դատակենսաբանական փորձաքննության արդյունքների ծանոթացումից, այլ քննչական գործողություններ` բացատրություն, հարցաքննություն, առերեսում չեն իրականացվել: Իմ կարծիքով, նախաքննական մարմինը որևէ ծրագիր չունի` ինչ անել հետո, և գտնվում է քաղաքական պատվերի տրամաբանության մեջ: Նախաքննական մարմնին դրել են այնպիսի վիճակի մեջ, որ ոչ թե իրավական գործողություններ կատարի, այլ կատարի քաղաքական պատվեր», -պնդեց Սաքունցը:

Նա նաև տեղեկացրեց, որ առաջիկայում պատրաստվում են համապատասխան պահանջներ ներկայացնել արդարադատության նախարարությանը, իսկ իրավապաշտպան կազմակերպությունները հանդես կգան հայտարարությամբ:

Հիշեցնենք, որ Շանթ Հարությունյանի և նրա հետ կալանավորված անձինք մեղադրվում են իշխանության ներկայացուցչի նկատմամբ վտանգավոր բռնություն գործադրելու համար: