Ձեր վստահելի աղբյուրը

Պարզվում է, որ քաղաքապետարանում բոլորովին անտեղյակ են մայրաքաղաքում ընթացող ինտենսիվ կառուցապատման աշխատանքներից: Ու մինչ «Նուշիկյան» ասոցիացիան 20 հաստաբուն ծառերը կտրելուց հետո, շարունակում է իր գրասենյակային համալիրի շինարարական աշխատանքները, այսօր «Հայելի» ակումբում քաղաքապետի առաջին տեղակալ Կամո Արեյանը և գլխավոր ճարտարապետ Սամվել Դանիելյանը համոզված հայտարարեցին, թե այդ աշխատանքները կասեցված են: Հիշեցնենք, որ ընդամենը մի քանի օր առաջ այդ աշխատանքներն իրականցնելիս վնասվել էր ջրատար խողովակը, արդյունքում մեկ օրով դադարեցվել էր բնակիչների ջրամատակարարումը:

Այսօր Կ. Արեյանը հայտարարեց, որ 2004-ից առ այսօր քաղաքապետարանը զերծ է մնացել ընդհանուր օգտագործման կանաչ տարածքներում կառուցապատման նախագծեր հաստատելուց: Պարոն փոխքաղաքապետին հիշեցնենք, որ ընդամենը մեկ ամիս առաջ հենց Տերյան փողոցի պուրակում հատվեցին 20 հաստաբուն ծառերը հանուն «Նուշիկյանի» բիզնես տարածքների ընդլայնման: Բայց Կ. Արեյանն այդ մեղքը բարդեց 2000թ. քաղաքը կառավարող Ալբերտ Բազեյանի վրա, պատճառաբանելով, թե թույլտվությունը հենց նա է տվել, իսկ կառուցապատողը միայն վերջերս է ձեռնամուխ եղել շինարարական աշխատանքների իրականացմանը: Հարցին, թե այդ պարագայում ինչու չի կասեցվել շինարարությունը, Կ. Արեյանը պատասխանեց. «Փաստաթղթերում կառուցապատման ժամանակի առումով սահմանափակում չի եղել»:

Մինչ Կ. Արեյանը համոզում էր, որ շինարարական աշխատանքները կասեցված են, գլխավոր ճարտարապետն իր հերթին հավաստիացնում էր, որ Նուշիկյաններն ամեն ինչ արել են օրենքի շրջանակում, պահպանված են բոլոր նորմերը: Այդ դեպքում հարց է առաջանում. «Պարո՛ն քաղաքապետի առաջին տեղակալ, ինչո՞ւ եք կասեցրել այդ օրինական կառույցի շինարարությունը»: