Ձեր վստահելի աղբյուրը

2006 թվականի դեկտեմբերի 31-ի դրությամբ Հայաստանում գործազրկության մակարդակը կազմել է 7.2%, անցած տարվա սկզբի 7.7%-ի դիմաց: Ընթացիկ տարվա հունվարի 1-ի դրությամբ զբաղվածության տարածքային կենտրոններում հաշվառված է աշխատանք փնտրող 102 172 քաղաքացի, որոնցից 84 571-ը գործազուրկ են: Այս տվյալներն այսօր կայացած մամուլի ասուլիսի ժամանակ ներկայացրեց «Զբաղվածության պետական ծառայություն» գործակալության պետ Սոնա Հարությունյանը:

Նրա խոսքերով, գործազրկության մակարդակը միջին հանրապետականից բարձր է Սյունիքի, Լոռու և Շիրակի մարզերում: Ամբողջ հանրապետության մասշտաբով գործազուրկների 70%-ը կազմում են կանայք, իսկ Երևանում այդ ցուցանիշը հասնում է 80%-ի: Տարվա ընթացքում աշխատանքի են տեղավորվել 8268 մարդ, իսկ 10 250-ը ապահովվել են ժամանակավոր աշխատանքով:

Աշխատանքի տեղավորվածների 46.6%-ը հանդիսանում են Երևանի բնակիչներ: Հարկ է նկատել, որ հանրապետության տարածքում աշխատանքի տեղավորված քաղաքացիների մեծ մասը եղել են 30-ից 50 տարեկան, իսկ 15-20%-ը` 50-ից բարձր:
Ս. Հարությունյանի տվյալներով, այսօրվա դրությամբ գործազրկության նպաստ ստանալու իրավունք ունեն 12 500 քաղաքացի` նախորդ տարվա 8 645-ի փոխարեն:

Նրա խոսքերով, վերջին երեք տարիների ընթացքում ավելացել է նպաստի չափը: Այսպես եթե նախկինում բազային նպաստը կազմում էր ամսական 3 900 դրամ, ապա այսօր այն աճել է մինչ 12 հազարի և կազմում է նվազագույն աշխատավարձի 60%-ը: Ս. Հարությունյանն ընդգծեց, որ նպաստը կավելացվի նվազագույն աշխատավարձի չափերի մեծացմանը համապատասխան: