ՄԻԵԴ-ում ՀՀ-ի կողմից առաջադրվող թեկնածուների ընտրության մրցույթն անցել է օբյեկտիվ և անաչառ. հանձնաժողովի անդամ

Իրավունք 15:13 08/10/2014

ՄԻԵԴ-ում ՀՀ-ի կողմից առաջադրվող թեկնածուների ընտրության մրցույթն անցել է օբյեկտիվ և անաչառ. հանձնաժողովի անդամ

Մարդու իրավունքների եվրոպական դատարանի դատավորի պաշտոնում Հայաստանի կողմից առաջադրվող թեկնածուների ընտրության մրցույթն իր թափանցիկությամբ ու հրապարակայնությամբ արդեն վկայում են մրցույթի օբյեկտիվության ու անաչառության մասին: Լրագրողների հետ ճեպազրույցում ասաց արդարադտության նախարար Հովհաննես Մանուկյանը, ով նաև մրցութային հանձնաժողովի անդամ էր:

Նա նշեց, որ մասնակիցների կողմից որևէ հարցադրում, բացի թեկնածուներից Վահե Գրիգորյանի դիմումից, որին հանձնաժողովն այսօր պատասխան կտա, մնացած դեպքերում որևէ հարցադրում, կասկած, պահանջ չի ներկայացվել:

«Առաջին անգամ է նմանատիպ մրցույթն իրականացվում նման աննախադեպ թափանցիկ, հրապարակային պայմաններում, լրագրողները, հանրային սեկտորը հնարավորություն է ունեցել տեսագրել, ձայնագրել ամբողջ գործընթացը»,- ասաց նախարարը:

Հիշեցնենք, որ հոկտեմբերի 6-7-ին կայացել է Մարդու իրավունքների եվրոպական դատարանի դատավորի պաշտոնում Հայաստանի կողմից առաջադրվող թեկնածուների ընտրության մրցույթի հարցազրույցի փուլը, որին մասնակցել է 11 հավակնորդ: Կարգի համաձայն, արդեն այսօր պետք է հրապարակվի թեկնածուների ցուցակն ու նրանց ստացած միավորները: Նրանցից ամենաբարձր միավորներ ստացած 3 մասնակիցները կճանաչվեն հաղթողներ: Նրանց ցուցակը կուղարկվի նախագահ Սերժ Սարգսյանին, ով պետք է հաստատի կամ չհաստատի մրցույթի արդյունքները: Հաստատելու դեպքում ցուցակն ուղարկվելու է Եվրոպայի խորհրդի խորհրդարանական վեհաժողով, որտեղ էլ երեք թեկնածուից ընտրելու է մեկին, ով էլ կնարկայացնի ՀՀ-ն ՄԻԵԴ-ում:

Նախագահի կողմից չհաստատվելու դեպքում հայտարարվելու է նոր մրցույթ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: