Ձեր վստահելի աղբյուրը

Հինգ օրվա ընթացքում Հայաստանի մի շարք տնտեսվարողներ պիտի վերանայեն իրացվող ապրանքների գները և քայլեր ձեռնարկեն` կանխելու համար գների չհիմնավորված ավելացումները: Այսօր նման որոշում ընդունեց տնտեսական մրցակցության պաշտպանության պետական հանձնաժողովը:

Ինչպես նշեց հանձնաժողովի նախագահ Աշոտ Շահնազարյանը, 1 տոննա ցեմենտի մանրածախ գինը այսօր հասել է 40 հազար դրամի այն դեպքում, երբ արտադրողի համար դա արժե 28 հազար դրամ: Ա. Շահնազարյանը նշեց, որ հատկապես «Միկա Արմենիա թրեյդինգին» պատկանող բենզակայաններում ցեմենտը վաճառվում է 40 հազար դրամով: «Եթե գերշահույթ են ստանում միջնորդները, ապա թող արտադրողները բարձրացնեն գինը: Այդ դեպքում մենք կկարողանանք հարկային դաշտ բերել գերշահույթ ստացողներին»,- նշեց նա:

Իր հերթին, լրագրողների հետ ունեցած զրույցում «Միկա-Ցեմենտ» ընկերության գործադիր տնօրեն Նաիրա Մարտիրոսյանը հայտարարեց. «Մենք որևէ հարաբերություն չունենք «Միկա Լիմիթեդի» հետ, դա այլ իրավաբանակն անձ է»: Նրա խոսքով, «Միկա-Ցեմենտ»-ը գերշահույթ չի ստանում. «Մեր շահույթը կազմում է ընդամենը 10 տոկոս»,- հավաստիացրեց նա, ավելացնելով, որ դա ցածր ցուցանիշ է, ավելին, նորմալ աշխատող կազմակերպությունը պիտի 15-20 տոկոս շահույթ ունենա:
Ն. Մարտիրոսյանը կարծում է, որ Հայաստանում ընկերությունները չեն կարող գերշահույթ ստանալ, քանի որ բնակչությունը վճարունակ չէ: Նրա խոսքով, 1 տոննա բենզինի միջինացված արժեքը այս տարվա 11 ամիսների ընթացքում կազմել է 28 հազար դրամ: «Ցեմենտի 1 տոննայի ինքնարժեքը կազմում է մոտ 24 հազար դրամ, ավելին, պիտի նկատի առնել նաև այն փաստը, որ ընկերությունը գործում է ոչ թե մայրաքաղաքում, այլ Հրազդանում, ինչը պահանջում է լրացուցիչ ծախսեր»,- նշեց Ն. Մարտիրոսյանը: 1 Տոննա ցեմենտի տեղափոխումն արժե 2 հազար դրամ, այնպես որ, ըստ Ն. Մարտիրոսյանի, 1 տոննա ցեմենտի գործարանային գինը կազմում է 33-35 հազար դրամ:

Նշենք, որ հանձնաժողովը առանձին շուկաներում գերիշխող դիրք ունեցող ընկերություններին հանձնարարեց մինչև եկող տարվա հունվարի 20-ը ներկայացնել գների վերանայմանն ուղղված գործողությունները: Եվ էլի նշենք, որ խիստ հետաքրքիր պատկեր է ստացվում այն առումով, որ Ն.մարտիրոսյանի ասածից բխում է, թե աջ ձեռքը չգիտե, թե ձախն ի՞նչ է վաճառում ու ի՞նչ գնով: Մինչդեռ, այդ ընկերությունները պատկանում են նույն մարդուն՝ Մ.Բաղդասարովին: