Ձեր վստահելի աղբյուրը

Պարզ եղանակներից օդաչուների ոչ միայն թռիչքներն են կախված, այլև` պահանջները: «Հայկական ավիաուղիներ»-ի աշխատակիցները կրկին պատրաստվում են կառավարության շենքի առջև իրենց աշխատավարձերը պահանջել, որոնք մինչ օրս չի հաջողվում ստանալ: Այն ընդհանուր առմամբ կազմում է 187 մլն դրամ: Լուծարված ընկերության գլխին կուտակված պարտքն էլ ավելի մեծ է մասնագիտական պարտականությունները կատարելիս վնասվածքներ ստացած մարդկանց պարտքերի պարագայում. այն կազմում է ավելի քան 1 մլրդ 740 մլն դրամ: Պարտատերերի թիվը անցնում է հարյուրից: Բայց մինչ եղանակը կտաքանա ու ցույցի դուրս կգան, նախկին օդաչուները կոլեկտիվ հայցով դիմել են Մալաթիա-Սեբաստիա համայնքի դատախազություն. հարուցվել է քրեական գործ, ընթանում է նախաքննություն:

Այս տարվա բյուջեն արդեն հաստատված է, բայց օդաչուների համար գումար նախատեսված չէ:
ՔԱԳՎ մամուլի քարտուղար Գայանե Դավթյանն այսօր Panorama.am-ի թղթակցի հետ զրույցում ասաց, որ իրենց կառույցը այդ հարցով չի զբաղվում, պետք է դիմել կառավարությանը:

Այս կառույցից էլ «մեզ չէին ուզում ոչ մի ռեալ պատասխան տան»,-մեզ հետ զրույցում ասաց նախկին օդաչու Էդիկ Ռևազյանը: ՀՀ Կառավարության աշխատակազմի ղեկավար-նախարարՄանուկ Թոփուզյանը նոյեմբերին հանդիպել է բողոքող երկու օդաչուների, խոստացել, որ ամեն ինչ կզեկուցի վարչապետին, հարցին լուծում կտրվի:

Հիշեցնենք, որ աշխատավարձերի ու թոշակների վճարման նպատակով լուծարված ընկերության գույքի վաճառքն իրականացնելու համար ստեղծվել է հանձնաժողով, որի անդամները ամսական ստանում են 1.5 մլն դրամից ավելի գումար: Դեկտեմբերի 1-ի դրությամբ հանձնաժողովի ձեռքի տակ եղել է 170 մլն դրամ և 111 հազար դոլար, սակայն ոչ մի վճարում, բացի ավելացված արժեքի հարկից, չի կատարվել: Եվս 80 մլն դոլարի գույք կա վաճառելու, մեր թղթակցին ասաց ստեղծված հանձնաժողովի նախագահ Խաչիկ Ղամբարյանը: Օդաչուները մեծ հույսեր են կապում նաև արդեն երկու տարուց ավելի «Դոմադեդովո»-ում կայանած ԻԼ-86 ինքնաթիռի վաճառքի հետ: Բայց այստեղ էլ նրանց հավանական հիասթափություն է սպասվում. Խ. Ղամբարյանը չժխտեց, որ այդ ինքնաթիռը կարող է հանձնվի տվյալ օդանավակայանին կուտակված պարտքի դիմաց: Խ. Ղամբարյանի խոսքով, իրենք պարտքի ընդհանուր չափի մասին դեռ խոսք չեն բացել, իսկ օդանավակայանի տնօրինությունն էլ չի պահանջում: Իսկ թե ինչու է այդքան բարի ռուսական օդանվակայանի տնօրինությունը, Ղամբարյանը պարզաբանեց, որ գումարը պահանջում են միայն այն ժամանակ, երբ ինքնաթիռը լքում է կայանտեղին: Այստեղից պետք է եզրակացնել, որ մեր ինքնաթիռը դեռ երկար ժամանակ կմնա Մոսկվայում: Նշենք, որ 20 օրը մեկ ինքնաթիռի վաճառքի համար աճուրդ է հայտարարվում, սակայն ոչ ոք այդպես էլ նորմալ գումար չի առաջարկում:

Հետագա զրույցից պարզվում է, որ օդաչուների ու թոշակառուների վճարներն ուշացնելով հանձնաժողովը նրանց մեծ լավություն է արել, ինչը ոչ մի կերպ նրանք չեն ուզում հասկանալ: Ղամբարյանը տեղեկացրեց, որ իրենք սպասել են ««Սնանկացման մասին» օրենքում փոփոխություններ և լրացումներ կատարելու մասին» նախագծի ընդունմանն ու վավերացմանը, քանի որ դրանով ավելացված արժեքի հարկի վճարումը այլևս առաջնային չի լինի:

Նկատենք, որ մինչև օրենքն ընդունվի ու վավերացվի, եղած գումարի տակը բան չի մնա. կվճարվեն հանձնաժողովի անդամների աշխատավարձն ու ավելացված արժեքի հարկը: Չէ՞ որ գործող օրենքի համաձայն, նախ և առաջ պետք է վճարել հարկը: