Ձեր վստահելի աղբյուրը

Արևելյան մարտարվեստի «Դուքենդո» ֆեդերացիայում նախօրեին գիշերը հայտնաբերված զենք-զինամթերքը օգտագործվել է ֆեդերացիայի նախագահ, դերասան Գոռ Վարդանյանի ֆիլմերում: Այդ մասին Panorama.am-ին տեղեկացրին ֆեդերացիայի լրատվական ծառայությունից:

Իրավապահ մարմինները, ֆեդերացիայի մամուլի խոսնակի փոխանցմամբ, երեկ մինչև ուշ գիշեր մասնագիտացված շների օգնությամբ զբաղված են եղել զինամթերքի հայտնաբերմամբ:

«Արթուր Սաֆարյանի սպանության գործով կալանավորված Իսրայել Սարգսյանը իրավապահներին հայտնել էր, որ ինքը աշխատում է մեզ մոտ` ֆեդերացիայում, որպես ֆեդերացիայի անվտանգության պետ: Սակայն 2013 թվականի դեկտեմբերի 30-ից նա մեզ մոտ չի աշխատել և դա հաստատվում է բոլոր փաստաթղթերով», -փոխանցեց մամուլի խոսնակը:

Ինչ վերաբերում է հայտնաբերված զենք-զինամթերքին, ապա մամուլի խոսնակն ասաց, որ դրանք իրենցից ոչ մի վտանգ չեն ներկայացվում և ժամանակին օգտագործվել են Գոռ Վարդանյանի ֆիլմերում:

«Գոռ Վարդանյանը բնական տեսարան ստանալու համար այդ զենքերն օգտագործել է: Այն ժամանակ ֆիլմերը նկարահանելիս ինչ պետք էր, համապատասխան մարմինները տրամադրում էին: Սակայն երբ Գոռ Վարդանյանը արդեն երկու տարի արտերկրում բուժվում է, ժամանակ չենք ունեցել վերադարձնել այդ զենքը», -բացատրեց խոսնակը:

Նշենք, որ ոստիկանության լրատվական ծառայությունները տեղեկացնում են, որ ֆեդերացիայում տեղի ունեցած խուզարկությամբ հայտնաբերվել և առգրավվել է մոտ 800 գ «ՏՆՏ» տեսակի պայթուցիկ նյութ /Տրոտիլ/, «ԴԵՇԱ» տեսակի պայթուցիկ մալուխ, 43 ծխագլանակ, 3 տուփ գործարանային արտադրության «ԿԴ-8» տեսակի պայթուցիչ, 13 սմ երկարությամբ ծխալար, 27 ծխալար, պայթուցիչի 2 լար, «Պիռոպատրոնիի ՊՊ-9» տեսակի 3 պայթուցիչ, 7.62 մմ տրամաչափի 84 փամփուշտ, 5.45 մմ տրամաչափի 156 փամփուշտ, «Կարաբին» տիպի հրացանի 7.62 մմ տրամաչափի 86 փամփուշտ, «ՏՕԶ-8» տիպի 41 փամփուշտ, 9 մմ տրամաչափի 5 փամփուշտ, տարբեր տրամաչափի 2 փամփուշտ, 1 լուսային փամփուշտ, 1 պահունակ, ինքնաձիգի 2 դետալ, 2 զրահաբաճկոն, 16 մմ տրամաչափի որսորդական հրացանի 19 պարկուճ, 7.62 մմ տրամաչափի 9 ուսումնական փամփուշտր, «Ֆ-1» տիպի ուսումնական 2 նռնակ, տարբեր տեսակի մարտական և ուսումնական 9 պայթուցիչ, տարբեր տրամաչափի 7 պարկուճ, «ՏՕԶ-8» տիպի ոչ մարտական 2 փամփուշտ, 1 հատ գնդակ, 5.45 մմ տրամաչափի ուսումնական 77 փամփուշտ և տարբեր 15 տեսակի կնիք:
Հայտնաբերվածն ուղարկվել է փորձաքննության: Կատարվում է նախաքննություն:

Նախորդող հրապարակում`

Դերասան Գոռ Վարդանյանի ֆեդերացիայում մեծ քանակի զինամթերք է հայտնաբերվել