Ձեր վստահելի աղբյուրը

Սահմանադրության փոփոխությունների նախագծում «կայուն մեծամասնության» և ընտրությունների 2-րդ փուլ անցկացնելու մասին 89-րդ հոդվածի վերաբերյալ մեր հասարակության մոտ կա թյուրըմբռնում: Այդ մասին Panorama.am-ի թղթակցի հետ զրույցում տեղեկացրեց Սահմանադրական բարեփոխումների մասնագիտական հանձնաժողովի անդամ, ԵՊՀ իրավագիտության ֆակուլտետի դեկան Գագիկ Ղազինյանը:

«Խորհրդարանական լսումների ժամանակ ներկայացվեց, թե արդեն իսկ ինչ փոփոխություն է կատարվել` հիմնական լուծումները տեղափոխված են Ընտրական օրենսգիրք և եթե խոսքը գնում է 2-րդ փուլի կամ կայուն մեծամասնության մասին, ապա ինչ կտրվածքով է դա լինելու: Հստակեցվում է, թե երբ կարող է լինել «2-րդ փուլ» կոչվածը, որը կարող է նաև չլինել. Եթե առաջին փուլից հետո ձևավորվում է այդ մեծամասնությունը դաշինքի ձևով, ապա 2-րդ փուլի կարիք բնականաբար, չկա: Այսինքն` ընտրությունը եղավ, մի ուժ հավաքեց անհրաժեշտ ձայն, չի լինի 2-րդ փուլ, չհավաքեց անհրաժեշտ ձայն, դաշինքի հնարավորություն կա, էլի չի լինի 2-րդ փուլ: Իսկ եթե որևէ կերպ հնարավոր չի լինի դաշինք ձևավորել, ինչպես այսօրվա Թուրքիայում է, նշանակում է, կլինի 2-րդ փուլ` առավել շատ ձայներ ստացած երկու կուսակցությունների կամ դաշինքների միջև: Շատ հնարավոր է, որ 2-րդ փուլի կարիք չլինի», - հավելեց պարոն Ղազինյանը:

89-րդ հոդվածը, որը Սահմանադրության նախագծի ընդդիմախոսների բուռն քննադատությանն էր արժանացել, նրա խոսքով, այժմ վերաշարադրված տեսքով մի քանի տարբերակ ունի: «Ես ձեզ ասացի այն գաղափարները, որոնք դրվելու են ապագա 89-րդ հոդվածի հիմքում: Այսօր պաշտոնական ձևակերպում չկա: Նախագիծն Ազգային ժողով ուղարկելուց հետո է եղել փորձագետների և Վենետիկի հանձնաժողովի հետ հանդիպում, որի արդյունքում եկել ենք համաձայնության, որ հիմնական դրույթները, մանրամասները տեղափոխվեն Ընտրական օրենսգիրք, իսկ Նախագծում մնա գաղափարը: Ընտրական օրենսգրքով կմանրամասնվի, թե ինչպես պետք է լինի ձևակերպումը` առաջին փուլից հետո եթե չլինի մեծամասնություն: Հնարավոր է Ընտրական օրենսգիրքը ինքը նախատեսի հնարավորություն 2-րդ փուլ անցկացնելու: Մոտավորապես գաղափարը սա է լինելու», -հավելեց պարոն Ղազինյանը:

Խորհրդարանում սեպտեմբերի 4-ին Սահմանադրական փոփոխությունների նախագծի վերաբերյալ լսումներում հնչած մտահոգություններից մյուսը վերաբերում էր ընտանիք կազմելու ձևին, և շատերը հայտարարում էին, թե այդ դրույթով Հայաստանում միասեռական ամուսնություններն են թույլատրվում: Գագիկ Ղազինյանի պնդմամբ, նման բան Սահմանադրության նախագծում չկա և հնչած մտահոգությունները «թյուրըմբռնման արդյունք են»:

«Պետք չէ դավադրություններ տեսնել: Շատ ենք մտածել այնպես ձևակերպել, որ թյուրըմբռնման տեղիք չկա ու մեր կարծիքով, Նախագծում տեղ գտած ձևակերպումը լավագույնն է և կասկածի տեղիք չի տալիս: Բայց եթե մարդիկ ունեն առաջարկություններ, թող ասեն` ինչպես կցանկանան տեսնել այդ նորմը մեր Սահմանադրության մեջ: Որևէ մեկը չի կարող ընդունել նման մոտեցումն ընդունելի դարձնել մեր հասարակության մեջ», -ասաց Ղազինյանը:

Խորհրդարանում տեղի ունեցած լսումների ժամանակ հնչած առաջարկությունները, Հանձնաժողովի անդամն ասաց, որ կքննարկվեն և «հիմնավորները» կընդունվեն:

Ինչ վերաբերում է Սահմանադրական փոփոխությունների դեմ ձևավորվող «Ոչ»-ի շարժմանը, ապա Ղազինյանը դա բնական երևույթ համարեց: «Շատ նորմալ երևույթ է, այդպես էլ պետք է լինի: Իսկ ո՞վ ասաց, որ պարտադիր պետք է լինի 100 տոկոսանոց կոմունիստական «այո»»,-նկատեց մասնագետը:

Հարակից հրապարակում`
Սահմանադրության նախագծի վիճահարույց 89-րդ հոդվածը կխմբագրվի. Հովհաննես Սահակյան