Ի՞նչ անել «սրիկաների» ձեռքը բռնելու համար. ՄԻՊ զեկույցի քննարկում ԱԺ-ում
Վճռաբեկ դատարանի նախագահի մասնակցությունը կարգապահական վարույթի գործերով գերակշիռ է. Վճռաբեկ դատարանը իր որոշմամբ ֆիքսում է, որ տեղի է ունեցել ակնհայտ կոպիտ խախտում, և միանգամից կարգապահական հանձնաժողովը վարույթ է հարուցվում: Ընդ որում, երբ ՎԴ նախագահն է դիմում կարգապահական հանձնաժողովին` վարույթը հարուցվում է շատ հաճախ հենց նույն օրը կամ հաջորդ օրը: Այսօր Ազգային ժողովի Մարդու իրավունքների պաշտպանության և հանրային հարցերի մշտական հանձնաժողովի նիստում Մարդու իրավունքների պաշտպանի տեղական Գենյա Պետրոսյանը այսպես ներկայացրեց արդար դատաքննության վերաբերյալ ՄԻՊ արտահերթ զեկույցը:
Հիշեցնենք` այս արտահերթ զեկույցը, որը հրապարակվեց դեկտեմբերի 9-ին և որի մեջ նշվում էր դատական համակարգում կոռուպցիայի ու երկակի ստանդարտների կիրառման մասին, բողոքի լայն ալիք էր բարձրացրել դատական համակարգում: Բազմաթիվ քննադատություններ հնչեցին ՄԻՊ հասցեին, և զեկույցը որակվեց մերկապարանոց, առանց որևէ փաստերի ներկայացված խոսք:
Պետրոսյանի ներկայացրած տվյալների համաձայն, 2010-2013 թվականների ընթացքում Արդարադատության խորհրդի կարգապահական հանձնաժողովի կողմից հարուցված 50 գործերից 32-ով դատավորների նկատմամբ կարգապահական վարույթ հարուցվել է Վճռաբեկ դատարանի նախագահի գրության հիման վրա, 8-ի դեպքում հարուցվել է էթիկայի հանձնաժողովի միջնորդությամբ և միայն տաս դեպքում է, որ վարույթ հարուցվել է փաստաբանի կամ քաղաքացու դիմումի հիման վրա:
«Վարույթ հարուցելու մասով ուսումնասիրեցինք փաստաբանների դիմումները և տեսանք, որ մի շարք դեպքերում կան նույնական ու նույնաբովանդակ խախտումներ, որոնք չեն հանգեցրել կարգապահական վարույթի, այն դեպքում, երբ այլ դատավորի նկատմամբ միանգամայն նույն խախտումը հանգեցրել է կարգապահական վարույթի: Օրինակ, 21 օր ուշացումով դատարանի կողմից դատական ակտը ուղարկելու համար մի դատավոր ենթարկվում է կարգապահական պատասխանատվության, իսկ նույն արարքը կատարած մեկ այլ դատավոր փաստաբանի դիմումի հիման վրա չի ենթարկվում պատժի, վարույթ չի հարուցվում և պարզապես նշվում է, որ կոպիտ ու ակնհայտ խախտում չկա», -ներկայացրեց ՄԻՊ տեղակալը:
Հանձնաժողովի անդամ ԱԺ պատգամավոր Ալեքսանդր Արզումանյանը նկատեց, որ զեկույցը բուռն քննադատության է արժանացել դատական իշխանության կողմից և հետաքրքրվեց, կա՞ն մեխանիզմներ, որ սա չլինի ուղղակի լուսավորելու նման մի բան, այլ կոնկրետ քայլեր կիրառվեն մի քանի դատավորի պատժելու ուղղությամբ:
«Որովհետև մինչև մի երկու հոգի չպատժվեն, հարց չի լուծվի: Վճռաբեկ դատարանը դիկտատ է, ամեն ինչի տերն է` այս մեկին հասնում է կարգապահական վարույթ հարուցել, այս մյուսին` չի հասնում», -հավելեց Արզումանյանը:
Ի պատասխան Գենյա Պետրոսյանն արձագանքեց` արդար դատաքննության զեկույցը առաջինն էր, որը փորձեց դատական համակարգի վերաբերյալ բոլոր պնդումներն ու հետևությունները հիմնավորել կոնկրետ գործերով:
«Այս բացահայտումները պետք է որ հնարավորություն չտան այս մարմիններին այլևս գործել երկակի ստանդրտներով: Մինչ այդ ճիշտ է, խոսվում էր, բայց դա արվում էր ընդհանուր ընկալումների ու կարծիքների մակարդակում: Բայց նման դատական գործերի վեր հանումով որևէ անգամ չէր արվել: Մեր կարծիքով, սա պետք է կաշկանդի արդարադատության խորհրդին իր գործելաոճի մեջ: Մենք հետևողական ենք լինելու», -վստահեցրեց ՄԻՊ գրասենյակի ներկայացուցիչը:
Ալեքսանդր Արզումանյանը շարունակեց, նշելով, որ հարցը բարոյականության դաշտում լուծելն անհնար է:
«Այսինքն` ասելով, որ այսինչը օրինազանց է չեմ կարծում, որ իր խիղճը կտանջի և կդադարի իր արատավոր գործը: Խիղճ ունենար նման վճիռներ չէր ընդունի», -ասաց Արզումանյանն ու հետաքրքրվեց, թե ինչ է առաջարկում ՄԻՊ գրասենյակը, ինչ կարող է անել Ազգային ժողովը` «սրիկաների ձեռքը բռնելու համար»:
Գենյա Պետրոսյանն արձագանքեց, որ արտահերթ զեկույցում նաև օրենսդրական բացերի մասին է խոսվում, որոնք լրացնելու համար խորհրդարանը կարող է դեր ունենալ:
Նախորդող հրապարակումներ`
Ում, ինչպես և դատական որ փուլում են կաշառք տալիս դատավորներին. Պաշտպանի սենսացիոն բացահայտումը (Տեսանյութ)
Դատավորների միության խորհուրդը ՄԻՊ-ի զեկույցը համարում է հակապետական. Հայտարարություն
Լրահոս
Տեսանյութեր
Գարեգին Երկրորդի ամանորյա ուղերձը
