Ձեր վստահելի աղբյուրը

Այս տարի պետբյուջեով հանրակրթական հաստատությունների մանկավարժների հաշվարկային միջին ամսական աշխատավարձը, լրիվ ծանրաբեռնվածության համարժեքով հաշվարկած, բարձրացել է 27%-ով և հասել 74 հազար դրամի: Կրթության և գիտության նախարարի մամուլի քարտուղար Լիլիթ Գալստյանը  ընդգծեց, որ դրա համար պարտադիր է հետևյալ պայմանների առկայությունը. ուսուցիչների ծանրաբեռնվածությունը պետք է լինի 22 ժամ, դասարանների միջին խտությունը` 21.8, աշակերտ/ուսուցչական դրույք հարաբերակցությունը (ներառյալ զինղեկ) 14.0, աշակերտ/ ոչ ուսուցչական դրույք հարաբերակցություն 23.2:

Սակայն պարզաբանման կարգով ասենք, որ հանրապետական միջին այս ցուցանիշները տարբեր մարզերի, ինչպես նաև Երևանի համայնքների առանձին դպրոցներում տարբեր են: Դրա հետևանքով ստեղծվում են տարբեր ‎ֆինանսական հնարավորություններ, այդ թվում նաեւ աշխատավարձերի բարձրացման համար:

Լ. Գալստյանի տեղեկացմամբ, մանկավարժների միջին ամսական աշխատավարձի մեջ ներառվում են նաև նրանց վճարվող բոլոր հավելավճարները, այդ թվում դասղեկություն` մանկավարժի դրույքի 20%-ի չափով, տետրերի ստուգում` մանկավարժի դրույքի 10%-ի չափով, մեթոդ միավորման նախագահ` մանկավարժի դրույքի 10%-ի չափով:

Հանրակրթական հաստատությունների այս տարվա ընդհանուր ծախսերը ձեւավորվում են ‎ֆինանսների և էկոնոմիկայի ու կրթության և գիտության նախարարների «2007 թվականին ըստ աշակերտների թվի ‎ֆինանսավորման բանաձևի գործակիցների մասին» համատեղ հրամանով, որի մեջ ներառված է նաև մանկավարժների ու վարչական աշխատողների աշխատավարձերի` 27%-ով և ուսումնաօժանդակ աշխատողների աշխատավարձերի` 9.18%-ով բարձրացումը: Լ. Գալստյանի խոսքով, այս տարվա համար, ըստ աշակերտների թվի ‎ֆինանսավորման, բանաձևը հետևյալն է`
Ըգ= Սթ x Սգ+ Պգ:
Գործակիցները հաստատվել են հետևյալ չափերով`
Սգ - մեկ սովորողին ընկող տարեկան գումարը` 66 956 դր.
Պգ - հաստատության պահպանման ծախսերի նվազագույն գումարը 11 450000 դր.
Սթ - աշակերտների միջին տարեկան թվաքանակը, որը ենթակա է ճշտման ուսումանկան տարվա սկզբին:

Համաձայն պետական կառավարման լիազորված մարմնի եւ դպրոցի միջեւ կնքված պայմանագրերի, դպրոցը պետական կառավարման լիազորված մարմնից մեկ թվով ստանում է տարեկան ծախսի չափը, որից հետո համաձայն «ՀՀ պետական հանրակրթական ուսումնական հաստատություն» պետական ոչ առեւտրային կազմակերպության օրինակելի կանոնադրության, հաստատության խորհրդի առաջարկությամբ, դպրոցի տնօրենը կազմում է հաստատության ամենամյա հաստիքացուցակները և ծախսերի նախահաշիվը: Դրանք այնուհետեւ ներկայացվում են պետական կառավարման լիազորված մարմնի հաստատմանը:

Անհրաժեշտության դեպքում, կառավարության, «ՀՀ պետական հանրակրթական ուսումնական հաստատությունների ծախսերում կատարվող վերաբաշխումների» կարգի համաձայն, մարզպետներն իրենց ենթակայության պետական հանրակրթական ուսումնական հաստատությունների ծախսերում կատարում են վերաբաշխումներ` նախօրոք համաձայնեցնելով ֆինանսների և էկոնոմիկայի նախարարության հետ: Ներկայումս հարցը կարգավորվում է գործող այս կարգերի և հրամանների համաձայն: