Ձեր վստահելի աղբյուրը

Ավետիսյանների գործով դատաձգաբանական եզրակացությունների արդյունքների համաձայն, դեպքի վայրում հայտնաբերված բոլոր կրակոցներն արձակվել են նույն զենքից, որն ամարկցված է եղել ռուսական ռազմաբազայի զինծառայող Վալերի Պերմյակովին: Լրագրողների հետ հանդիպման ժամանակ նշանակված փորձաքննության մասին մանրամասներ ներկայացրեց Ավետիսյանների իրավահաջորդների ներկայացուցիչ, Փաստաբանների պալատի անդամ Լուսինե Սահակյանը:

«Դեպքի վայրում հայտնաբերված բոլոր 28 պարկուճն արձակվել է նույն ինքնաձիգից, որը հայտնաբերվել է դեպքի վայրում»,- ասաց իրավահաջորդների ներկայացուցիչ, Փաստաբանների պալատի անդամ Երվանդ Վարոսյանը:

Լ. Սահակյանը նաև նշեց, որ գործով նշանակված դատակենսաբանական փորձաքննության եզրակացության համաձայն, Պերմյակովի քրտինքը և դեպքի վայրում հայտնաբերված հագուստի, կոշիկների վրայի քրտինքի հետքերը խմբային նույն պատկանելիությանն են: Սակայն 100 տոկոսով հստակություն կլինի, երբ լինեն դատագենետիկական փորձաքննության արդյունքները:

Իրավահաջորդների ներկայացուցիչ, Փաստաբանների պալատի անդամ Երեմ Սարգսյանն ասաց, որ դատակենսաբանական փորձաքննության են ենթարկվել դեպքի վայրում հայտնաբերված մի շարք օբյեկտներ, նաև զինվորական հագուստի, գլխարկի վրա հայտնաբերված մազերը: Պարզվել է, որ բոլորը թողնված են կոնկրետ այն խմբի արյուն ունեցող անձի կողմից, որն ունի Պերմյակովը: Երեք իրի վրա հայտնաբերվել է թքի առկայություն, որը կրկին նույն խմբի արյուն ունեցող անձի կողմից է թողնված, որն ունի Պերմյակովը: Ե. Սարգսյանն ասաց, որ միայն բոլոր տվյալների համակցության ամբողջությամբ կարող են պարզել, թե իրականում Պերմյակովն է այնտեղ եղել, թե ոչ: Այս առումով նա կարևորեց նշանակված դատագենետիկական փորձաքննության արդյունքները, որոնք կլինեն մոտ ժամանակներում:

«Ինչ ունենք այս պահին. նախ այն, որ բոլոր կրակոցներն արձակվել են նույն ինքնաձիգից, որն ամրակցված է եղել Պերմյակովին, որը հայտնաբերվել է դեպքի վայրում: Չունենք որևէ եզրակացություն, որը հերքի Պերմյակովի՝ այնտեղ գտվելը կամ որ մեկ ուրիշն է կրել նրա հագուստը: Իսկ մնացած հարցերի պատասխաններն ակնկալում ենք գենետիկական փորձաքննության եզրակացությունը ստանալուց հետո»,- ասաց Ե. Վարոսյանը:

Ինչ վերաբերում է Պերմյակովի մոտ հայտնաբերված բջջային երեք հեռախոսին, Ե. Սարգսյանն ասաց, որ այս պահին այդ հեռախոսները գտնվում են ռուսական կողմի մոտ:

«Իրականում շատ կարևոր է ինչպես այդ հեռախոսների, այնպես էլ Պերմյակովի՝ գտնվելու ժամանակ կրած հագուստի ճանաչումն իրավահաջորդների կողմից: Եթե իրականում դրանք ճանաչվեն իրավահաջորդների կողմից, հետևաբար, իրոք, դրանք տարվել է այդ տանից, ինչը կխոսի այն մասին, որ Պերմյակովը գտնվել է այդ տանը: Իսկ այն, որ հագուստներն ու բջջայինները ռուսական կողմի մոտ են, տրամաբանական է, քանի որ հենց նրանք են հայտնաբերել Պերմյակովին»,- ասաց Լ. Սահակյանը՝ հավելելով, որ այն պահից սկսած, երբ ինչ որ գործողություններից հետո դրանք հայտնվեն հայկական կողմում, կատարվի ճանաչում, այս գործը հնարավոր կլինի ավելի բազմակողմանի քննել:

Հարցին, թե Պերմյակովի հոգեկան առողջության վերաբերյալ որևէ եզրակացությո՞ւն կա, Լուսինե Սահակյանն ասաց, որ Հայաստանում իրականացվող քննությունը, այս վարույթի շրջանակներում դեռևս չի նշանակվել փորձաքննություն: Միաժամանակ հավելեց, որ տուժողների ներկայացուցիչների հետ քննարկում են նման միջնորդություն ներկայացնելու հարցը, սակայն դա ևս պետք է համապատասխան փուլում լինի:

Արդյո՞ք խլացուցիչ օգտագործվել է, թե՞ ոչ: Ե. Վարոսյանն ասաց, որ դա կպարզվի հետքաբանական փորձաքննությամբ, որի արդյունքը դեռ չեն ստացել:

Պերմյակովը չբերվեց դեպքի վայր՝ տեղազննության համար, հայկական կողմը չի՞ փորձելու որևէ միջնորդություն ներկայացնել, Լ. Սահակյանը պատասխանելով հարցին, ասաց. «Անպայման չէ, որ բոլոր քրեական գործերի դեպքում լինի դեպքի վայրի զննություն: Դա որոշվում է քննիչի կողմից գործի քննության ընթացքում՝ անհրաժեշտության դեպքում: Որոշ դեպքերում նույնիսկ սխալ է, որ անձը բերվում է դեպքի վայր. ցուցմունք է տալիս առանց դեպքի վայրն իմանալու, երբ տեսնում է ու արդեն որոշակի պատկերացում է կազմում, հետագայում շտկում է իր ցուցմունքը: Այսինքն նույնիսկ կարող է դա վնասել քրեական գործին»:

Ինչ վերաբերում է քննության նկատմամբ եղած վստահությանը, Երվանդ Վարոսյանն ասաց, որ հայկական կողմից վարույթ իրականացնող մարմինն իրենց հետ համագործակցության եզրեր փորձում է գտնել, թույլ են տվել ներկա լինել բոլոր փորձաքննություններին:

«Արդյունքների վերաբերյալ գնահատականներ տալու համար դեռ վաղ է»,-ասաց նա:
 
Հիշեցնենք, որ Գյումրի քաղաքում հունվարի 12-ին Ավետիսյանների ընտանիքի յոթ անդամների սպանության առթիվ հարուցված քրեական գործով ՀՀ քննչական կոմիտեի քննիչները Գյումրիում տեղակայված ռուսական 102-րդ ռազմաբազայի ժամկետային զինծառայող Վալերի Պերմյակովին մեղադրանք են առաջադրել ՀՀ քրեական օրենսգրքի 104-րդ հոդվածի 2-րդ մասի 1-ին կետով՝ երկու և ավելի անձանց դիտավորյալ սպանության համար: Վալերի Պերմյակովն ընդունել է առաջադրված մեղադրանքը: Նրան մեղադրանք է առաջադրված նաև ՌԴ Քրեական օրենսգրքի երկու հոդվածով՝ սպանություն և դասալքություն:

Դեպքից հետո Գյումրիում տեղի ունեցան բողոքի ակցիաներ, պահանջը մեկն էր՝ Պերմյկովին հանձնել հայ իրավապահներին, նրա դատավարությունն ընթանա Հայաստանում՝ հայաստանյան օրենքներին համապատասխան: Փետրվարի 3-ին ՀՀ գլխավոր դատախազ Գ. Կոստանյանը Գյումրի քաղաքում ՀՀ յոթ քաղաքացիների սպանության դեպքի առթիվ հարուցված քրեական գործի վարույթը ՀՀ իրավապահ մարմիններին փոխանցելու վերաբերյալ միջնորդությամբ դիմել է ՌԴ գլխավոր դատախազ Յու. Չայկային: Պատասխան դեռևս չկա:

Նախորդող հրապարակումներ՝
Ավետիսյանների իրավահաջորդների փաստաբանները հանդիպել են գլխավոր դատախազին. «Որոշակի առումով համարում ենք արդյունավետ»
Գլխավոր դատախազը պատրաստ է ընդունել Գյումրիում սպանված Ավետիսյանների հարազատներին
Ավետիսյանների հարազատները չեն դիմել ռուսական կողմին` իրավահաջորդ ներգրավելու պահանջով. փաստաբան
Ավետիսյանների հարազատնները փաստաբանների նոր խումբ են ուզում
Ավետիսյանների հարազատները պատասխան չստանալու դեպքում ուրբաթ օրը ցույց կանեն
Գյումրիի ողբերգությունից 40 օր անց. «Ռուսական կողմը պատրաստ չէ հանձնել Պերմյակովին»
Բոլոր հարցերին չեմ պատասխանել, քանի որ գոյություն ունի նախաքննության գաղտնիություն». Գևորգ Կոստանյան