Ձեր վստահելի աղբյուրը

ԲՀԿ-ական պատգամավոր Կարո Կարապետյանի (Յուվեցի Կարո) փեսայի` Վերնիսաժում մայիսի 17-ին տեղի ունեցած կրակոցների գործով կալանավորված Գոռ Առաքելյանի փաստաբանը ներկայացրել է միջնորդություն, որպեսզի նրան առաջադրված մեղադրանքը՝ Քրեական օրենսգրքի 34-104-րդ հոդվածի երկրորդ մասով (սպանության փորձ) վերացվի: Panorama.am-ի հետ զրույցում այս մասին հայտնեց Գոռ Առաքելյանի փաստաբան, Փաստաբանների պալատի անդամ Երեմ Սարգսյանը: Այժմ սպասում են միջնորդության պատասխանին:

Ինչ վերաբերում է քննության ընթացքին, փաստաբանն ասաց, որ միանշանակ գնահատել հնարավոր չէ, քանի որ նախաքննական մարմնի աշխատանքի մեծ մասը գաղտնի է. «Այս պահի դրությամբ որևէ ակնհայտ դրսևորում չի եղել, որ կարողանամ կոնկրետ գնահատականներ տալ: Իրենց կատարած աշխատանքը մեզ համար այս պահին տեսանելի չէ, գաղտնի է մեծ մասը: Չեմ կարող գնահատել, թե ինչ ինտենսիվությամբ, օբյեկտիվությամբ են աշխատել: Նորմալ գնահատելու համար գոնե պետք է ստանամ միջնորդության պատասխանը, որպեսզի պատկերացնեմ, թե ինչ դիրքորոշում ունեն, ինչքանով են օբյեկտիվ կամ ոչ օբյեկտիվ»:

Պատասխանելով հարցին, թե ի՞նչ վիճակում է այժմ գտնվում Գ. Առաքելյանը, քանի որ, ավելի վաղ մեզ հետ զրույցում ասել էինք, որ «սթրես է ապրում, այդ ամենը բացասական ազդեցություն է ունեցել նրա վրա», Ե. Սարգսյանը նշեց. «Այն, որ գտնվում է մեկուսարանում, միանշանակ վատ ազդեցություն է ունենում: Դեպքը տեղի է ունեցել հանգամանքների բերումով, իրադրությունից բխող վիճակից: Նման դեպքից հետո կալանավարյում գտնվելն հոգեբանական ազդեցություն թողնում է»:

Հիշեցնենք` մայիսի 17-ին մեքենայի ճանապարհը բացելու շուրջ Վալերի Հովհաննիսյանի և Ներսես Մելքոնյանի հետ առաջացած վիճաբանության արդյունքում Գոռ Առաքելյանը մի քանի անգամ կրակել էր, ինչի հետևանքով 5 անձ տարբեր հրազենային վնասվածքներով տեղափոխվել էին հիվանդանոց: Գոռ Առաքելյանին մեղադրանքն առաջադրվել է ՀՀ Քրեական օրենսգրքի 34-104 հոդվածի 2-րդ մասի 1, 6, 10 կետերի հատկանիշներով (խուլիգանական դրդումներով սպանության փորձ շատերի կյանքի համար վտանգավոր եղանակով, պատժվում է ազատազրկմամբ` առավելագույնը 15 տարի ժամկետով) և 235 հոդվածի 1-ին մասի հատկանիշներով (ապօրինի կերպով ձեռք բերելը, իրացնելը, պահելը, փոխադրելը կամ կրելը, պատժվում է կալանքով՝ առավելագույնը երեք ամիս ժամկետով, կամ ազատազրկմամբ՝ առավելագույնը երեք տարի ժամկետով), նա կալանավորված է: Գործով կալանավորված են նաև Ներսես Մելքոնյանը, որին մեղադրանքն առաջադրվել էր ՀՀ Քրեական օրենսգրքի 258-րդ հոդվածի 3-րդ մասի 1-ին կետի հատկանիշներով (մի խումբ անձանց կողմից խուլիգանություն կատարելը) և Վալերի Հովհաննիսյանը, որին մեղադրանք է առաջադրվել ՀՀ Քրեական օրենսգրքի 258-րդ հոդվածի 3-րդ մասի հատկանիշներով (խուլիգանություն, որը զուգորդվել է անձի նկատմամբ բռնություն գործադրելով կամ դա գործադրելու սպառնալիքով, ինչպես նաև ուրիշի գույքը ոչնչացնելով կամ վնասելով):

Նախորդող հրապարակումներ՝
Վերնիսաժի գործ. Վալերի Հովհաննիսյանին պատգարակի վրա տեղափոխել են դատարան ու կալանավորել
Վերնիսաժում հնչած կրակոցներից վիրավորված Վալերի Հովհաննիսյանը մինչ այժմ տուժող չի ճանաչվել. Փաստաբան
Վերնիսաժի գործով ձերբակալվել է Ներսես Մելքոնյանը
Որտեղի՞ց Ալիկ Սարգսյանը գիտի, որ ցինիզմ է դրսևորվել. Փաստաբանի տարակուսանքը
Վերնիսաժի միջադեպի մասնակիցներից մեկը նախկինում դատված է եղել
Վերնիսաժում կրակոցների հետևանքով տուժածներից 2-ը շարունակում են մնալ վերակենդանացման բաժանմունքում
Վերնիսաժում կրակոցներ արձակած Գոռ Առաքելյանը երկու ամսով կալանավորվեց
«Աբսուրդ է, ցավալի իրականություն». Վերնիսաժի գործով 2-րդ անձը կալանավորվեց
Եթե պատգամավորի փեսան կալանավորված է, ապա մյուսներն էլ պետք է կալանավորվեն. Փաստաբանի դժգոհությունը
Վերնիսաժի գործ. «Գոռի նկատմամբ բռնություն է կիրառվել, բավականին ակտիվ ու շարունակական»