Ձեր վստահելի աղբյուրը

Վերջին 5 տարիների ընթացքում Հայաստանի ամենամեծ առեվտրատնտեսական գործընկերը ԵՄ-ն է: Այսօր «Փաստարկ» ակումբում նման հայտարարություն արեց Հայ-եվրոպական տնտեսական քաղաքականության և իրավական խորհրդատվության կենտրոնի (AEPLAC) երևանյան գրասենյակի տնօրեն Տիգրան Ջրբաշյանը:

Նրա խոսքով, ասվածը վերաբերվում է ինչպես ներդրումներին, այնպես էլ ներքին առևտրաշրջանառությանը: Եթե նախկինում Հայաստանից Եվրոպա էին արտահանվում հիմնականում ադամանդե զարդեր, ապա այսօր արտահանվում է նաև մոլիբդեն, ալյումին, պղինձ: Առայժմ սննդի ու գյուղատնտեսական արտադրանքի արտահանման խնդիրներ կան, ինչը կապված է որակի, անվտանգության և սերտիֆիկացման խիստ պահանջների հետ: Տ. Ջրբաշյանի խոսքով, վերջերս Երևանում բացված սերտիֆիկացման լաբորատորիան կօգնի մասամբ լուծել այդ խնդիրը:

ԵՄ-ն նաև ամենահզոր ներդրողն է Հայաստանի տնտեսության մեջ: Առաջինը հունական «ՕՏԵ» ընկերությունն էր, որին պատկանում էր «ԱրմենՏել»-ի բաժնետոմսերի 90 տոկոսը: Այսօր եվրոպական խոշոր ներդրումներն ուղղվում են գունավոր մետաղների արդյունահանմանը, ավելին, հայկական շուկան հետաքրքիր է ոչ միայն սննդի արդյունաբերությամբ, այլև մեքենաշինությամբ ու հաստոցաշինությամբ զբաղվող եվրոպացի արտադրողին: Հայ ձեռներեցներն էլ իրենց հերթին սկսել են ավելի շատ օգտագործել եվրոպական տեխնոլոգիաներ:

Տ. Ջրբաշյանը նշեց, որ կան մի շարք սահմանափակումներ, որոնց խոչընդոտում են ավելի սերտ համագործակցությունը: Փորձագետի կարծիքով, վերջերս ստորագրված Հայաստան-ԵՄ գործողությունների ծրագիրը թույլ կտա լայնորեն ներկայացնել հայկական ապրանքները եվրոպական շուկայում: ԵՄ պահանջները հիմնականում առնչվում են եվրոպական արժեքներին կապվածությանը, կայունությանը և կանխատեսելիությանը, ինչը նշանակում է կոնֆլիկտների բացակայություն այլ երկրների հետ հարաբերություններում: Ի պատասխան դրա, եվրոպացիները պատրաստ են ստեղծել լավ պայմաններ և բացել իրենց շուկան Եվրոպական հարևանության ծրագրում ընդգրկված երկրների առջև: Հայաստանի գործողությունների ծրագրի առաջին մոնիտորինգի արդյունքները կներկայացվեն 2008 թվականին:

Տիգրան Ջրբաշյանը նշեց նաև, որ մակրոտնտեսական կայունության հասած երկրները այսօր կանգնած են ինստիտուցիոնալ վերաձևումների խնդրի առջև: Հայաստանում գործող համակարգը չի համապատասխանում եվրոպական չափանիշներին, ինչը մեր երկիրը արևմտյան շրջանակաների համար դարձնում է պակաս գրավիչ: Այդ համակարգը չի խթանում նաև տեղական շուկայի արդյունավետ զարգացմանը: Տ. Ջրբաշյանի խոսքով, այսօր մասնագետներն աշխատում են այդ ուղղությամբ և մի քանի տարի անց արդյունքները ակնհայտ կլինեն: