Ձեր վստահելի աղբյուրը

2006թ. արդյունքներով, հայկական ապահովագրական ընկերությունների ընդհանուր շահույթը կազմել է 421.1 մլն դրամ` մեկ տարում ավելանալով 40.9 տոկոսով: Ինչպես Panorama.am-ին հայտնեցին ԿԲ-ից, ապահովագրավճարների ընդհանուր ծավալը կազմել է 5.1 մլրդ դրամ, որից 29.8 մլն դրամը բաժին է ընկել կյանքի ապահովագրությանը: Ապահովագրավճարների ընդհանուր ծավալն աճել է 17.7 տոկոսով, իսկ կյանքի ապահովագրության գծով ապահովագրավճարների ծավալը` 23.9 տոկոսով:

Նշենք, որ որոշ ընկերությունների կյանքի ապահովագրություն իրականացնելու լիցենզիաները իրենց իսկ դիմումների համաձայն, անվավեր են ճանաչվել: Այսօրվա դրությամբ կյանքի ապահովագրություն է իրականցնում միայն «Կասկադ Ինշուրանս» ընկերությունը: Հաշվետու ժամանակահատվածում վերաապահովագրմանը փոխանցված ապահովագրավճարների գծով ռիսկերը կազմել են 3.078 մլն դրամ կամ մոտ 60.1 տոկոս: Ապահովագրական փոխհատուցումների ընդհանուր ծավալը 2006թ. տվյալներով կազմել է 27.3 մլրդ դրամ` 2005թ. 521.7 մլն դրամի դիմաց: Փոխհատուցումների ծավալը աճել է 52.3 տոկոսով:

Նման աճը պայմանավորված է Ա-320 օդանավի զոհերի հարազատներին տրված փոխհատուցմամբ: Էապես աճել է նաև վերաապահովագրողների մասնակցությունը ապահովագրական հատուցումներում, հասնելով 26.968 մլն դրամի կամ փոխհատուցումների ընդհանուր ծավալի 98.9 տոկոսի: Գործող ընկերությունների ընդհանուր ակտիվմերը նվազել են 17.5 տոկոսով` հասնելով 8.148 մլրդ դրամի, ընդ որում, դրամանական միջոցները կրճատվել են 19.8 տոկոսով և կազմել են մոտ 1.216 մլրդ դրամ, իսկ հիմնական միջոցները` 42.3 տոկոսով` կազմելով 616 մլրդ դրամ:

Ակտիվների նվազումը պայմանավորված է գործող ապահովագրական ընկերությունների թվի կրճատմամբ: 2006թ. դեկտեմբերի 31-ի դրությամբ, լիցենզավորված և գործող ապահովագրական ընկերությունների թիվը 13 էր` 2005թ. 23-ի դիմաց, իսկ այսօրվա դրությամբ կա 12 ընկերություն: 24.9 տոկոսով աճել է ընկերությունների սեփական կապիտալը, կազմելով 5.526 մլրդ դրամ: Այս ցուցանիշի աճը հիմնականում պայմանավորված է կանոնադրական կապիտալի աճով:

Նշենք, որ 01.01.2006թ. շուկայի մասնակիցների կանոնադիր կապիտալի նվազագույն չափը պետք է լիներ 200 մլն դրամ, իսկ ընթացիկ տարվա հունվարից` 350 մլն դրամ: Սրանով պայմանավորված` տարեկան կտրվածքով այս նորմատիվի աճը կազմել է 26.5 տոկոս` հասնելավ 5.2 մլրդ դրամի: Ապահովագրական պահուստները հաշվետու ժամանակաշրջանում կրճատվել են 67.5 տոկոսով` կազմելով մոտ 1.2 մլրդ դրամ: Գործող պայամանագրերի քանակը կազմել է 28 727` 2005թ. 23 508-ի դիմաց: