Ձեր վստահելի աղբյուրը

Կենտրոն և Նորք-Մարաշ համայնքների առաջին ատյանի դատարանում դեկտեմբերի 11-ին շարունակվեց «Ռոյալ Արմենիա» ընկերության նախագահ Գագիկ Հակոբյանի և փոխտնօրեն Արամ Ղազարյանի դեմ հարուցված քրեական գործի դատաքննությունը:

Դատական նիստի հենց սկզբում ամբաստանյալների պաշտպան Կրոմվել Գրիգորյանը միջնորդեց իր պաշտպանյալների նկատմամբ որպես խափանման միջոց կիրառել գրավը: Դրա համար, ըստ նրա, երաշխիքներ են նախկինում նրանց դատապարտված չլինելը, մշտական բնակության վայր ունենալը, վարույթն իրականացնող մարմնի աշխատանքներին չխոչընդոտելը: Բացի այդ, Հայաստանում կա նման նախադեպ, որը նաև բխում է եվրոպական կոնվենցիայից, ավելացրեց փաստաբանը: Կրոմվել Գրիգորյանը հաջորդ միջնորդությամբ դատարանից խնդրում էր ամբաստանյալներին և իրեն տրամադրել քրեական գործի նյութերը` բնօրինակով: Քանի որ, դատարանի կողմից իրենց տրամադրված նյութերը պատճենահանված են և... պատճենահանված են վատորակ:

Ըստ ամբաստանյալների, ՀՀ կառավարությանն առընթեր ազգային անվտանգության ծառայության քննիչն այդպես էլ նյութերն իրենց չի տրամադրել, ավելին` չի էլ զգուշացրել, որ գործն ավարտել է: Դատարանի տրամադրած նյութերն էլ խառն են, երբեմն անընթեռնելի: Այնինչ, «սեփական» նյութերին ծանոթանալը մեղադրյալի (ամբաստանյալի) կարևորագույն իրավունքներից մեկն է:

Իսկ դրանց ծանոթանալու համար պաշտպանական կողմը դատարանից խնդրեց 7 աշխատանքային օրով հետաձգել դատական նիստը: Մեղադրող կողմը համաձայնեց վերջին միջնորդությանը` համարելով, որ կողմերին պետք է հնարավորություն ընձեռվի ծանոթանալ քրեական գործի նյութերին, փոխարենն անընդունելի համարեց գրավի վերաբերյալ միջնորդությունը: Մեղադրողը խափանման միջոցը գրավով փոխարինելը ճիշտ չի համարում, այն պատճառով, որ ամբաստանյալները մեղադրվում են ծանր հանցագործության համար: Իսկ ահա տուժողի ներկայացուցիչ, փաստաբան Լուսինե Սահակյանը կարծում է, որ կալանքը գրավով փոխարինելու հանգամանքը կարող է սպառնալ տուժողի անվտանգությանը:

Ինչևէ, դատարանը հետաձգեց գրավի մասին միջնորդության քննարկումը, նկատի ունենալով, որ հարկավոր է որոշ հանգամանքներ պարզել, մասնավորապես գրավի չափը: Իսկ քրեական գործի նյութերին ծանոթանալու միջնորդությունը բավարարեց և դատական նիստը հետաձգվեց մինչև դեկտեմբերի 29-ը:

Մինչ այս, տուժողի ներկայացուցիչ Լուսինե Սահակյանը դատարանին ներկայացրեց քաղաքացիական հայց: Քանի որ «Ռոյալ Արմենիա» ընկերության ղեկավարներին առաջադրված մեղադրանքի համաձայն, ««Ֆեդերալ ինվեստմենտ գրուպ» ընկերության կողմից կազմված և «Ռոյալ Արմենիա» ընկերությանն ուղարկված մեկ բնօրինակ հաշիվ-ապրանքագրերը փոխելու և դրանցում նշված տվյալները կեղծելու արդյունքում ընկերության ղեկավարները հափշտակել են 553 մլն 204 հազար 25դրամ և մինչ օրս չեն վերադարձել»: Տուժող կողմը ընկերության ներկայացուցիչներից պահանջում է նշված գումարը` տոկոսներով:

Հիշեցնենք, որ նախորդ` դատական առաջին նիստում «Ռոյալ Արմենիա» ընկերության ներկայացուցիչները դատարանին միջնորդել էին կալանքից հանել ընկերությանը պատկանող գույքը, մասնավորապես` ներմուծած 115200 կգ կանաչ սուրճը: Դատարանը սուրճը համարելով գյուղատնտեսական մթերք, որը կարող է փչանալ և մեծ վնասներ հասցնել ընկերությանը, դատավոր Պարգև Օհանյանի նախագահությամբ, բավարարել էր միջնորդությունը: Նաև հիշեցնենք, որ դատական այդ նիստում ամբաստանյալների ներկայությունն ապահովված չէր: