Ձեր վստահելի աղբյուրը

ՀՀ Սահմանադրական դատարանն այսօր քննում է 2014 թվականի հոկտեմբերի 10-ին Մինսկում ստորագրված՝ «Հայաստանի Հանրապետության՝ «Եվրասիական տնտեսական միության մասին» 2014 թվականի մայիսի 29-ի պայմանագրին միանալու մասին» պայմանագրում ամրագրված պարտավորությունների՝ ՀՀ Սահմանադրությանը համապատասխանելու հարցը: Նիստը մեկնարկել է ժամը 10:00-ին: Հարցը քննվում է գրավոր ընթացակարգով:

Նույն ժամին Սահմանադրական դատարանի դիմաց սկսվել է նաև բողոքի ակցիա:  

«Հայաստանի Հանրապետությունը կանգնած է անկախության, ինքնիշխանության, ժողովրդավարության և ազատ զարգանալու հնարավորությունների կորստի առջև։ Այդ վտանգը բխում է 2014 թվականի հոկտեմբերի 10-ին Սերժ Սարգսյանի կողմից Եվրասիական Տնտեսական Միության անդամակցման պայմանագիրը ստորագրելուց, ինչը պետք է դատաքննվի ՀՀ Սահմանադրական դատարանում սույն թվականի Նոյեմբերի 14-ին, ժամը 10։00-ին։ Այդ խայտառակ պատմական իրողությունը կասեցնելու գործընթացին մաս դարձեք՝ մասակցելով բողոքի ակցիային ՀՀ Սահմանադրական դատարանի մոտ, պահանջելով ՀՀ Սահմանադրական դատարանի գործը քննողներից և զեկուցողներից՝ Վ. Հովհաննիսյանից և Ա. Գյուլումյանից, հակասահմանադրական ճանաչել ԵՏՄ անդամակցումը։ Հավաքի իրազեկումն ընդունված է ի գիտություն Երևանի քաղաքապետարանի կողմից»,- այս մասին գրված է «ԵՏՄ անդամակցումը հակասահմանադրական է» ֆեյսբուքյան էջում:

Նշենք, որ ոստիկանները ակցիայի մասնակիցներին չեն թողնում մոտենալ ՍԴ շենքին: Նրանք, ովքեր մոտեցան շենքին, ոստիկանները հրելով հեռացրեցին: Ակցիային մասնակիցների թվում է նաև ԱԻՄ առաջնորդ Պարույր Հայրիկյանը, Միջազգային և անվտանգության հարցերի հայկական ինստիտուտի ղեկավար Ստյոպա Սաֆարյանը:

Նախորդող հրապարակում՝
«Այն, որ Սահմանադրության ոգին խախտված է Հայաստանում, փաստ է»