Սեյրան Օհանյա՞նն է կայացրել Լյուքս Ստեփանյանի գործով դատավճիռը. Պաշտպանական ճառ
Նոյեմբերյանի զորամասում դեռևս նախորդ տարի մահացած զինծառայող Լյուքս Ստեփանյանի գործով դատավճիռը կհրապարակվի հուլիսի 4-ին: Մինչ այդ, հունիսի 24-ին Տավուշի մարզի ընդհանուր իրավասության դատարանում (Իջևանի նստավայր) տեղի ունեցավ դատավարության վերջին փուլը, երբ պաշտպանական կողմը հանդես եկավ պաշտպանական ճառով:
Հիշեցնենք՝ ըստ նախաքննության տվյալների, 2013-ի մայիսի 15-ին զորամասի 1-ին պահակախմբի մուտքի դիտորդ, նույն զորամասի ԿՍ-19 ժամկետային զինծառայող, շարքային Դավիթ Խաչատրյանը վիճաբանության մեջ էր մտել պահակախմբում ընդգրկված ԿՍ-19 ՀԴՆ-ի ժամկետային զինծառայող, շարքային Լյուքս Ստեփանյանի հետ, որի ժամանակ շարքային Խաչատրյանն իրեն ամրակցված ԱԿՄ տեսակի ինքնաձիգից կրակել է շարքային Լ. Ստեփանյանի ուղղությամբ: Արդյունքում վերջինս գլխի շրջանում ստացած հրազենային վնասվածքից տեղում մահացել էր, իսկ նույն ՀԴՆ-ի ժամկետային զինծառայող, շարքային Հրաչյա Սարգսյանը գլխի շրջանում ստացել էր հրազենային վնասվածք: Դավիթ Խաչատրյանի նկատմամբ հարուցվել էր քրեական գործ` ՀՀ քրեական օրենսգրքի միանգամից երկու հոդվածներով` ՀՀ քր. օր-ի 104 հոդ-ի 2-րդ մասի 6-րդ կետի հատկանիշներով՝ «սպանությունը՝ շատերի կյանքի համար վտանգավոր եղանակով» և ՀՀ Քր. Օր.-ի 112 հոդվածի 1-ին մասի հատկանիշներով` «դիտավորությամբ մեկ ուրիշին մարմնական վնասվածք պատճառելը»:
Հունիսի 24-ին դատավոր Զոյա Զաքինյանի նախագահությամբ կայացած նիստում Դավիթ Խաչատրյանի պաշտպան, Փաստաբանների պալատի անդամ Երեմ Սարգսյանը դատարանին միջնորդեց՝ խնդրելով վերաորակել Դավիթ Խաչատրյանի մեղադրանքը:
Մասնավորապես նա դատարանին խնդրեց Դավիթ Խաչատրյանին ՀՀ քրեական օրենսգրքի 104-րդ հոդվածի 2-րդ մասի 6-րդ կետով և 112-րդ հոդվածի 1-ին մասով առաջադրված մեղադրանքը վերաորակել և նրան մեղավոր ճանաչել ՀՀ քրեական օրենսգրքի 373-րդ հոդվածի 2-րդ և 3-րդ մասերով՝ «զենքի կանոնների խախտումը, որը մարդու առողջությանը անզգուշությամբ պատճառել է ծանր վնաս, ինչպես նաև անզգուշությամբ առաջացրել է մարդու մահ»: Այնուհետև՝ իսկ եթե դատարանը, այնուամենյանիվ, հաստատված կհամարի Դավիթ Խաչատրյանին առաջադրված մեղադրանքում նշված փաստական հանգամանքները, ապա նրան մեղավոր ճանաչել ՀՀ քրեական օրենսգրքի 105-րդ հոդվածով նախատեսված հանցագործության կատարման համար «հոգեկան խիստ հուզմունքի վիճակում կատարված սպանությունը» կամ ՀՀ քրեական օրենսգրքի 104-րդ հոդվածի 1-ին մասով՝ «հասարակ սպանություն», ինչպես նաև ՀՀ քրեական օրենսգրքի 120-րդ հոդվածով՝ «անզգուժշությամբ մեկ ուրիշի առողջությանը ծանր վնաս պատճառելը»:
Նշենք, որ գործով մեղադրող դատախազը դատարանից պահանջել էր Դավիթ Խաչատրյանին դատապարտել 18 տարվա ազատազրկման:
Ինչպես Panorama.am-ին ներկայացրեց պաշտպան Երեմ Սարգսյանը, իր պաշտպանական ճառում պնդել է, որ Դավիթ Խաչատրյանը Լյուքս Ստեփանյանին սպանելու մտադրություն և դիտավորություն չի ունեցել: «Մի՞թե Դավիթ Խաչատրյանին մարդասպան անվանող անձինք ներկա են եղել այդ դեպքին, մի՞թե նրանք մեզ բոլորիս, այդ թվում դատարանին ոչ հասու գերբնական մեթոդներով դեռևս մինչև դատաքննության ավարտը պարզել են ողջ իրականությունը և հաստատապես գիտեն, որ Դավիթ Խաչատրյանը ցանկացել է սպանել Լյուքս Ստեփանյանին և հենց այդ նպատակով էլ դիտավորյալ կրակել և սպանել է նրան»,-իր ճառում հարցեր է առաջադրել պաշտպանը:
Նա դատարանին հիշեցրել է Լյուքսի մահվանը հաջորդած դեպքերը, երբ զինծառայողի ծնողները փորձել էին իրենց որդու դին տեղափոխել Երևան, կառավարության շենքի դիմաց բողոքի ակցիա իրականացնել՝ պահանջելով պատժել Լյուքսին դիտավորյալ սպանած զինծառայողին:
«Սևան-Երևան ավտոճանապարհին բարձրաստիճան պաշտոնյաները ամեն գնով ծնողներին փորձում էին համոզել, որպեսզի հետ կանգնեն դին Երևան տեղափոխելու մտքից և վերադառնան իրենց գյուղ: Լյուքս Ստեփանյանի հարազատները պահանջել են, որպեսզի ՀՀ պաշտպանության նախարար Սեյրան Օհանյանը բոլորի ներկայությամբ հաստատի, որ Դավիթ Խաչատրյանը դիտավորությամբ է կրակել և սպանել Լյուքս Ստեփանյանին, իսկ նախարարն էլ տուրք տալով քաղաքացիների պահանջներին, դեպքից ընդամենը երեք օր անց` մայիսի 18-ին, երբ դեռևս նախաքննության սկզբնական փուլն էր, հայտարարել է, որ նախնական տեղեկությունների համաձայն Դավիթ Խաչատրյանը միտումնավոր կերպով է կրակել և սպանել Դավիթ Խաչատրյանի՝ այս կերպ մեղմելով Լյուքս Ստեփանյանի հարազատների դժգոհությունը, որոնք էլ միայն դրանից հետո համաձայնվեցին վերադառնալ իրենց գյուղ: Գուցե ՀՀ ՊՆ նախարարի այս խոսքերն ու գործողություններն անուշադրության մատնեինք և համարեինք իրադրությունից դրդված, տուժողի հարազատներին հանգստացնելու նպատակով կատարված քայլ, սակայն հատկանշական է, որ վերջինիս խոսքերից հետո նրա ենթակայության տակ գտնվող ՀՀ ՊՆ քննչական ծառայության 6-րդ կայազորային քննչական բաժնում սույն քրեական գործի ողջ նախաքննությունն իրականացվել է հենց այս խոսքերը հաստատելու հատուկ նպատակով և ջանասիրությամբ, որի արդյունքում էլ Դավիթ Խաչատրյանին անհիմն մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 6-րդ կետով և 112-րդ հոդվածի 1-ին մասով»-հայտարարել է Երեմ Սարգսյանը:
Բացի այդ, նա իր ճառում դատարանին հիշեցրել է դեռևս նախաքննության ընթացքում Լյուքս Ստեփանյանի մոր՝ Լուիզա Ստեփանյանի մոր դիմումը՝ ուղղված ՊՆ Սեյրան Օհանյանին: Փաստաբանը դիմումից մի հատված է մեջբերել. «Բարև Ձեզ պարոն Ս. Օհանյան: (...), այս հարցին շտապ լուծում է պետք: Քանի որ պարզ երևում է, որ գործի վրա աշխատում են երկու փաստաբաններ և ժամանակ են շահում, որ գործը մեղմացնեն տարբեր հանգամանքներով: Քանի որ առաջին օրվանից մինչև օրս, նույն բանն է ասվում, թե ինչպես է դեպքը կատարվել, գլխավոր մարդասպանը կա, վկաները կան, վիրավորը նույնպես: Վաղը կձևակերպվի, որ ամեն ինչ դրդել է Լյուքսը և Դավիթ Խաչատրյանը ճարահատյալ է կրակել: Քանի որ չեմ կարող երկարացնել: Դուք պարոն Ս. Օհանյան, ինչպես նաև մի շարք բարձրաստիճան պաշտոնյաներ Սևանա մայրուղու վրա խոստացաք՝ պատիժը 18-20 տարի է կամ ցմահ: (...)»:
Պաշտպանության նախարարին ուղղված այս խոսքերը պաշտպանական կողմին հիմք են տվել եզրակացնել, որ Դավիթ Խաչատրյանի դատավճիռը հայտնի է եղել դեռևս մինչև դատավարության մեկնարկը (դատախազը հենց նույնքան պատիժ է պահանջել՝ 18 տարի):
«Եթե ոմանք կփորձեն մեկնաբանել, թե պաշտոնյաներն ընդամենը ասել են, թե նշված հանցագործության կատարման համար օրենքով ինչ պատիժ է նախատեսված, ապա նշեմ, որ քրեական օրենսգրքով դրա համար նախատեսված է ոչ թե 18-20 տարի ժամկետով ազատազրկում, այլ՝ 12-20 տարի: Իսկ մեղադրող դատախազն էլ այսքանից հետո, իր հերթին հաստատեց, որ սույն քրեական գործով պետական բոլոր մարմինները, իրավասու պաշտոնատար անձինք համաձայնեցված են գործում, որ ամեն գնով պահում են իրենց խոստումը, ուստի իր մեղադրական ճառում դատարանին միջնորդեց, որ Դավիթ Խաչատրյանին դատապարտի հենց 18 տարի ժամկետով ազատազրկում, սակայն կրկին առանց հիմնավորելու, թե ինչու հենց 18 տարի, այլ ոչ թե ասենք գոնե 15, 16 կամ 17 տարի:Հետևությունները թողնում եմ Ձեզ», դիմելով դատարանին, նշել է Սարգսյանը:
Համադրելով դատաքննության ընթացքում վկաների տված ցուցմունքները, պաշտպանական կողմը նշել է, որ Դավիթ Խաչատրյանը և Լյուքս Ստեփանյանը գտնվել են նորմալ, մտերիմ փոխհարաբերությունների մեջ, երբևէ չեն վիճաբանել միմյանց հետո, առավել ևս միմյանց նկատմամբ թշնամություն չեն ունեցել: Նրանք երկուսն էլ նույն կարգավիճակի զինծառայողներ են եղել, նրանցից ոչ մեկը մյուսի նկատմամբ որևէ առավելություն չի ունեցել և չի էլ փորձել ունենալ: Երկուսն էլ վայելել են համածառայակիցների հարգանքը:
«Ինչ վերաբերում է Լյուքս Ստեփանյանի կողմից Դավիթ Խաչատրյանին առանց որևէ պատճառի պզուկոտ անվանելուն և անձամբ նրան ուղղված հայհոյանքներ տալուն, ապա այդ ամենն ընդամենը կատակ է եղել և իր մեջ որևէ լրջություն չի պարունակել: Տվյալ իրադրությունն այդտեղ գտնվող բոլոր անձանց համար այնքան կանխատեսելի և սովորական է եղել, որ նույնիսկ տաղավարում գտնվող անձինք, երբ տեսել են, որ զենքի փողն ուղղված է իրենց ուղղությամբ, վտանգ չեն կանխազգացել, չեն մտածել, որ Դավիթ Խաչատրյանը պատճառ ունի կրակելու, որ կարող է կրակել, ուստի ոչ միայն որպես բնական ռեակցիա, չեն փորձել դուրս գալ տաղավարից, այլ անգամ անուշադրության են մատնել այդ ամենը: Անգամ տուժող Հրաչյա Սարգսյանը ընդամենը ասել է՝ «Զենքը խաղալիք չի, իջեցրու»: Հատկապես ուշագրավ է Հրաչյա Սարգսյանի ըտրած բառը՝ «խաղալիք»: Այսինքն՝ նա նույնպես վստահ է եղել, որ Դավիթ Խաչատրյանն ընդամենը խաղ, կատակ է անում»,- նշել է փաստաբանը:
Հարակից հրապարակումներ՝
Լյուքս Ստեփանյանի սպանության գործով մեղադրյալը բերանի կարերը չի քանդում
Լյուքս Ստեփանյանի գործով մեղադրյալը կարել է բերանը
Ես սպանություն չեմ կատարել. Լյուքս Ստեփանյանի գործով մեղադրյալը հացադուլ է հայտարարել ու դիմել ՀՀ նախագահին
Լյուքս Ստեփանյանի սպանության գործ. «Դատավարության մասնակիցների անվտանգությունը չի ապահովվում»
Լյուքս Ստեփանյանի հոր ինքնասպանության փորձը կանխած դատական կարգադրիչները խրախուսվել են
Լյուքս Ստեփանյանի գործով փաստաբանների մեքենան խափանվել է, նիստը` հետաձգվել
Հայտնի է Լյուքս Ստեփանյանի գործով նոր դատավորի անունը
Զինծառայող Լյուքս Ստեփանյանի մահվան գործով մեղադրյալ Դավիթ Խաչատրյանը չի ընդունում մեղադրանքը
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
