Ձեր վստահելի աղբյուրը

 2006 թվականի արդյունքներով Հայաստանի արտաքին առևտրի դեֆիցիտն աճել է 45 %-ով` կազմելով 1.2 միլիարդ դոլար: Այս ցուցանիշի աճի տեմպը երեք անգամ գերազանցում է ՀՆԱ-ի աճի տեմպին, որն անցած տարի կազմել էր 13.5%: Այսօր կայացած մամուլի ասուլիսի ընթացքում այսպիսի տվյալներ ներկայացրեց տնտեսագետ Էդուարդ Աղաջանովը: Հայաստանի տնտեսական պայմանները նա «աբսուրդ» անվանեց, արձանագրելով, որ 2003-ից մինչև 2006 թվականը արտաքին առևտրի դեֆիցիտն աճել է երկու անգամ:

Է. Աղաջանովի խոսքերով, մեր երկրի ՀՆԱ-ն աճում է միայն քանակական իմաստով, իսկ որակ և զարգացոմ չի նկատվում: Այսպես, մշակող արդյունաբերության կառուցվածքում արտադրանքի 90 %-ը բաժին է ընկնում ծխախոտի, հյութերի, թանկարժեք և կիսաթանկարժեք քարերի արտադրությանը:

Նույն պատկերն է նաև արտահանման կառուցվածքում: «Արդյունաբերության ու արտահանման նման կառուցվածք ունեն 4-5-րդ կարգի տնտեսությունները»,- նկատեց Է. Աղաջանովը: Նրա խոսքերով, մի քանի տարի շարունակ ՀՆԱ-ի կառուցվածքում արդյունաբերության մասնաբաժինը կրճատվում է: 2004 թվականին այդ ցուցանիշը կազմել է 22.1 %, իսկ 2005-ին` 18.7 % (այդ թվում էներգետիկան): Այսօր ՀՆԱ-ի առյուծի բաժինը կազմում են շինարարությունն ու գյուղատնտեսությունը:

Հիմնվելով Հայաստանի ազգային վիճակագրական ծառայության ներկայացրած պաշտոնական տվյալների վրա, Է. Աղաջանովը նշեց, որ արտաքին առևտրի դեֆիցիտն աճում է հայկական դրամի արժևորման հետևանքով: Այսպես, 2004թ. դրամն ամերիկյան դոլարի նկատմամբ արժևորվել է 8,4 %-ով, իսկ արտաքին առևտրի դեֆիցիտի աճը կազմել է 7,6%: 2005-ին այդ ցուցաինիշները կազմել են համապատասխանաբար 16,3 % և 28,4 %, իսկ 2006-ին` 10 % և 45 %:

Է. Աղաջանովը գտնում է, որ երկրի նախագահն ու վարչապետը Հայաստանի տնտեսական ցուցանիշների մասին ստանում են ֆիլտրացված տեղեկատվություն: Նրա կարծիքով, բարձրագույն ղեկավարության տնտեսական հարցերով խորհրդականները այնքան էլ արդյունավետ չեն աշխատում: