Ձեր վստահելի աղբյուրը

Մեծ պահքի 38-րդ օրն է:

«Ընթերցվածք` Ելք 4.21-5.3, Զաք. 9.9-16
«Ուրախացի´ր խնդությամբ, դուստրդ Սիոնի, կանչի´ր ցնծությամբ, դուստրդ Երուսաղեմի, ահա գալիս է քո թագավորը քեզ մոտ, քո արդար, փրկագործ ու խոնարհ թագավորը` հեծած էշի, էշի քուռակի վրա: Կառքերը պիտի ոչնչանան Եփրեմի երկրից, երիվարները` Երուսաղեմից, պատերազմողի աղեղը պիտի խորտակվի, և նա խաղաղություն պիտի բերի մարդկանց ու ազգերին» (Զաք. 9.9-10):

Զաքարիա մարգարեի այս խոսքերը մարգարեությունն են մեր փրկիչ Հիսուս Քրիստոսի գալստյան և Երուսաղեմ հաղթական մուտքի: Մի քանի օր անց պիտի տոնախմբենք Ծաղկազարդը` Հիսուսի մուտքն Երուսաղեմ: Այս մարգարեությունը, իբրև կատարված իրողություն է ներկայանում արդեն ավետարանիչների մոտ, թե ինչպե´ս է խաղաղության Թագավորը գալիս հաստատելու Իր թագավորությունը, որն այս աշխարհից չէ: Սա է պատճառը, որ ասվում է, թե` երիվարները և ռազմական կառքերը պիտի վերանան, աղեղը խորտակվի, քանզի նոր թագավորություն է հաստատվում, որի զենքն արդարությունն ու խաղաղությունն են, ողորմությունն ու սերը: Այսօր մենք մարգարեի միջոցով վերստին ունկնդիր ենք այս խոստմանը. «և նա խաղաղություն պիտի բերի մարդկանց ու ազգերին» (Զաք. 9.10):

Հիրավի, դա այդպես է, սակայն բնական հարց է ծագում մտքում, թե ի´նչ խաղաղության մասին է խոսքը, չէ՞ որ համայն աշխարհը երբևէ չի հանդարտվել պատերազմներից: Տերն ինքն է մեզ հարցի պատասխանը տալիս. «Խաղաղություն եմ թողնում ձեզ, իմ խաղաղությունն եմ տալիս ձեզ. ձեզ չեմ տալիս այնպես, ինչպես այս աշխարհն է տալիս. ձեր սրտերը թող չխռովվեն, և չվախենաք» (Հովհ. 14.27):

Աստծու խաղաղության մասին է խոսքը, ներքին մեր հոգևոր խաղաղության մասին, որը կարող է հաստատվել, եթե մեր սրտերն ուրախ են ու մխիթարված այն գիտակցությամբ ու ապրումով, որ Նա է «Ճանապարհը և Ճշմարտությունը և Կյանքը» (Հովհ. 14.6) և մեր գոյությունը լցվում է Նրանով: Այդժամ է, որ ճշմարիտ խաղաղությունը, որ այս աշխարհից չէ, այլ Ինքը Տերն է, կարող է հաստատվել մեզանում և առիթ տալ նաև մեր նյութական, տեսանելի աշխարհում իրական խաղաղության: Տիրոջ բերած խաղաղությունն այն է, երբ երկինքն արտացոլվում է իր ճշմարիտ, կենսապարգև շնորհներով ու գանձերով մեր հոգում, երբ հաշտություն կա մեր և ողջ արարչության միջև և գիտակցություն, որ մենք մասնիկն ու միաժամանակ պատասխանատուն ենք դրա, երբ մեր գործերը բխում են Աստծուց ու Իր սիրո պատվիրաններից և լրումը գտնում ի Քրիստոս: Այդ խաղաղությունն է հաստատվում մեզանում, երբ իբրև Աստծու որդիներ խաղաղություն ենք գործում` խաղաղարար ենք, առաջնորդվում ենք Քրիստոսի պատգամներով, Նրա տված երանիներով (Մատթ. 5.9):

Հետևապես, հոգևոր պատրաստության այս օրերին, երբ ընդառաջ ենք գնում Քրիստոսի Երուսաղեմ հաղթական մուտքին, տենչանք և ձգտենք, որ Աստծու ողորմությամբ մեր ներքին մարդու մեջ ի կատար ածվի Կողոսացիներին ուղղված թղթի այս հորդորը. «Որպես Աստծու ընտրյալներ, սրբեր և սիրելիներ, հագե´ք, ուրեմն, գութ, ողորմություն, քաղցրություն, խոնարհություն, հեզություն, համբերատարություն` հանդուրժելով միմյանց, ներելով միմյանց, եթե մեկը մյուսի դեմ գանգատ ունի. ինչպես Աստված Քրիստոսով ներեց ձեզ, նույն ձևով արեք և դուք: Եվ այս բոլորի վրա հագե´ք սերը, որ կապն է կատարելության: Եվ ձեր սրտերում թող հաստատվի Քրիստոսի խաղաղությունը» (Կող. 3.12-15):

Այս է քրիստոնյայի ճշմարիտ կյանքի ուղին, ուստի ներողամիտ լինենք միմյանց նկատմամբ, սիրենք դիմացինին ինչպես մեր անձը և արդյունքում` զգեստավորվենք Քրիստոսի խաղաղությամբ»,- ֆեյսբուքյան իր էջում օրվա խորհրդի մասին գրել է Մայր Աթոռ Սուրբ Էջմիածնի տեղեկատվական համակարգի ղեկավար Տեր Վահրամ քահանա Մելիքյանը:

Հիշեցնենք, որ փետրվարի 16-ից սկսվել է Մեծ Պահքի շրջանը: Այն տևում է 48 օր` Բուն Բարեկենդանից մինչև Ս. Հարության (Զատկի) տոնի նախօրեն: Այս տարի Ս. Հարության տոնը կնշվի ապրիլի 5-ին:

Նախորդող հրապարակումներ՝
Մեծ պահք. «Օրվա խորհուրդը մեզ թելադրում է անկախ ամեն հանգամանքից պարզապես հոգ տանել մեր կողքինի նկատմամբ»
Մեծ պահք. «Համոզված ենք, որ վերադասի կամ որևէ պաշտոնյայի փոխարեն մենք առավել լավ կղեկավարեինք»
Սբ. Գրիգոր Լուսավորչի սոսկալի չարչարանքների ու Վիրապ մուտքի հիշատակության օրն է
Մեծ պահք. «Վա՜յ նրան, որ իր հորը կասի, թե` ինչո՞ւ ծնեցիր ինձ, և մորը, թե` ինչո՞ւ ծննդաբերեցիր ինձ»
«Հարության հույսով գոտեպնդված`դարերի ընթացքում իրեն բաժին ընկած փորձությունները հաղթականորեն վերապրել է նաև հայ ժողովուրդը»
Մեծ պահք. «Աներկյուղ ապրենք մեր կյանքը»
Մեծ պահք. «Մեր ժողովուրդը կատարել է իր պատմական ընտրությունը»
Մեծ պահք. «... մեր գործերում և ձգտումներում նմանվենք մանուկներին»
Մեծ Պահքի խորհրդանշական շղթայի Անիրավ դատավորի կիրակին
Սեբաստիայում նահատակված քառասուն սբ մանուկների հիշատակության օրն է
«Մեծ պահքի այս օրը մեզ համար մասնավոր հրավեր է մարդկային անարդարությունից դեպի Աստծու արդարություն»
Մեծ պահք. «...հիշենք նաև մեր կողքին գտնվողներին»
Մեծ պահք. Միջինք
Մեծ պահք. «... գալու է պատասխան տալու ժամանակը»
Մեծ պահք. «Իսկ ի՞նչ է մեզանից յուրաքանչյուրն այս կյանքում բաղձում, եթե ոչ` պաշտպանություն և ապահովություն»