Ձեր վստահելի աղբյուրը

«Վաղը կավարտվի Կ. Դեմիրճյանի անվան մարզահամերգային համալիրի երրորդ աճուրդը և մինչ այս պահը որևէ գնորդ չի հայտնվել»,- Panorama.am-ի հետ զրույցում ասաց Մարզահամերգային համալիրի ներկայացուցիչ Կորյուն Գրիգորյանը:

Նա նաև տեղեկացրեց, որ Վերաքննիչ քաղաքացիական դատարան այսօր իրենց պատասխանել է, որ աճուրդն անօրինական է. «Մենք ասում էինք, որ աճուրդն անօրինական է: Դատարանը ստիպված եղավ փաստերը հաշվի առնել և ընդունել, որ այն, ինչ կատարվել է, անօրինական է»:

Գործով փաստաբան Արմինե Հակոբյանը Panorama.am-ի հետ զրույցում ասաց, որ ինքը բողոքարկել էր Առաջին ատյանի որոշումը՝ կատարողական վարույթը սկսելու վերաբերյալ:

«Բողոքը բավարարել են և հարկադիր կատարողի դիմումն ամբողջությամբ մերժել են: Այսինքն նախկին աճուրդները պետք է անվավեր ճանաչվեն, կատարողական վարույթը կասեցվի: Ըստ օրենքի, չպետք է նոր աճուրդ հայտարարվի: Դատարանի որոշումը պետք է դիմումով հարկադիր մուտք անեմ: Թե ինչ որոշում կկայացնի հարկադիրը ու կշարունակի կրկին աճուրդ հայտարարել, թե ոչ, չեմ կարող ասել»,- ասաց փաստաբանը:

Մինչ Մարզահամերգային համալիրի ներկայացրած հայցը քննվում էր դատարանում, ԴԱՀԿ ծառայության աշխատակիցը դիմել էր առաջին ատյանի դատարան՝ խորհրդատվական բնույթի պարզաբանում խնդրելով համալիրն աճուրդի հանելու կատարողական թերթիկի վերաբերյալ: Դատարանը պարզաբանումներ է տվել ԴԱՀԿ ծառայողին: Օրենքը սահմանում է, որ հարկադիր կատարողը դատարանից խորհրդատվական բնույթի պարզաբանում կարող է ստանալ միայն տպագրական եւ այլ վրիպակների դեպքում:

«Վերաքննիչ դատարանը համարել է, որ Առաջին ատյանի դատարանը խախտումներով որոշում է կայացրել»,- ասաց Ա. Հակոբյանը:

Հարակից հրապարակումներ`
  
Վերաքննիչ դատարանում Մարզահամերգային համալիրի գործով փաստաբանը բոյկոտել է նիստը