Ձեր վստահելի աղբյուրը

Հայ փաստաբանների միջնորդությամբ դատահոգեբուժական փորձաքննության արդյունքներով, Գյումրիում Ավետիսյանների ընտանիքի 7 անդամների սպանության մեջ մեղադրվող ռուս զինծառայող Վալերի Պերմյակովին հատուկ են եղել բռնկվողությունը, կամակորությունը, իրավիճակային ագրեսիվությունը, ֆանտազյորությունը, պրիմիտիվությունն ու շտապողականությունը, ինչն էլ կարող է պայմանավորել նրա վարքը և այն, ինչ կատարվել է Ավետիսյանների հետ: Այդ մասին այսօր լրագրողների հետ հանդիպման ժամանակ ներկայացրեցին այս գործով Ավետիսյանների իրավահաջորդների ներկայացուցիչ-փաստաբանները:

Մասնավորապես, փաստաբան Լուսինե Սահակյանը տեղեկացրեց, որ դեռ 14 տարեկան հասակից Պերմյակովը թմրամիջոցներ և ոգելից խմիչքներ է օգտագործել:

Փաստաբանը ներկայացրեց, որ ծանոթացել են ռուսական կողմում արված փորձաքննությունների եզրակացություններին և եզրակացրել` Վալերի Պերմյակովը լիովին առողջ անձնավորություն չէ և ունի լուրջ խնդիրներ: Փաստաբանի խոսքով՝ շատ տարօրինակ կերպով ռուսական կողմի փաստաթղթերում նկարագրված էին փաստեր, որոնք հիմք էին տալիս դա պնդելու, որ նա ունի որոշակի խնդիրներ:

«Ամբողջ փաստաթղթում նրանք նկարագրում էին այդ իրավիճակները, որոնց ես կանդրադառնամ, սակայն հետո նշում են, որ նա լիովին առողջ անձնավորություն է և ոչ մի խնդիր չունի: Արդեն իսկ դատավարության ընթացքում, երբ ռուսական կողմում դատավարություն էր կատարվում, մեզ մոտ լուրջ կասկածներ առաջացան Պերմյակովի վարքի հետ կապված, որովհետև շատ տարօրինակ էր, որ ամբողջ օրվա ընթացքում անձն իրեն պահում էր այնպես, կարծես իր դատը չլիներ: Այս փաստաթղթերին ծանոթանալով՝ մենք հասկացանք, թե ինչու», -հայտարարեց տիկին Սահակյանը:

Նրա ներկայացմամբ, եզրակացություններից ակնհայտ է դառնում, որ ժամանակին Պերմյակովը բազմիցս գտնվել է հոգեբույժների հսկողության տակ, պառկել է հոգեբուժական բաժանմունքներում, այն բանից հետո, երբ զորակոչվել է բանակ: Բանակում էլ տարօրինակ վարք է ունեցել, մասնավորապես, ինչպես տիկին Սահակյանն ասաց, աթոռով հարվածել է սպաներից մեկին միայն այն բանի համար, որ սպան խանգարել է իրեն և աթոռը քաշել է իր տակից: Ինքը, աթոռը վերցնելով, հարվածել է այդ սպային: Նաև սուիցիդալ որոշակի հատկանիշներ են նրա մոտ դրսևորվել, ագրեսիա:

Փաստաբանը մի դրվագ ներկայացրեց. «Նրա համածառայակիցները նշում են, որ առնվազն 2-3 օր նա շատ տխուր էր, անընդհատ լացում էր, և երբ նրան հարցրել են, թե ինչումն է խնդիրը, նա ասել է, որ մայրը մահացել է: Եվ երեք օր լացելուց հետո, ըստ ծառայակիցների, նա մի կերպ հանդարտվել է, սակայն մենք գիտենք, որ նրա մայրը կենդանի է»:

Փաստաբանի խոսքով, «Odnoklassniki» սոցիալական կայքով Վալերի Պերմյակովը նամակագրություններ է ունեցել իր ընկերների հետ և նշել, որ ինքն այստեղ մասնակցում է ինչ-որ հակամարտության, և յուրաքանչյուր գիշեր իրենք 40 հազարական կրակոց են արձակում:

«Հոգեբույժները հստակ նշել են, որ արգելվում է, որ նա զենքով ծառայություն իրականացնի, և սա փաստաթղթավորված է: Սակայն, ինչպես մենք գիտենք, նույնիսկ այն բանից հետո, երբ հատուկ ցուցում է եղել, որ նա չի կարող զենքով ծառայություն իրականացնել, այդուհանդերձ, զենքը հայտնվել է նրա ձեռքում, և նա ծառայության եղել է զենքով, ոչ թե այդ զենքը հափշտակել է և նոր լքել ծառայության վայրը»,- հայտարարեց Լուսինե Սահակյանը` պնդելով, որ շատ նման փաստեր կան, որոնք խոսում են այն մասին, որ Վալերի Պերմյակովը խնդիրներ ունի:

Ինչ վերաբերում է հայկական կողմի հոգեբանների եզրակացություններին, ապա փաստաբանն ասաց, որ ըստ դրանց, Վալերի Պերմյակովը ունի խնդիրներ` ինֆանտիլ անձ է, բնավորության պսիխոպաթոնման գծերով և հուզական էմոցիոնալ թերհասությամբ, սակայն փորձագետները գտել են, որ նա մեղսունակ է: Ըստ Լուսինե Սահակյանի՝ փորձագետները եզրահանգել են, որ Վալերի Պերմյակովին հատուկ են իմպուլսիվություն, կամակորություն, եսակենտրոնություն, իրավիճակային ագրեսիվություն, բռնկվողականություն՝ տագնապային համակցումով, պրիմիտիվություն և ֆանտազյորություն, նաև հուզական լարվածության ժամանակ ադապտացիայի դժվարություններ, շտապողականություն՝ դյուրագրգռվածության համակցումով:

«Հոգեբանները և հոգեբույժները եկել են եզրահանգման, որ հենց այսպիսի հատկանիշներով է պայմանավորված նրա վարքը և այն, ինչ կատարվել է իրականում»,- ասաց Լուսինե Սահակյանը:

Փաստաբանը նաև տեղեկացրեց, որ երբ արդեն իսկ հանցագործությունը կատարվել էր, և Պերմյակովն անազատության մեջ էր, նրա մոտ խուզարկությամբ նոթատետրի մեջ ծնողներին ուղղված մի նամակ է հայտնաբերվել:

«Այնտեղ նա նշում է, այն, ինչ կատարվել է, ես չեմ արել, դա արել է իմ միջի մարդը: Նաև այնտեղ ինքը մանրամասն նկարագրում է, թե ինքն ինչ իրավիճակում է գտնվում հանցագործությունը կատարելիս։ Նա ասում է, որ մեկ վայրկյանում իմ սիրտը 1000 զարկ էր կատարում և այլն»,- ներկայացրեց փաստաբանը: