Ձեր վստահելի աղբյուրը

Սահմանադրական բարեփոխումների մասնագիտական հանձնաժողովի անդամները մինչև հունիսի 12-ը կհանդիպեն ՍԴ բարեփոխումների նախագծում առաջարկություններ ներկայացրած կուսակցությունների ներկայացուցիչների հետ` քննարկելու առաջարկները: Այդ մասին այսօր լրագրողների հետ հանդիպման ժամանակ հայտարարեց մասնագիտական հանձնաժողովի նախագահ, ՍԴ նախագահ Գագիկ Հարությունյանը:

Նշենք, որ առաջարկություններ ներկայացրել էին 14 քաղաքական ուժեր: Հարությունյանը տեղեկացրեց, որ արդեն իսկ հանդիպել են Հայ Յեղափոխական Դաշնակցություն և Ազգային ինքնորոշում միավորում կուսակցությունների ներկայացուցիչների հետ: Մյուսների հետ կհանդիպեն առաջիկայում:

Հարությունյանն առանձնացրեց «Բարգավաճ Հայաստան» կուսակցության ներկայացուցիչների հետ հանդիպումը, ասաց, որ նրանք վերապահումներ են հայտնել. «Նրանք շեշտել են, որ միայն կառավարման համակարգին, մարդու իրավունքներին վերաբերող գլուխների բովանդակային քննարկման մասնակից կլինեն: Սա առաջին հանդիպման արդյունքն էր, թե ինչպիսին կլինի վերջնական որոշումը, տեղյակ չենք»:

Մինչև Վենետիկի հանձնաժողովի լիագումար նիստը` հունիսի 18-19-ը, նախագիծը, Հարությունյանի խոսքով, դժվար պատրաստ լինի, հետևաբար ՎՀ հանձնաժողովին այն ամբողջությամբ կներկայացվի հուլիսի 1-2-ին ու կլինի քննարկում: Այնուհետև Հայաստանում կսպասեն ՎՀ փորձագետների պատասխանին և հետո միայն կներկայացվի Հանրապետության նախագահի դատին:

«Աշնանը մենք մեր մասով գործը ավարտած կլինենք, թե ինչ տեղի կունենա դրանից հետո, դժվար է ասել», -ասաց Հարությունյանը` պատասխանելով հանրաքվեի անցկացման հնարավոր ժամկետների մասին հարցին:

Արդյոք Վենետիկի հանձնաժողովը դիրքորոշում հայտնե՞լ է հայեցակարգի նախագծի շուրջ քաղաքական փոխհամաձայնության վերաբերյալ և ինչպես է հենց ինքը` Հարությունյանը վերաբերում կուսակցությունների փոխհամաձայնեության բացակայությանը հարցին, Հանձնաժողովի նախագահը նախ չհամաձայնեց, որ փոխհամաձայնություն հայեցակարգի շուրջ չկա, այնուհետև ասաց. «Միանշանակ է, որ քաղաքական որոշակի գործընթացի բացակայության պարագայում հայեցակարգը ներկայացնելը անիմաստ է: Եթե ի սկզբանե մերժողական էր դիրքորոշումը ուժերի մոտ, հետո աստիճանաբար կուսակցությունների մոտ տեղի ունեցավ դիրքորոշման փոփոխություն և սկսեցին բովանդակային առաջարկներ, նկատառումներ ներկայացնել: Դա գործընթաց է, և եթե դա բերի նրան, որ քաղաքական կոնսոլիդացիան ունենա նկատելի որակ, կլինի ողջունելի և հնարավոր կլինի քննարկումներն ավելի բովանդակային դարձնել»:

Ինչ վերաբերում է ՍԴ հայեցակարգի նախագծի երկու տարբերակ ներկայացնելուն, ապա Հարությունյանի խոսքով, բարեփոխումներ նախաձեռնողը, այսինքն` Հայաստանի նախագահը, ճիշտ չի լինի Ազգային ժողովին երկու տարբերակ ներկայացնի:

«Ոչ մի փուլում չի բացառվում, որ Ազգային ժողովը իր տարբերակը ներկայացնի: Այդ պարագայում կարող են առաջանալ այլընտրանքային տարբերակներ», -հավելեց ՍԴ նախագահը:

Լրագրողը հետաքրքրվեց հայեցակարգի նախագծի ընդունման դեպքում իշխանությունների վերարտադրման հնարավորության մասին, ինչին Հարությունյանն արձագանքեց այսպես. «Գործող Սահմանադրության պարագայում իշխանության վերարտադրվելու հնարավորություններն ավելի մեծ են, քան փոփոխվելու դեպքում: Դա միանշանակ է»:

Հարակից հրապարակում`
Վենետիկի հանձնաժողովը տպավորված է եղել Հայաստանի ՍԴ բարեփոխումների նախագծով