Ձեր վստահելի աղբյուրը

Սյունիքի մարզպետ Սուրիկ Խաչատրյանի որդու` Տիգրան Խաչատրյանի փաստաբան Արմեն Մելքոնյանը պատրաստվում է բողոքարկել Արաբկիր և Քանաքեռ Զեյթուն վարչական շրջանների ընդհանուր իրավասության դատարանի որոշումը` Խաչատրյանին երկու ամսով կալանավորելու մասին: Այդ մասին Panorama.am-ին տեղեկացրեց ինքը` փաստաբանը:

Հիշեցնենք` հուլիսի 27-ին Արաբկիր և Քանաքեռ Զեյթուն վարչական շրջանների ընդհանուր իրավասության դատարանը բավարարել էր քննչական կոմիտեի քննիչի միջնորդությունը, և Տիգրան Խաչատրյանը կալանավորվել էր 2 ամսով: Նա մեղադրվում է Գորիսի Սդղի գյոլ կոչվող տարածքում մայիսի 2-ին տեղի ունեցած վիճաբանության ժամանակ Հարություն Զաքարյանին մարմնական ծանր վնաս պատճառելու համար:

«Չեմ կարող ասել` ում, բայց իմ պաշտպանյալ Տիգրան Խաչատրյանը ինչ-որ անձանց թիրախում է: Մեղադրանքը չենք ընդունում ու պատրաստվում ենք բողոքարկման փուլերն անցնել», -հավելեց պաշտպանը:

Դիտարկմանը, թե պնդումներ կան, որոնց համաձայն Տիգրան Խաչատրյանը «Սդղի գյոլում» տեղի ունեցած վիճաբանության ակտիվ մասնակիցներից է եղել, փաստաբանը արձագանքեց, որ իրենք չեն հերքում` Տիգրան Խաչատրյանը դեպքի վայրում եղել է ու հավելեց. «Եթե դուք փողոցում հայտնվեք ու տեսնեք, որ մի տեղ վիճաբանություն և կռիվ է, կփորձեք միջամտել, բաժանել, դա նշանակում է դուք անձա՞մբ կատարած կլինեք, ըստ ձեզ»:

Այսինքն Խաչատրյանը բաժանողի դերո՞ւմ է եղել, հարցին, փաստաբանը պատասխանեց. «Իմ ունեցած տեղեկություններով` այո»:

Բաժանելու ժամանակ մարմնական ծանր վնասվածք չի՞ հասցրել հարցին, Մելքոնյանը պատասխանեց. «Եթե երեք ամիս շարունակ հարցաքննություն է կատարվում և այդ ամիսների ընթացքում հարցաքննվում են տասնյակ, հարյուրավոր անձինք, որևիցե մեկը որևիցե տող անգամ չի գրում, որ Տիգրան Խաչատրյանը որևիցե մեկին հարվածել է, նույն տուժողը որևիցե անգամ չի գրում, որ Տիգրան Խաչատրյանն է իրեն հարվածել, հանկարծ, չգիտես ինչու, հուլիսի 25-ին հիշողությունը պայծառանում է ու հիշում, որ Տիգրան Խաչատրյանն է իրեն հարվածել: Դուք հավատում ե՞ք դրան»:

Փաստաբանն ասաց, որ գործող տուժող Հարություն Զաքարյանի ներկայացրած մեխանիզմը, թե ինչպես է Տիգրան Խաչատրյանը իրեն հարվածում, «բացարձակ տրամաբանության մեջ չի տեղավորվում»:

«Ցուցմունք է տալիս ու ասում է` ինձ գցել են գետնին, քացիներով խփում էին, մեր կողմից տրված 20 հարցերից ոչ մեկին չի պատասխանում, ասում է` սկզբից Տիգրանը հարվածեց ճակատիս, հետո մի քանի վայրկյան անց ոտքով հարվածեց աչքիս: Առաջին հարվածի ժամանակ մարդը մեխանիկորեն անգամ պետք է պաշտպանվի. Եթե ճակատին առաջին հարվածը ստանում է, Տիգրանը չէր կարող 2-րդ հարվածը աչքին հասցնել ինքը պետք է պաշտպանված լիներ, ձեռքերով փորձեր հետ մղել: Հարցերին, թե Տիգրան Խաչատրյանի ոտքը ոնց է տարբերել, չի կարողանում ասել: Չի կարողանում ասել, թե ինչ հագուստ ուներ հագին այդ ժամանակ ու նմանատիպ շատ այլ բաներ: Իմ ունեցած տեղեկություններով, Տիգրանից անգամ շնորհակալություն են հայտնել կռվի մասնակիցներին բաժանելու համար»,-ներկայացրեց Մելքոնյանը:

Փաստաբանից հետաքրքրվեցինք, թե ինչո՞ւ երբ արդեն հայտնի էր դեպքի մասին և հայտնի էր, որ Տիգրան Խաչատրյանը մասնակցություն է ունեցել և ավելին, հարուցվել էր քրեական գործ, նա գնաց Հայաստանից Օդեսա, փաստաբանը պատասխանեց, որ նա չի փախել որևէ տեղ ու ներկայացրեց հետևյալը.

«Դեպքից հետո իմ հետ պայմանագիր կնքվեց նրա շահերը ներկայացնելու մասին, բայց ես մեկնեցի Ռուսաստան բուժման խնդիր ունեի: Մինչև մայիսի 20-ը Տիգրան Խաչատրյանը ծանուցագիր չի ստացել, մայիսի 20-ին Խաչատրյանը ստանում է ծանուցագիր, ներկայանալու քննչական` առերեսման մասնակցելու համար: Կապվում է ինձ հետ ՌԴ, և ես նրան ասում եմ, որ մոտակա թռիչքը ընդամենը երեք օրից է ու խնդրում եմ Տիգրանին դիմում գրել քննչական, որ իմ փաստաբանը գտնվում է Ռուսաստանում, կվերադառնա երեք օրից, խնդրում եմ 4 օրով հետաձգեք 24-ին կներկայանանք: Քննչական կոմիտեն բավարարում է Տիգրանի միջնորդությունը մայիսի 20-ին: Բայց հարց է`այդ ինչպե՞ս են մայիսի 23-ին բերման ենթարկելու որոշում կայացնում: Հասկանում ե՞ք` ինչ է կատարվում, բավարարում են միջնորդությունը ու հետո բերման ենթարկելու որոշում կայացնում: Ավելին, ես և մյուս պաշտպանը գնացել ենք քննչական կոմիտե ու սպասել, որ տուժողը գա հարցաքննության և ժամերով ենք սպասել: Ի՞նչ փախնելու մասին կարող է խոսք լինել»:

Փաստաբանը չբացառեց, որ Տիգրան Խաչատրյանին կալանավորելով փորձել են մեղմել Խաչատրյանների ընտանիքի դեմ հասարակական դժգոհությունը, մինչդեռ «պետք է ճանաչել մարդկանց և հետո միայն գնահատականներ տալ»:

Նրա խոսքով, Տիգրան Խաչատրյանին ինքը մինչև նրա պաշտպանությունն ստանձնելը չի ճանաչել, բայց հիմա, նրա հետ շփման արդյունքում եկել է եզրահանգման. «Լրատվամիջոցները, հասարակությունը մարդուն չճանաչելով այնպես կարող են ներկայացնել, որ հարազատ ծնողն անգամ իր որդուն չճանաչի: Ես շփվել եմ երիտասարդի հետ, և բացարձակ որևէ վատ տպավորություն կամ վատ վարքագիծ չեմ նկատել: Ուղղակի, ցավոք սրտի, չգիտես` ինչու նրան վատով են ներկայացնում: Տիգրան Խաչատրյանն այսօրվա իրականության զոհն է դարձել»:

Հարակցի հրապարակումներ`
Սուրիկ Խաչատրյանի որդուն կալանավորելու միջնորդություն է ներկայացվել դատարան
Զաքարյանները պնդում են, որ Սուրիկ Խաչատրյանի եղբոր մեղադրանքը պետք է խստացվի
Սուրիկ Խաչատրյանի որդին ձերբակալվել է (լրացված)