Ձեր վստահելի աղբյուրը

Սահմանադրական իրավունքի մասնագետ, Իրավաբանական գիտությունների թեկնածու Ռուստամ Մախմուդյանը պնդում է, որ Հայաստանում սահմանադրական բարեփոխումներ իրականացնելու անհրաժեշտությունը կար հենց միայն երկրի կառավարման մոդելը հստակեցնելու համար:

«Սահմանադրությամբ երկրի կառավարման մոդելի հստակեցումը ժամանակի պահանջն էր, քանի որ անցումային փուլում գտնվող մեր երկրի համար դա անհրաժեշտ էր»,- Panorama.am-ի թղթակցի հետ զրույցում ասաց Մախմուդյանը` մեկնաբանելով հանրության քննարկմանը ներկայացված Սահմանադրության նախագիծը:

Փաստաթուղթը, ըստ Մախմուդյանի, «հասարակության հոգեկերտվածքին շատ մոտ է» և այն քննարկելն ու քննադատելը պետք է արվի գործող Սահմանադրության ու դրա տված հնարավորությունների համատեքստում:

«Կառավարման խորհրդարանական մոդելի պարագայում առյուծի բաժինը պետք է դրվի խորհրդարանի վրա: Մնում է ունենալ առողջ քաղաքական գաղափարախոսությամբ ձևավորված պառլամենտ, որտեղ էլ իրենք իրենց ներսում զսպումների ու հակակշիռների մեխանիզմների միջոցով կկարողանան կառավարումն իրականացնել», - հավելեց Մախմուդյանը:

Նրա կարծիքով, երկրում ներդրվող խորհրդարանական կառավարման մոդելը զայրույթի կամ քննադատության առարկա չպետք է դառնա: Ինչ վերաբերում է նախագծի ընդդիմախոսների պնդումներին, թե նախագիծը իշխանությունների համար անվերջ վերարտադրվելու համար հող է նախապատրաստում, ապա Մախմուդյանի խոսքով, վերարտադրվելու ցանկություն ունեցող քաղաքական ուժը եթե ցանկանա վերարտադրվել, ապա գործող Սահմանադրության պարագայում էլ կարող է դա անել:

«Սահմանադրությունը որևէ քաղաքական ուժի կամ գործող իշխանության համար ստեղծվող փաստաթուղթ չէ և չպետք է լինի: Դա պատմական փաստաթուղթ է», -հավելեց սահմանադրական իրավունքի մասնագետը:

Նրա պնդմամբ, փաստարկված չեն այն հայտարարությունները, որոնց համաձայն Սահմանադրության նախագծում «վտանգավոր դրույթներ կան»:

«Այդ բառը տեղին չէ, միգուցե վիճահարույց են ձևակերպումները կամ թերի են կամ նույնիսկ` անտեղի: Բայց ինստիտուցիոնալ ու գաղափարային առումով, կարծում եմ, ամբողջովին բարեփոխված Սահմաանդրություն է ներկայացված: Մենք մերժողականության սինդրոմով ենք տառապում: Դեռ նախագծի 7 գլուխն է պատրաստ ու մենք չգիտենք, թե անցումային դրույթներն ինչ են նախատեսել ու այդ պարագայում, մի փոքր շտապում ենք կտրուկ և մերժողական դատողություններ անելով», -հավելեց Ռուստամ Մախմուդյանը:

Անդրադառնալով Սահմանադրությամբ ներմուծվող նոր դրույթին, որի համաձայն ազգային փոքրամասնության ներկայացուցիչները ևս պետք է ներկայացված լինեն խորհրդարանում, ազգությամբ եզդի Մախմուդյանն ասաց, որ այդ բարեփոխումը ողջունելի է:

«Նախագիծը դեռ պետք է հավանության արժանանա հասարակության կողմից, և հետո միայն Ընտրական օրենսգրքով կկարգավորվի հարցը, թե ինչ թվաքանակով ու ինչ համամասնությամբ պետք է ներկայացված լինեն փոքրամասնությունները խորհրդարանում»,-հավելեց նա:

Հարակից հրապարակումներ`
Սահմանադրության նախագծում ամեն ինչի մեջ տրամաբանություն կա, մնում է լավ աշխատեցնել. Գագիկ Ղազինյան
Արա Զոհրաբյան. Ապագա Սահմանադրությունը, ընդունվելու դեպքում, չպետք է տեղ թողնի նույնասեռ ամուսնությունների համար
Վենետիկի հանձնաժողովը աննախադեպ գոհունակություն է հայտնել Սահմանադրության նախագծի վերաբերյալ. Արա Ղազարյան