Ձեր վստահելի աղբյուրը

«Վերջին զանգին» նվիրված միջոցառումների անվտանգության ապահովման հետ կապված ոստիկանությունը տարել է մի շարք նախապատրաստական աշխատանքներ, այդ թվում այցելություններ Երևանի և մարզերի ավագ դպրոցներ: Լրագրողների հետ հանդիպման ժամանակ ասաց ճանապարհային ոստիկանության ճանապարհապարեկային ծառայության բաժնի պետ, ոստիկանության գնդապետ Նորիկ Սարգսյանը:

«Երեխաներին հորդորել ենք զերծ մնալ մեքենան վարելը խրախճանքի միջոց դարձնելուց»,- ասաց նա՝ միաժամանակ հավելելով, որ նախորդ տարիների վիճակագրությունը ցույց է տալիս, որ չնայած ոստիկանության հորդորների, խնդրանքների, այդ օրը լինում են դեպքեր, երբ մեքենան վարում է անչափահասը կամ վարում են մեծահասակները, սակայն երեխաները կախված են լինում դռներից, պատուհաններից, որը վտանգավոր է երթևեկության համար:

2014-ին, ներկայացված տվյալների համաձայն, «Վերջին զանգի» օրը 86 տրանսպորտային միջոց է տեղափոխվել ՃՈ հատուկ պահպանվող տարածք:

«Բարեբախտաբար, անցած տարի «Վերջին զանգի» օրը շրջանավարտի մասնակցությամբ որևէ ճանապարհատրանսպորտային պատահար տեղի չէր ունեցել»,- նշեց Ն. Սարգսյանը:

Նա ասաց, որ Ճանապարհային ոստիկանության բոլոր ուժերը կենտրոնացնելու են դպրոցամերձ փողոցներում, այնպիսի վայրերում, որտեղ կազմակերպվելու են «Վերջին զանգին» նվիրված միջոցառումներ:

«Դժբախտ դեպքերից խուսափելու համար հորդորում, խնդրում, պահանջում ենք շրջանավարտների ծնողներից, հարազատներից, թույլ չտալ, որ երեխաները հայտնվեն մեքենաների ղեկին, այլապես գործ կունենան Ճանապարհային ոստիկանների հետ: Հավաստիացնում եմ՝ այն երեխան, ով կփորձի վարել մեքենան, դա կտևի մինչև առաջին իսկ ճանապարհային ոստիկանին հանդիպելը: Հանդիպելուց հետո անմիջապես կատարվելու են օրենքով նախատեսված ամենախիստ գործողություները: Ներողամտություն չի լինելու: Նախորդ տարվա փորձը ցույց տվեց, որ միայն մեր խստապահանջ վերաբերմունքի արդյունքում մենք կարողացանք օրն ամփոփել առանց միջադեպերի»,- ասաց ճանապարհային ոստիկանության ճանապարհապարեկային ծառայության բաժնի պետը:

Ն. Սարգսյանի խոսքով, վարչական պատասխանատվության կենթարկվի այն անձը, ում 16 տարին լրացած չէ, հետևաբար առանց վարորդական վկայականի վարում է մեքենա, տուգանքը կազմում է 20 հազար դրամ, և ղեկը հանձնողը՝ 10 հազար դրամի չափով:

Նա նաև խնդրեց վարորդներին, գիտակցել օրվա կարևորությունը, առանձնահատկությունը, լինել առավել ուշադիր, հատկապես դպրոցամերձ փողոցներում շտապողականություն չցուցաբերել, ղեկին լինել միայն սթափ վիճակում: