Շիրակում տեղի ունեցած ավտովթարի գործով մեղադրյալին տեղափոխելու են «Նուբարաշեն» հոգեբուժական հիվանդանոց
Շիրակի մարզում տեղի ունեցած ողբերգական ելքով ավտովթարի գործով մեղադրյալ «Կամազ» մակնիշի բեռնատարի վարորդ Մանվել Վարդանյանին 2015 թվականի հունվարի 27-ին տեղափոխելու են «Նուբարաշեն» հոգեբուժական հիվանդանոց: Panorama.am-ի հետ զրույցում ասաց Մ. Վարդանյանի պաշտպան, Փաստաբանների պալատի անդամ Լիանա Բալյանը:
«Դեկտեմբերի 11-ին քննիչին միջնորդություն էի ներկայացրել նշանակել դատաբժշկական և դատահոգեբանական համալիր փորձաքննություն, քանի որ Մանվել Վարդանյանը ծանր ապումների մեջ էր, շոկային վիճակում էր: Քննիչը բավարարել է միջնորդությունը և այսօր որոշում է կայացրել նշանակել դատահոգեբուժական ստացիոնար փորձաքննություն, և հունվարի 27-ից տեղավորել «Նուբարաշեն» հոգեբուժական հիվանդանոցում»,- ասաց փաստաբանը՝ հավելելով, որ Մանվել Վարդանյանն այնտեղ կմնա 24 օր, որտեղ համալիր փորձաքննություն կնշանակեն՝ որոշելու՝ ներկայումս ինչ վիճակում է նա գտնվում՝ մեղսունա՞կ է, թե՞ ոչ:
Լ. Բալյանը նշեց, որ բավարարվել է իր ներկայացրած կրկնակի դատաբժշկական փորձաքննություն նշանակելու վերաբերյալ միջնորդությունը ևս՝ ստուգելու, մարմնական, մասնավորապես գլխի վնասվածքները, որոնք Մ. Վարդանյանը ստացել է վթարի ժամանակ:
Փաստաբանը նաև տեղեկացրեց, որ քննիչը միջնորդություն է ներկայացրել դատարան մինչև 2015 թ. մարտի 10-ը երկարացնել Մանվել Վարդանյանի կալանքի ժամկետը:
«Քննիչն իր միջնորդությունը պառճառաբանել է այն հանգամանքով, որ նշանակվել են համալիր փորձաքննություններ, եզրակացությունները դեռևս չեն ստացել: Ես այդ միջնորդության վերաբերյալ առարկություններ են պատրաստվում ներկայացնել»,- ասաց Լ. Բալյանը:
Ինչ վերաբերում է Մ. Վարդանյանին կրկին հարցաքննելու փաստաբանի միջնորդությանը, որը բավարարվել էր, հարցաքննություն կլինի բոլոր փորձաքննությունների եզրակացությունները ստանալուց հետո:
2014թ. նոյեմբերի 10-ին Շիրակի մարզում տեղի ունեցած ողբերգական ելքով ավտովթարի դեպքի առթիվ ՀՀ Քննչական կոմիտեի Շիրակի մարզային քննչական վարչությունում հարուցված քրեական գործի շրջանակներում «Կամազ» մակնիշի բեռնատարի վարորդ Մ.Վարդանյանին մեղադրանք է առաջադրվել՝ ՀՀ քրեական օրենսգրքի 242-րդ հոդվածի 3-րդ մասով (Ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ՝)։ Նախաքննությամբ ձեռք բերված ապացույցների համաձայն՝ «Իմէքս-Գրուպ» ՍՊ ընկերության վարորդ Մ.Վարդանյանն իրեն ամրակցված «Կամազ-53202» մակնիշի, 533 ՏՍ 61 հաշվառման համարանիշի բեռնատար ավտոմեքենայով 2014 թվականի նոյեմբերի 10-ին՝ ժամը 19:15-ի սահմաններում, խախտելով ՀՀ ՃԵԿ-ի 96 կետի, ձև № 1-ի 2.5 ճանապարհային նշանի և «Ճանապարհային երթևեկության անվտանգության ապահովման մասին» ՀՀ օրենքի 23-րդ հոդվածի 3-րդ կետի պահանջները, այն է` պարտավոր լինելով երկրորդական ճանապարհով անհավասարազոր ճանապարհների խաչմերուկին մոտենալով ճանապարհը զիջել գլխավոր ճանապարհով ընթացող տրանսպորտային միջոցներին, ինչպես նաև՝ կանգնել հատվող երթևեկելի մասի եզրից առաջ, ստեղծել է վթարային իրավիճակ, մուտք գործել խաչմերուկ և բախվել Ռազմիկ Մկրտչյանի վարած, Երևանից-Գյումրի թիվ 359 երթուղու «Գազ-32213» մակնիշի, 0811 Լ հաշվառման համարանիշի ուղևորատար ավտոմեքենային: Արդյունքում՝ առաջացած վթարի հետևանքով «Գազ-32213» մակնիշի ուղևորատար ավտոմեքենան հրդեհվել է, զոհվել է յոթ մարդ, յոթ մարդ էլ տարբեր աստիճանի այրվածքներով և մարմնական վնասվածքներով տեղափոխվել են հիվանդանոց: Մ.Վարդանյանի նկատմամբ որպես խափանման միջոց է կիրառվել կալանավորումը։
Նախորդող հրապարակումներ՝
Շիրակում տեղի ունեցած ավտովթարի գործով մեղադրյալին հնարավոր է տեղափոխեն «Դատապարտյալների հիվանդանոց»
Շիրակում տեղի ունեցած ավտովթարի գործով մեղադրյալի կալանքի որոշումը չի բողոքարկվելու
Շիրակում տեղի ունեցած ողբերգական ավտովթարի գործով մեղադրյալ վարորդը հոգեբանական, բժշկական օգնության կարիք ունի
Շիրակում ավտովթարի հետևանքով տուծաժ 14-ամյա ուղևորի վիրահատությունը բարահաջող է անցել
«Ծանրորդ Վանիկ Սարգսյանը բազմաթիվ երազանքներ և ծրագրեր ուներ իրականացնելու». մարզիկն ավտովթարի զոհերից մեկն է
Շիրակի մարզպետը՝ ողբերգական ավտովթարի մասին
Պարզվել է Շիրակի մարզում նախօրեին տեղի ունեցած ՃՏՊ-ի զոհերի ինքնությունը. քննչական կոմիտե
Շիրակի մարզում ավտովթարից զոհվածների ընտանիքներն ու տուժածները կստանան դրամական օգնություն
Նախագահը ցավակցություն է հայտնել Գյումրի-Երևան ավտոճանապարհին տեղի ունեցած ողբերգական ավտովթարի կապակցությամբ
35 աստիճանի այրվածք, բազուկների կոտրվածք, վնասվածքներ. Ի՞նչ վիճակում են Գյումրիի ՃՏՊ-ի վիրավորները
Շիրակում տեղի ունեցած վթարի գործով ձերբակալված կա
ՃՏՊ Շիրակի մարզում` հրդեհի բռնկմամբ. կա 7 զոհ
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
