Ձեր վստահելի աղբյուրը

Այսօր Հանրային ծառայությունները կարգավորղ պետական հանձնաժողովի շենքի առջև բողոքի ցույց էին կազմակերպել մեր հանրապետության տարածքում ինտերնետ-հեռախոսակապի ծառայություն մատուցող ընկերությունների ներկայացուցիչները: Նրանք պահանջում էին, որ հանձնաժողովը վերանայի հունվարի 8-ին կայացրած որոշումը կամ էլ 180 օրով երկարաձգի դրա ուժի մեջ մտնելու ժամկետը: Հիշեցնենք, որ այդ որոշման համաձայն, ինտերնետ-հեռախոսակապի ծառայություն մատուցելու բացառիկ իրավունքը տրվեց «ԱրմենՏել»-ին: Հանձնաժողովի նախագահ Ռոբերտ Նազարյանը այսօր ցուցարարներից մի քանիսի հետ հանդիպման ժամանակ խոստացել է, որ հնարավորինս կարճ ժամկետում` մինչև հունվարի 25-ը պատասխան կտա, արդյոք կվերանայվի հանձնաժողովի կայացրած որոշումը:

Նշենք, որ որոշման համաձայն, հենց հունվարի 25-ին պետք է դադարեցվեն ինտերնետ-հեռախոսակապի ծառայություն մատուցողների գործունեությունը: Որոշումը պայմանավորված էր այն բանով, որ տվյալ ընկերություններին լիցենզիաները տրամադրվել են ինտերնետի միջոցով իրական ժամանակում, 400 միլիվայրկյան արագությամբ ձայնային տվյալներ փոխանցելու համար: Երկարատև քննարկումները հանգեցրին ծառայությունների հստակեցմանը:
Ընկերությունների ղեկավարները հավատացնում են, որ ձայնային տվյալների հաղորդումը տեղի է ունեցել ոչ իրական ժամանակում, իսկ արագությունը գերազանցել է 400 միլիվայրկյանը: Ավելին, նրանց ձեռքին կան տրանսպորտի և կապի նախարարության գրավոր պատասխանները, որտեղ ասվում է, թե այդ ընկերությունների գործունեությունը չի հակասում թիվ 60 լիցենզիայի պահանջներին:

Հանձնաժողովի նախագահ Ռոբերտ Նազարյանը հիշեցրեց, որ մայիսին «ԱրմենՏելը» կզրկվի նման ծառայություն մատուցելու մենաշնորհից: «Եթե դուք այսօրվանից մինչև մայիս ժամանակավոր դադարեցնեք ձեր գործունեությունը, ապա ձեր հեռախոսահամարները չեն անջատվի»,-նշեց Ռ. Նազարյանը: Սակայն ցուցարար Արտյոմ Խաչատրյանի խոսքով, այդ դեպքում չորս ամիսների ընթացքում շուկայում կստեղծվի արհեստական վակուում, ինչը կշարունակվի մինչև «ԱրմենՏել»-ին մենաշնորհից զրկելը:

Նախորդ տարվա սեպտեմբերին հանձնաժողովը բանակցություններ է վարել ինչպես «ԱրմենՏելի», այնպես էլ այդ ընկերությունների հետ: «Եվ չնայած դրան, հանձնաժողովին այդ որոշումն ընդունելուց բացի, չհաջողվեց այլ բան ձեռնարկել»,-խոստովանեց Ռ. Նազարյանը, խորհուրդ տալով դիմել այլ կառույցների: Ա. Խաչատրյանի կարծիքով, այդ խորհուրդը ոչ մի իմաստ չունի, քանի որ այս պարագայում վերջին խոսքը պատկանում է հանձնաժողովին:
Ավելի վաղ «ԱրմենՏել»-ի գլխավոր տնօրեն Օլեգ Բլիզնյուկը հայտարարեց, որ այդ ընկերությունների գործունեությունը հակասում է թիվ 60 լիցենզիային և հանդիսանում է ոտնձգություն իրենց ֆինանսական գործունեության հանդեպ:

Նշենք, որ այսօր հանձնաժողովի շենքի առջև հավաքվել էին ավելի քան 50 ընկերությունների ներկայացուցիչներ: Ոչ պաշտոնական տվյալներով, Հայաստանում ինտերնետ-հեռախոսակապի ծառայություն է մատուցում մոտ 300 ընկերություն, որից 8-ն արդեն «ԱրմենՏել»-ի հետ քննարկել են համագործակցության հնարավոր տարբերակները: