Ձեր վստահելի աղբյուրը

Վերջին օրերին ՍԻՄ-ի շուրջ մթնոլորտը կրկին շիկացավ: Հիշեցնենք, որ հունվարի 31-ին վերաքննիչ դատարանը կայացրել էր վճիռ, որով չկայացած էր համարել ՍԻՄ 17-րդ համաժողովում իրականացված կուսակցության նախագահության եւ վերստուգիչ հանձնաժողովի ընտրությունները, միաժամանակ անփոփոխ թողնելով նույն համաժողովի մոտ մեկուկես տասնյակ այլ որոշումները, այդ թվում` նախագահի եւ փոխնախագահի ընտրությունները: Փետրվարի 8-ին ՍԻՄ գրասենյակ էին այցելել ԴԱՀԿ-ի աշխատակիցները, պարզելու համար, թե վերաքննիչ դատարանի վճիռը կատարվել է: ԴԱՀԿ-ի աշխատակիցներին մինչեւ կուսակցության գրասենյակի դռներն էին ուղեկցել Հրանտ Խաչատրյանը իր մի խումբ կողմնակիցների հետ:

Թե ինչ տեղի ունեցավ այդ այցելության ժամանակ, ավելի կոնկրետ, այն բանից հետո, երբ ԴԱՀԿ-ի աշխատակիցները հեռացան ՍԻՄ-ի գրասենյակից, կարծում ենք, որ վերստին հանրությանը ներկայացնելու կարիք չկա: Այնուամենայնիվ, ՍԻՄ-ի գրասենյակում տեղի ունեցած այդ բախումների որոշ դրվագներ իրավական առումով դեռ երկար ժամանակ կգտնվի հանրության ուշադրության կենտրոնում, ուստի եւ այդ հանգամանքները հարկ է, որ այս պահից աչքի առաջ պահենք: Բանն այն է, որ ՍԻՄ-ի գրասենյակում տեղի ունեցած բախումների մասնակիցների թվում էր ՀՀ ԱԺ պատգամավոր Հրանտ Խաչատրյանը, որը ունենալով պատգամավորական անձեռնմխելիություն թույլ տվեց մի շարք գործողություններ, որոնք, մեղմ ասած, հակասում են գործող օրենքներին: Համենայն դեպս, այդ կերպ են ներկայացնում լրատվամիջոցները: Խոսելով այդ մասին, օրինակ, “Հայկական ժամանակը”, իր փետրվարի 9-ի համարում ներկայացնում է, թե պրն Խաչատրյանը նախ փորձեց մուտք գործել ՍԻՄ գրասենյակ եւ երբ դա նրան չհաջողվեց, ապա “փորձեց լեզու գտնել պահակի հետ, բայց ապարդյուն. “Երիտասարդ, ձեզ հետ խոսում է ԱԺ պատգամավոր Հրանտ Խաչատրյանը”:

“Հարգում եմ”,- եղավ պատասխանը”: Այդ զրույցի հետագա զարգացումը արդեն նկարագրված է այլ լրատվամիջոցներում: Մասնավորապես, “Առավոտը” իր նույն օրվա համարում գրում է, որ Հրանտ Խաչատրյանը “ապտակեց անվտանգության ծառայողին եւ երկու թիմերի մեջ քաշքշուկը նոր թափ առավ”:

Ստացվում է, որ ՀՀ ԱԺ պատգամավորը հարվածել է իրեն հարգող եւ քաղաքավարության սահմաններից դուրս չեկած ՍԻՄ անվտանգության ծառայողին, ինչի իրավունքը, անկախ պատճառներից, պրն Խաչատրյանը չուներ: Այսինքն, արձանագրենք, որ տվյալ դեպքում տեղի է ունեցել հակաօրինական արարք, ինչը սրել է առանց այդ էլ առկա լարված մթնոլորտը:

Հ. Խաչատրյանի հետագա քայլերը եւս օրենքի տեսանկյունից մեկնաբանելու կարիք են զգում: Անվտանգության ծառայության աշխատակցին ապտակելուց մի որոշ ժամանակ անց պրն Խաչատրյանը ինչ-ինչ փաստաթղթեր ներկայացնելու պատրվակով ոստիկանության աշխատակիցների թույլտվությամբ կարողանում է մուտք գործել կուսակցության գրասենյակ: Թե ինչ տեղի ունեցավ այդտեղ, փետրվարի 9-ի իր համարում ներկայացնում է մեկ այլ լրատվամիջոց` “Փակագիծը”: Համաձայն այդ թերթի հրապարակման, ՀՀ ԱԺ պատգամավոր Հ. Խաչատրյանի”հետագա քայլը, առանց չափազանցության, կարելի է անվանել ոչ այլ կերպ, քան արյունահեղության սադրանք. հարված թիկունքից Հ. Բաբուխանյանին, որն այդ րոպեին խոսում էր գնդապետի հետ: Երեւի թե Հ. Խաչատրյանն այդ պահին սպասում էր, թե կրիմինալ թափթփուկները կկարողանան ճեղքել ոստիկանության օղակը եւ օգնության կհասնեն իրեն` ԱԺ պատգամավորին: Սակայն պլանները ձախողվեցին ու ստիպված լինելով փախուստի դիմել (այլապես իր անձեռնմխելիությունն իրեն օգտակար չէր լինի) Հ. Խաչատրյանը հազիվ իրեն դուրս գցեց լրագրողների մեջ եւ ընդունելով հաղթանակած բորենու կեցվածք, շարունակեց հրահրել ներկաներին”:

Կարծում ենք, կասկածից դուրս է, որ Հ. Խաչատրյանը Հ. Բաբուխանյանին թիկունքից հարվածելով նրան պատճառել է ինչպես ֆիզիկական, այնպես էլ, ինչը տվյալ դեպքում շատ ավելի կարեւոր է` բարոյական վնաս: Այսինքն, պրն Խաչատրյանի այդ քայլը միանշանակ կարելի է համարել քրեորեն պատժելի արարք: Էլ չենք խոսում, որ ՀՀ ԱԺ պատգամավորը փոխանակ փորձեր հանդարտեցնել կրքերը, իր այդ քայլով էլ ավելի է բորբոքում մթնոլորտը, այն էլ այն աստիճանի, որ լրատվամիջոցը ստիպված է եղել Հ. Խաչատրյանի հարվածը բնութագրել որպես “արյունահեղության սադրանք”:

Դուրս գալով ՍԻՄ գրասենյակից Հ. Խաչատրյանը հանդես է եկել հրապարակային ինքնախոստովանությամբ: Համենայն դեպս, “Հայկական ժամանակը” եւ այլ թերթեր, ներկայացնելով Հրանտ Խաչատրյանի հայտարարությունը, իրենց փետրվարի 9-ի համարում գրել են. “Ես խոստացա, ինձ չհաջողվեց ապտակել (Բաբուխանյանին - խմբ.) հրապարակայնության պայմաններում, բայց իր համախոհների մոտ ես նրան ապտակեցի”: Այսինքն, որեւէ կերպ կասկած չի հարուցվում, որ կուսակցության գրասենյակում Հրանտ Խաչատրյանը հարվածել է Հայկ Բաբուխանյանին եւս, այսինքն, առնվազն երկրորդ անգամ է թույլ տվել հակաօրինական արարք:

Եթե չենք սխալվում, ՀՀ ԱԺ պատգամավորի մասնակցությամբ տեղի ունեցած ծեծկռտուքի վերջին փաստը արձանագրվել էր անցած տարվա հոկտեմբերին: Խոսքը ՀՀ ԱԺ պատգամավոր Հակոբ Հակոբյանի եւ գազաբաշխիչ կայանի աշխատակիցների հայտնի բախումների մասին է: Այդ դեպքում, նույն օրը պրն Հակոբյանը ձերբակալվեց եւ դեպքից շատ չանցած, ԱԺ-ն ՀՀ գլխավոր դատախազության առաջարկով Հ. Հակոբյանին պատասխանատվության ենթարկելու համաձայնություն տվեց: Հ. Խաչատրյանի պարագայում վիճակը մի փոքր այլ է.նա հրապարակայնորեն հարվածեց երկու մարդու եւ օգտվելով իր պատգամավորական անձեռնմխելիությունից` հանգիստ հեռացավ դեպքի վայրից: Իր տվյալ արարքների համար կենթարկվի՞ նա պատասխանատվության, թե` ոչ, դա հարցի մյուս կողմն է, ինչի պատասխանին, հույս ունենք երկար չենք սպասի:

Հ.Գ.- Panorama.am-ը պատրաստ է հրապարակել նաև մյուս կողմի մեկնաբանությունները: