Ձեր վստահելի աղբյուրը

Al Jazeera հեռուստաընկերության եթերում «Insight Story» հաղորդման շրջանակներում անդրադառնալով ՄԻԵԴ-ի կողմից «Փերինչեքն ընդդեմ Շվեյցարիայի» դատական գործով կայացրած վճռին փաստաբան Ջեոֆրի Ռոբերթսոնը նշել է, որ ՄԻԵԴ-ն ամբողջովին բավարարել է Հայաստանի կառավարության պահանջները:

 «Մենք իրապես երջանիկ ենք, քանի որ դատարանը բավարարել է մեր պահանջները: 10 դատավորներ ասեցին, որ Ցեղասպանության ճանաչման հարցն ընդհանրապես չի քննարկվել, իսկ դատավորներից 7-ն էլ հայտնեցին, որ Հայոց ցեղասպանությունը պատմականորեն հաստատված փաստ է»,- նշել է Ռոբերթսոնը:

Վերջինս նաև հավելել է, որ հայկական կողմի պահանջները բավարարված լինելու մասին է վկայում նաև այն, որ ՄԻԵԴ-ի այս որոշմամբ Թուրքիան այլևս չի կարող արդարացնել Հրանտ Դինքի և նրա պես մարդկանց նկատմամբ իրականացվող հետապնդումները` վերջիններին մեղադրելով 301-րդ հոդվածը խախտելու, այն է՝ «թուրք ժողովրդին վիրավորելու» համար։

Փաստաբանը ընդգծել է, որ կարևոր էր այն հանգամանքը,  որ դատարանի կողմից սահմանվեց՝ «իսկապես Ցեղասպանության ժխտումը կարող է քրեորեն պատժելի լինել, եթե այն առաջացնում է հասարակական կարգի խախտում կամ սերմանում է ռասայական ատելություն»: