Շիրակի վթար. «Գազելի վարորդի մեղքը հաստատ առկա է»

Իրավունք 13:06 18/03/2015

Շիրակի մարզում տեղի ունեցած ողբերգական ելքով ավտովթարի գործով մեղադրյալ «Կամազ» մակնիշի բեռնատարի վարորդ Մանվել Վարդանյանի պաշտպան, Փաստաբանների պալատի անդամ Լիանա Բալյանը երեկ գնացել է «Արթիկ» քրեակատարողական հիմնարկ: Քննիչը հայտարարել է Մանվել Վարդանյանի քրեական գործի ավարտի մասին: Գործը պետք է ուղարկվի դատարան: Մեղադրական եզրակացությունը դեռ չի հաստատվել դատախազի կողմից:

«Գործով պարզվել է, որ «Կամազ-53202» մակնիշի 533SU61 հաշվառման համարանիշի բեռնատար ավտոմոբիլը գտնվել է տեխնիկապես սարքին վիճակում, իսկ «Գազ-32213» մակնիշի 0811Լ հաշվառման համարանիշի ուղևորատար ավտոմոբիլի բանվորական արգելակային համակարգը և կախոցները գտնվել են տեխնիկապես անսարք վիճակում: Գազել ավտոմոբիլի անիվներն ունեցել են տեղամասային լրիվ մաշվածություններ, որը դասվում է ավտոմոբիլների շահագործման արգելող պայմանների թվին: Գազելը տեղափոխել է նախատեսվածից ավելի ուղևորներ»,- Panorama.am-ի հետ զրույցում ասաց Լիանա Բալյանը:

Փաստաբանը նշեց, որ նախօրեին միջնորդել է քրեական գործ հարուցել «Գազ-32213» մակնիշի վարորդ Ռազմիկ Մկրտչյանի նկատմամբ, որովհետև հաստատ գազելի վարորդի մեղքն առկա է. «Գազել մեքենան, որը տեղափոխում էր ուղևորներ, միշտ պետք է պատրաստ լիներ և արգելակեր մեքենան, մի գուցե «Կամազի» փոխարեն ճանապարհին անասուններ էին անցնում, կամ ժայռաբեկոր էր ընկած, կամ էլ «Կամազը» խափանվել և կանգնել էր ճանապարհին: Վարորդը պարտավոր էր կանխատեսելով վտանգները միշտ ունենար արգելակելու հնարավորություն և լիներ զգույշ»:

Լ. Բալյանը նաև հայտնեց, որ գազելի գծի տերը մի քանի օր առաջ քաղ.հայց է ներկայացրել Մանվել Վարդանյանի դեմ և նրանից պահանջում է 3 միլիոն 600 հազար դրամ՝ որպես բաց թողնված օգուտ:

«Գծի տերը պատճառաբանում է, որ օրական գազելից ստացել են 45 հազար դրամ շահույթ, իսկ 80 օրվա ընթացքում եթե գազելը չայրվեր և ուղևորներ տեղափոխեր, ապա շահույթը կկազմեր երեք միլիոն վեց հարյուր հազար դրամ: Իսկ Մանվել Վարդանյանի պատճառով իրենք զրկվել են շահույթից»,- ասաց փաստաբանը:

Նա նաև տեղեկացրեց, որ համաձայն դատահոգեբանական փորձաքննության Մանվել Վարդանյանը մեքենան վարել է հանգիստ վիճակում և նորմայով սահմանված վիճակում, իսկ վթարից հետո գտնվել է խուճապի մեջ: Ըստ փորձաքննության, հրդեհի առաջացման պատճառը գազելի վրա թափված դիզելային վառելիքի բռնկումն է և հրդեհի զարգացմանն ու տարածմանը նպաստել է շարժիչային հատվածում գազասնուցման համակարգից արտահոսող գազը:

Փաստաբանը նախօրեին քննիչին միջնորդություններ է ներկայացրել նշանակել կրկնակի ավտոտեխնիկական, դատանյութագիտական, դատահրդեհատեխնիկական և ավտոտեխնիկական փորձաքննություններ և փորձաքննությունները հանձնարարել ՀՀ ԳԱԱ «Փորձաքննությունների ազգային բյուրո» ՊՈԱԿ-ին:

«Տարօրինակ է, որ հին, տեխնիկապես անսարք և մաշված անվադողերով գազելը փորձաքննությամբ գնահատվել է 2 միլիոն 200 հազար դրամ, իսկ կամազի վնասված մասերը` ընդամենը 655 հազար դրամ: Վթարի վայրը գծագրվել է ոչ փորձագետ քննիչի կողմից և գծագիրը, որպես տեխնիկական եզրակացություն, հիմք է ծառայել փորձաքննությունների համար»,- ասաց փաստաբան Լ. Բալյանը:

2014թ. նոյեմբերի 10-ին Շիրակի մարզում տեղի ունեցած ողբերգական ելքով ավտովթարի դեպքի առթիվ ՀՀ Քննչական կոմիտեի Շիրակի մարզային քննչական վարչությունում հարուցված քրեական գործի շրջանակներում «Կամազ» մակնիշի բեռնատարի վարորդ Մ.Վարդանյանին մեղադրանք է առաջադրվել՝ ՀՀ քրեական օրենսգրքի 242-րդ հոդվածի 3-րդ մասով (Ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ՝)։ Նախաքննությամբ ձեռք բերված ապացույցների համաձայն՝ «Իմէքս-Գրուպ» ՍՊ ընկերության վարորդ Մ.Վարդանյանն իրեն ամրակցված «Կամազ-53202» մակնիշի, 533 ՏՍ 61 հաշվառման համարանիշի բեռնատար ավտոմեքենայով 2014 թվականի նոյեմբերի 10-ին՝ ժամը 19:15-ի սահմաններում, խախտելով ՀՀ ՃԵԿ-ի 96 կետի, ձև № 1-ի 2.5 ճանապարհային նշանի և «Ճանապարհային երթևեկության անվտանգության ապահովման մասին» ՀՀ օրենքի 23-րդ հոդվածի 3-րդ կետի պահանջները, այն է` պարտավոր լինելով երկրորդական ճանապարհով անհավասարազոր ճանապարհների խաչմերուկին մոտենալով ճանապարհը զիջել գլխավոր ճանապարհով ընթացող տրանսպորտային միջոցներին, ինչպես նաև՝ կանգնել հատվող երթևեկելի մասի եզրից առաջ, ստեղծել է վթարային իրավիճակ, մուտք գործել խաչմերուկ և բախվել Ռազմիկ Մկրտչյանի վարած, Երևանից-Գյումրի թիվ 359 երթուղու «Գազ-32213» մակնիշի, 0811 Լ հաշվառման համարանիշի ուղևորատար ավտոմեքենային: Արդյունքում՝ առաջացած վթարի հետևանքով «Գազ-32213» մակնիշի ուղևորատար ավտոմեքենան հրդեհվել է, զոհվել է յոթ մարդ, յոթ մարդ էլ տարբեր աստիճանի այրվածքներով և մարմնական վնասվածքներով տեղափոխվել են հիվանդանոց: Մ.Վարդանյանի նկատմամբ որպես խափանման միջոց է կիրառվել կալանավորումը։

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: