Ձեր վստահելի աղբյուրը

«Այսօր խմելու ջրի կորուստները կազմում են մոտ 80 տոկոս»,- լրագրողներին հայտնեց «Երևան Ջուր» ընկերության գլխավոր տնօրեն Սերժ Պոպոֆֆը: Նա նշեց, թե իրենք պայմանագրային պարտավորություն են ստանձնել` ապահովել ջրամատակարարման շարունակականությունը, սակայն եթե կորուստները չնվազեցվեն, իրենք չեն կարողանա շարունակականություն ապահովել:

«10 տարվա ընթացքում 80 տոկոսից հոսակորուստները պետք է նվազեցնենք մինչև 50 տոկոս»,- հավաստիացրեց նա:
Իհարկե, Սերժ Պոպոֆֆի հայրենիք Ֆրանսիայում, նրա խոսքով, ջրի կորուստներն անհամեմատ ավելի փոքր տոկոս են կազմում: Այնտեղ ջրի 1 խորանարդ մետրը 3-4 եվրո է, սակայն սակագինը սահմանելիս հաշվի է առնվում նաև կորուստների հանգամանքը: Ինչ խոսք, Հայաստանը դեռ շատ երկար ճանապարհ ունի մինչև Ֆրանսիային հասնելը, այնպես որ, մենք ստիպված ենք բարձր սակագնի միջոցով, փաստորեն, փոխհատուցել նաև անհետացող (կորչող) 80 տոկոսի դիմաց, այն դեպքում, երբ բաժանորդին հասնում է համակարգ մտած միայն 20 տոկոսը:

Ամփոփելով ընկերության վեցամսյա գործունեությունը, Ս. Պոպոֆֆը վստահեցրեց, որ Քանաքեռ-Զեյթուն թաղամասում էականորեն բարելավվել է ջրամատակարարումը` օրական 3 ժամից դառնալով 9 ժամ: Ավելին, այդ ընթացքում տեղադրվել է 65 լոգեր (ջրի ճնշման չափիչ), որոնց միջոցով հստակ կարելի է սահմանել մայրաքաղաքի ջրամատակարարման շարունակականության տոկոսը: Իսկ եկող տարվա կանխատեսումներով Երևանում կապահովվի 79 տոկոսանոց ջրամատակարարման շարունակականություն:

Համաձայն ընկերության տնօրենի` 6 ամիսների ընթացքում քայլեր են ձեռնարկվել նաև կորուստների հայտնաբերման ու վերացման ուղղությամբ: Մասնավորապես, եթե 2005թ. հունիսի 1-ից նոյեմբերի 30-ը օրինականացվել է 140 ապօրինի միացում, ապա 2006թ. նույն ժամանակահատվածում օրինականացումների թիվը կազմել է 1376: Իսկ այն հարցին, թե ի՞նչ դժվարությունների են հանդիպում ընկերության աշխատակիցները` ապօրինի միացումներ հայտնաբերելիս, Ս. Պոպոֆֆի պատասխանը միանշանակ է. «Իհարկե, դժվարություններ կան որոշակի միացումների հետ կապված, բայց ես չեմ թողնի, որ ինձ վրա կարողանան ազդել»: