Ձեր վստահելի աղբյուրը

ՀՀ-ում Պրոբացիայի ծառայության շրջանակում կիրառվելու է կալանավորված անձանց և դատապարտյալների նկատմամբ հսկողության այլընտրանքային միջոցներից էլեկտրոնային մոնիտորինգը, որը ժամանակակից տեխնիկայի, տեխնոլոգիաների միջոցով անձի տեղաշարժի գտնվելու վայրի նկատմամբ հսկողությունն է: Լրագրողների հետ զրույցում ասաց Եվրոպայի խորհրդի Երևանյան գրասենյակի «Աջակցություն Հայաստանում պրոբացիոն ծառայության ստեղծմանը» ծրագրի ղեկավար Հայկ Խեմչյանը:

Ըստ նրա, կան էլեկտրոնային մոնիտորինգի տարբեր եղանակներ` հատուկ սարքերի միջոցով հսկում են անձի ամբողջ տեղաշարժը, կամ տնային կալանքի դեպքում անձի գտնվելը մշտական բնակության վայրում օրվա որոշակի ժամերին:

«Մենք պետք է ընտրենք, թե Հայաստանի դեպքում էլեկտրոնային մոնիտորինգի որ եղանակն է ավելի նպատակահարմար և կիրառելի»,- ասաց Հ.Խեմչյանը:

Այսօր «Աջակցություն Հայաստանում պրոբացիոն ծառայության ստեղծմանը» ծրագրի կողմից կազմակերպվել է սեմինար՝ դատավորների, դատախազների, փաստաբանների, ՀԿ-ների ներկայացուցիչների մասնակցությամբ, որի նպատակն է, ըստ նրա, ներկայացնել էլեկտրոնային մոնիտորիգնի վերաբերյալ եվրոպական երկրների փորձը և մասնագետների օգնությամբ պարզել, թե էլեկտրոնային մոնիտորինգի որ տարբերակն ընտրել Հայաստանի համար:

Նա հայտնեց, որ ծրագրի շրջանակում առաջիկայում վարձակալական հիմունքներով ձեռք են բերելու սարքավորում՝ փորձարկելու մինչև ծրագրի ավարտը:

«Հույս ունենք մինչ ծրագրի ավարտը կունենանք համապատասխան օրենսդրություն և ծրագրի ավարտից հետո կկարողանանք արդեն հիմնական հիմունքներով իրականացնել էլեկտրոնային մոնիտորինգը»,- նշեց նա՝ ընդգծելով, որ եվրոպական շատ երկրներում էլեկտրոնային մոնիտորինգն ապացուցել է իր արդյունավետությունը:

Սեմինարին ներկա ԵԽ հայաստանյան գրասենյակի ղեկավարի տեղակալ Նաիրա Ավետիսյանն ասաց, որ այս փուլում իրենց նպատակն է տեսնել, թե ինչքանով է արդյունավետ գործում համակարգը, այնուհետև նոր ավելի լայնածավալ դարձնել:

«Այսօր բավարար օրենսդրական դաշտ չկա ծրագրի իրագործման համար: Այդ իսկ պատճառով այսօր ծրագրի շրջանակներում եղած օրենսդրական դաշտի սահմաններում փորձնական ծրագիր ներմուծելով՝ ուզում ենք տեսնել, թե որոնք են այն դասերը, որոնք պետք է քաղել և դրա հիման վրա փոխել օրենսդրությունը»,- ասաց Ն. Ավետիսյանը:

Հիշեցնենք, «Աջակցություն Հայաստանում պրոբացիոն ծառայության ստեղծմանը» ծրագիրն իրականացվում է Եվրոպայի խորհրդի կողմից, Նորվեգիայի կառավարության ֆինանսավորմամբ:

Նախորդող հրապարակումներ՝ 
Թե ինչքանով արդյունավետ կգործի պրոբացիայի ծառայությունը ՀՀ-ում՝ կախված է շահագրգիռ մարմիններից. փորձագետ (տեսանյութ)