Ձեր վստահելի աղբյուրը

Ազատամարտիկ Ժիրայր Սաֆիլյանի նկատմամբ որպես խափանման միջոց կալանքն ընտրելու Կենտրոն և Նորք-Մարաշ համայնքների առաջին ատյանի դատարանի երեկվա որոշումը բողոքարկվելու է: Նշենք, որ երեկ ուշ երեկոյան, մոտ վեց ժամ տևած դատն ավարտվեց Շուշիի առանձնակի գումարտակի նախկին հրամանատար, «Ազատագրված տարածքների պաշտպանություն» նախաձեռնության համակարգող, «Մարտական խաչ» 1-ին աստիճանի շքանշանակիր, «Կուր-Արաքս» հիմնադրամի հոգաբարձուների խորհրդի նախագահ Ժիրայր Սեֆիլյանի նկատմամբ որպես խափանման միջոց՝ երկու ամսով կալանք կիրառելու որոշմամբ:

Իսկ որ դատարանի հիշյալ որոշումը բողոքարկվելու է, այսօր լրագրողներին հայտարարեց «Ազատագրված տարածքների պաշտպանություն» կազմակերպության քարտուղար Արմեն Աղայանը: Նրա խոսքով, տարօրինակ կլիներ դատարանի այլ որոշում ակնկալելը: Ավելին, Ա.Աղայանը նշեց, թե Ժ.Սեֆիլյանին երկու մեղադրանք են առաջադրել, երկուսն էլ՝ անհեթեթ: Հիշեցնենք, որ Ժիրայր Սեֆիլյանին մեղադրանք է առաջադրվել քրեական օրենսգրքի 301 և 235 հոդվածների հատկանիշներով: Դրանցից առաջինը վերաբերում է «սահմանադրական կարգը բռնի տապալելու հրապարակային կոչերին», իսկ երկրորդը՝ ապօրինի զենք կրելուն (տվյալ դեպքում):

Ինչ վերաբերում է կոնկրետ զենքին, ապա ըստ Ա.Աղայանի, այն Ժիրայր Սեֆիլյանին նվիրել է ԼՂՀ պաշտպանության նախկին նախարար Սամվել Բաբայանը, ով քանիցս հայտարարել է այդ մասին: Եվ հետո, մեր կողմից նկատենք. եթե օլիգարխների սափրագլուխ «ախռաննիկները» զինված ֆռֆռում են, ապա մի՞թե Արցախյան ազատամարտի, կարելի է ասել՝ լեգենդար հրամանատարներից մեկը ինչո՞ւ չպետք է մեկ ատրճանակ ունենա, այն էլ՝ իր նախկին հրամանատարի նվիրած:

Արմեն Աղայանն անդրադարձավ նաև մեղադրանքի հիմնական համարվող կետին, այն է՝ սահմանադրական կարգը բռնի տապալելու հրապարակային կոչերին: Նա մասնավորապես կրկնեց այն հայտարարությունները, որ կան «Հայ կամավորականների համախմբում» կազմակերպության հավաքի տեսագրությունն ու ձայնագրությունը: Արմեն Աղայանը վստահեցրեց, որ այդ հավաքում որևէ քրեորեն հետապնդելի բան չի եղել: Նա հայտնեց, որ հիշյալ տեսաժապավենն այժմ ազգային անվտանգության ծառայության քննիչների մոտ է (գործը քննում է ԱԱԾ քննչական վարչությունը):

Ըստ որում, Արմեն Աղայանը չի բացառում, որ ԱԱԾ-ն կկրկնի նույն սցենարը, ինչ որ վերջերս կիրառվեց «Միասնական Ջավախք» դաշինքի համանախագահ Վահագն Չախալյանի դեպքում, ում նախ ձերբակալեցին, ապա բաց թողեցին ու արագընթաց դատից հետո, բռնի կերպով տարան ու սահմանի վրա հանձնեցին վրացական «կա-գէ-բէ»-ին: Հուսանք, որ Ժիրայր Սեֆիլյանին գոնե չեն հանձնի... Ա.Աղայանի խոսքով. «ԱԱԾ աշխատակիցները ավելորդ աղմուկ են բարձրացրել, որպեսզի ցույց տան, թե կարևոր հանցագործ են բռնել, մինչդեռ, այս գործը նման է պղպջակի, որը վաղ թե ուշ կպայթի»: Ի դեպ, նա նկատեց նաև, որ Ժիրայր Սեֆիլյանին այժմ ԱԱԾ-ում վերաբերվում են որպես հավանական բարձրաստիճան անձի: Նա հայտնեց նաև, որ այժմ ստեղծվում հասարակական շարժում՝ ի պաշտպանություն Ժիրայր Սեֆիլյանի:

Անդրադառնալով Ժիրայր Սեֆիլյանին արտաքսելու մասին տարածված լուրերին, Արմեն Աղայանը նշեց. «Անհայտ է, թե ով է նման լուրեր տարածել, բայց արտահոսքեր անընդհատ լինում են, այդ թվում՝ ԱԱԾ-ից»: Միայն Երևան-Հալեպ չվերթի օդանավի թռիչքից հետո պարզ դարձավ, որ Ժիրայր Սեֆիլյանը Հայաստանում է (նա Լիբանանի քաղաքացի է, չնայած մի քանի անգամ դիմել է՝ Հայաստանի քաղաքացիություն ստանալու համար, սակայն դիմումները մնացել են անպատասխան կամ՝ չբավարարված):
Արմեն Աղայանը նաև համոզված է, որ իրավական առումով Ժիրայր Սեֆիլյանին ոչինչ չի սպառնում և, որ նա իշխանության հետ գործարքի չի գնա: